YoYo下月生得 王浩信傍實減壓
無綫小花陳自瑤（YoYo）自佗B女後深居簡出，據知選擇自然分娩的她為留家安胎，推掉近七位數字工作！由於自然分娩準備工夫多，YoYo大為緊張，老公王浩信抽空陪老婆行街減壓。
陳自瑤與王浩信去年11月結婚後，隨即宣布懷孕三個月及佗B女，預產期是下月中。據知，YoYo懷孕後工作不減反增，不過她早已決定即使忍受十級痛楚，也要自然分娩。為了安胎，她與老公商量後，自今年1月中後已絕迹公開場合，前後共推掉了近七位數字的工作，一直深居簡出，閒時只會外出為B女物色靚衫。而現時獲媽媽及奶奶悉心照顧的YoYo，每天定時到公園散步，務求生B時有氣有力！
谷奶升到D Cup
眼見老婆為B女付出甚多，王浩信亦不敢怠慢，據知他除了一力承擔搵奶粉錢的重任外，還要照顧大肚老婆的需要。由於YoYo的肚子一天比一天大，王浩信不放心讓她獨自逛街，但為免老婆臨盆前呆坐家中納悶及承受無形壓力，他往上海拍劇前抽空陪老婆作產前最後一擊，與老婆十指緊扣遊街減壓兼狂掃BB用品。
日前，王浩信與母親及YoYo到中環大型嬰兒用品連鎖店掃貨，YoYo身形及面頰明顯發福，上圍由C Cup升至D Dup。有老公拖實兼(目及)實，她十分聽話穿上平底Boot。除了老公外，奶奶對YoYo亦十分緊張，全程傍實兼幫手推購物車。三人當日主攻BB沐浴盆、沐浴液、衫仔及鞋仔等，滿載而歸。
自然分娩驚早產
事後記者致電王浩信，他緊張大師上身，當得悉第一胎通常會比預產期早出生時，即大叫很驚：「我都好驚，之前都聽到好多人咁講，愈聽我就愈緊張，到時真係要喺上海仆返嚟！好在老婆都係做呢行，都好明白。」他透露醫生指B女體重已有五磅多，又指YoYo佗B後變得為食：「佢好貪靚，成日都話自己肥，但我覺得依家咁樣先係最靚，圓圓哋先好，最緊要健康。」他又承認YoYo為囡囡着想，選擇自然分娩，問到有否攞定假陪太太？他說：「都想陪佢，我哋請咗個工人、陪月，婆婆同嫲嫲都已經講定幫手湊BB。」
第一手消息請下載on.cc東方互動iPhone/iPad/Android Apps
影視組
老公拖實
王浩信拖實老婆陳自瑤，愛妻情切。
落力掃貨
陳自瑤與王浩信細心選購，邊揀邊密斟。
奶奶錫晒
奶奶幫手推車，以免新抱仔陳自瑤操勞。
步步跟實
王浩信陪陳自瑤到嬰兒用品店購物，步步緊貼老婆。
D奶巨肚
挺着谷奶D Cup及巨肚的陳自瑤，步伐尚算輕快！
大肚難免情緒不安
星級龍B排住隊出世，不過一班大肚女星卻要面對心理和生理上出現的變化！據家庭醫生關嘉美表示，大肚婆每天的心情可以很不一樣，尤其YoYo懷的是第一胎，會特別緊張。問到大肚婆應如何減壓？她說：「懷孕係好開心嘅事，所以先要抱住期待嘅心情面對，再者YoYo年紀尚輕，相信會康復得好快，比起高齡產婦復原得慢已經好好多，同埋做大肚婆有特權，攞正牌狂食唔使減肥，而佢嘅另一半都要畀多啲關心老婆，因為大肚婆難免會有不安情緒，兩個人都要用正面思想去迎接呢個小生命出世就可以喇！」
留言列表
