close


阿佘、張可頤一早已經傳不和，當日現場記者嗌佢哋坐埋一齊影合照，兩位一姐突然耳聾，郁都唔肯郁。

一年一度《壹電視大獎2012》上個禮拜三（三月二十八日）公布結果，10大電視節目第一位，順理成章由神劇《天與地》奪得，除咗已離巢無綫嘅林保怡，劇中幾位主角佘詩曼陳豪黃德斌都有親身嚟領獎，飾演「家明」嘅張景淳，更攞到「最有前途男藝人」。


至於排第二位嘅10大電視節目，係《法證先鋒3》，男主角黎耀祥身在橫店拍《大太監》嚟唔到，監製梅小青同無綫就快bye bye，準備過檔NOW，同樣未能現身分享成果，攞獎重任，唯有交俾已經成為「電訊魔童」王維基自己人嘅張可頤，以及陳展鵬代領。孭飛劇排第二，張可頤仲係10大電視藝人第四位，話晒都係幫無綫攞獎，不過已經唔係自己友，當日張可頤只能夠做獨家村，舊同事冇乜邊個肯埋佢身，尤其見到當年拍《金枝慾孽》已經傳不和嘅阿佘，兩個更加冇偈傾。人走茶涼，八珍都好明白，但年底開始進入免費電視大戰，明年《壹電視大獎》競爭會更加激烈，10大排名隨時估你唔到，明刀明槍電視角力，值得期待。 ####


樂大媽樂易玲行過當睇唔到，鍾嘉欣楊怡陳敏之企埋一堆影合照，張可頤同樣冇份。


同樣唔係自己友，已過檔商台嘅陳志雲擔任頒獎嘉賓，卻獲陳法拉主動上前熱情打招呼！


《On Call 36小時》奪得10大電視節目第六位，女主角楊怡領獎時忽然落淚，佢解釋呢個劇令佢更加珍惜眼前人，覺得好感動。


《壹電視大獎》已經舉辦咗二十一年，阿佘攞獎攞足十一年，雖然今年輸俾陳豪，只能夠攞到10大電視藝人第二位，但仲識講笑：「原來攞咗十一年，我好老呀！」


樂大媽年年都會帶埋班仔女嚟攞獎，今年仲要同黃宗澤趕下場，就藝人被偷拍事件，一齊出席演藝人協會舉行嘅記者會。


黃智賢攞到今年《壹電視大獎》新增設最搶戲男配角獎，台下個個熱烈拍掌，由戇直「阿海」到黑警「辣薑」，應得！

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄