用醒師頭做裝飾，都幾搶鏡。

試食王

慶有餘定㷫有餘

銅鑼灣食廈 Cubus又有新餐廳進駐，慶有餘取代皇府粥麵廚房原有 7樓位置，成為場內唯一中菜。 Cubus以型格作賣點，餐廳全部大有來頭消費不菲，皇府可能因不太入流而撤退。慶有餘英文名叫 fine dining，應該符合食廈的高要求。

餐廳樓底高，桌椅鬆動，空間感滿分。雖然稱不上入型入格，但裝修絕無傳統茶樓娘味，照計，應該主攻年輕食客市場。不過，午膳時間，餐廳竟然播放大龍鳳音樂，以為自己去咗阿婆個壽宴。
人客不多，點菜上菜有成三、四個侍應圍住你張枱，如果我係愛排場的自由行客，應該會覺得賓至如歸。午餐以點心為主，主菜點了招牌推介的士多啤梨焗肉排和豉油皇大蝦，價錢，非常 fine dining，其餘招牌菜，如慶有餘太爺雞要$388隻，冬菇鮑魚炆鮮雞七百幾蚊隻，還有迷你佛跳牆，一味夠豪。
先上老火例湯和涼拌麻辣花膠，節瓜豬𦟌雞腳湯甚有火侯，材料鮮香入味，很滋潤。但涼拌麻辣花膠有陣苦薄荷味，花膠又似海蜇，好怪。點心做得不錯，皮薄餡靚，黃沙潤燒賣尤其香口，而且不油膩。輪到創意中菜士多啤梨焗肉排，太甜了，士多啤梨似是現成果醬多過鮮製。肉排又太肥，天然果酸沒法中和油脂和增加味道層次，可說是失敗作。豉油皇大蝦調味唔錯，可惜過韌。
結果，士多啤梨焗肉排和涼拌麻辣花膠食剩一半，真的「有餘」。總括來說，傳統中菜做得不錯，尤其老火湯。只是，大龍鳳就大龍鳳，無須將就潮流玩新派。

涼拌麻辣花膠$68菜式賣相一般，唔夠 fine，呢個頭盤味道實在怪。

豉油皇大蝦$98/隻唔算好大隻，豉油味香，可惜不太入味，還有肉太韌。

節瓜豬𦟌雞腳湯$180/鍋湯和渣分開上，老火湯鮮味滋潤，全餐最有水準之作。

士多啤梨焗肉排$148又甜又膩，用得生果，應該識得利用當中酸味中和肥膩嘛。

金蒜釀茄子$68幾脆口，不過有點油。

招牌黃沙潤燒賣$48沙潤酥香，打到起膠的燒賣很彈牙，點心做得不錯。

乾隆一品鮮蝦餃$48皮薄餡靚，鮮蝦爽口，但個名極度誇張。

蜜汁叉燒腸粉$48腸粉夠滑身，厚薄適中，叉燒香口無渣。

評分

食物：★★★ 1/2
服務：★★★ 1/2
環境：★★★
價錢：★★★ 1/2

慶有餘
地址：銅鑼灣開平道 1號 Cubus 7樓　
電話： 2323 7280

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

黃色夏日池畔派對

期待夏天來臨，又可以參加池畔派對。法國香檳品牌 Veuve Clicquot看來更加等唔切，已定於 4月 26日在君悅酒店池畔舉行 Veuve Clicquot Yellow Summer 2013派對。到時池畔將化身充滿黃色樹影的熱帶沙灘，賓客將受到模特兒及划船人員熱情招待。派對沒有門票預訂，好想參加？就要由現在開始每日瀏覽 Veuve Clicquot網站，隨時準備搶飛！

網址： http://vcseason.asia/hk/yellow-summer