CLOSE-UP

智慳減排

空氣污染嚴重，光害世界聞名，再加上垃圾多到連堆填區都塞唔晒，香港再唔大力推動環保減碳減排，想搵人嚟都難。
近日有車廠推出環保車，例如比亞迪將會喺五月引入電動的士、豐田同 Fiat亦推出混能的士同電動貨 van；雖然冇可能一步登天改善空氣質素，但始終都叫做有個開始。
正如你同我一日唔為環保出力，一日都唔使旨意換嚟藍天。

深圳試電的

比亞迪即將引入香港嘅 E6電動的士，其實已經喺深圳試行兩、三年，成日北上深圳消費嘅話，可能都曾經坐過。雖則呢架只係的士，不過比亞迪講到明會推出同款私家車版本，香港車主，自然想知究竟架車好唔好揸，應唔應付到正常行駛要求。今次特別上深圳試坐，搵的士司機評價一下。
而家深圳只有一間的士公司專門出租電動的士，總數約八百架，維修保養及建設充電站，全部由的士公司負責。喺深圳截車試坐，第一個感覺似架中型房車，後座算闊落。司機皮先生喺深圳揸咗近十年的士，四個月前先轉揸電動的士，佢話電動的士每月租金要兩萬人仔，扣除的士公司送嘅三千五百蚊電費，租金依然貴過汽油的士（月租約一萬三千）；成本高，收入自然減少，佢猛呻話而家雖然月入九千，但仍比起舊時搵少兩千，「冇辦法，而家汽油的士好難租，唯有轉揸電動的士。」

首批 45架電動的士將於五月落地，預計二○一五年會有三千架。 

車身比私家車高，上落都算方便，後座亦冇頂腳，算合格。 

每日充兩次

轉揸電動的士，最唔慣就係充電，「以前一日入一次油就得，但而家快叉半個鐘只行到 220至 230公里，唔多夠用，雖然完全充滿電可以行約 320公里（官方數字），但要等兩個鐘，邊有時間等？唯有每日充兩次電。」皮先生話好在充電站夠多，「成個深圳大約有六十個充電站，由幾個位到過百個位都有，福田呢個就最大，成百個位，好少要等。」
講到尾，揸電動的士「油錢」可以慳到幾多？以深圳每度電收 1.18元人民幣計，皮先生話一度電可以行三至五公里，計落每公里唔使四毫子。相比而家香港石油氣的士每公里差唔多要一蚊，算係平好多。

將專用插頭插落車身充電位，就可以拍儲值卡充電。 

屏幕會顯示充電狀態，似去油站入油。 

起步搶客

喺充電站問埋其他司機點睇電動的士，有冇俾上年單電動的士車禍嚇親，竟然全部都話唔驚，「汽油的士都會撞車同爆炸啦，而且電動的士好好力，起步真係無得頂， 0至 100公里時速只需八秒，拍得住架 3000c.c.房車，有時同汽油的士鬥快搶客，真係贏晒。」

電池放喺車底，車頭冚下面係摩打。 

充電充到八成滿，已顯示可以行 227公里，足夠由天水圍來回將軍澳兩次。 

爆炸陰影

上年五月，比亞迪 E6電動的士俾架 GTR以時速 180公里撞完後着火，的士司機連同兩名乘客被燒死，充電池究竟安唔安全？成為今次 E6來港其中一個熱門話題。
比亞迪回應話意外中有七成半電池冇着火，另外兩成半只係電池外殼燒毀，焚燒時電池並冇爆炸。根據當地政府部門調查顯示，燒着嘅係車內裝飾，並非電池引致嚴重搶火。
今次 E6會先以電動的士形式到港，可以月租八千元租用；遲吓嘅私家車版本暫時定價約四十五萬，香港政府只豁免首次登記稅而並冇任何補貼。用幾十萬買件國產貨，加上有燒車意外陰影，難怪香港人都話買唔過。

意外後廠方強調屬極罕有事件，不過有圖有真相，燒成咁好難叫人唔擔心。 

充電站面積有成個足球場咁大，配套仲唔錯，有埋司機休息室。 

搶先混能

新的士吸引唔少途人駐足拍攝，而且更有客人特登電召乘搭。新的士引擎及摩打齊輸出時，馬力達 133匹、扭力 35.6kgm。 

唔止得比亞迪電動的士先環保， Toyota早喺二月初就推出全港首部 Prius混能的士，搶先環保。

好力爭先

混能的士專屬一張每公升電油減三蚊嘅折扣卡，入油更抵。 

暫時已出牌嘅混能的士只得一架，租車司機黃先生對新車讚不絕口，「以前石油氣的士每公里差唔多要一蚊油錢，而家混能車八毫子就得，揸一日已慳到幾十蚊。」除咗慳錢，入油比入氣更方便快捷，「唔使再排長龍入氣，每更至少可以慳番半個鐘排隊時間，接多兩三支旗，搵多啲。」
黃先生最 like新車好力，「引擎加摩打嘅扭力好大，試過同另一架舊的士燈位平排起步搶客，我一踩油加速就搶到個客，隔籬架舊的士簡直食塵。」
不過，就算優點多多，好多行家都未敢租新車，「舊款車勝在多，零件、維修費較平，就算唔小心撞親整花，舊車維修都係幾百至千零蚊，但新車閒閒哋要二三千蚊！所以就算而家新車租金同舊車差唔多，好多行家都唔敢租住。」

豪級享受

電動私家車早兩年前已經喺香港賣緊，續航距離不足係最大死症，但好多車主最大嘅心理關口，反而係大拿拿拎四、五十萬，只可買到 Corolla級數嘅車，好唔抵。不如俾多幾十萬，買架設備更齊全，續航距離達 500公里嘅 Tesla Model S電動跑車，仲好玩。
新車約售一百萬左右（電動車免首次登記稅），馬力達 416匹，級數媲美價錢相若嘅 BMW 550iA（ 407匹•連稅$1,168,000）或 Mercedes-Benz E 500（ 406匹•連稅$1,060,000）。美國已經開始出貨，不過，香港頭批買家最快都要年尾先收車，而且訂單已超過百張，而家排隊起碼下年先收到車。

除咗頂級版，仲有續航距離少一半嘅入門版選擇，車價約五十至六十萬。 

車廂內設置 17吋觸控式中控台，可以設置行駛設定外，更可以上網睇片、睇地圖。 

廿七萬出車

車行負責人話今年年尾會改裝 Fiat Doblo做五架新界的士同埋九架復康的士，而且電量亦會加碼至可行駛約 2801cm。 

電動車喺香港已經講咗年幾兩年，不過由於車價至少都要四十萬，續航距離又只得百零公里，應付唔到實際駕駛需要，自然冇人會換車。其實意大利車廠 Fiat上年推出咗部 Doblo電動輕型貨 van，叉滿電後可以連續行駛 200公里，最緊要係如果申請到香港政府嘅綠色運輸試驗基金，就可以用廿六萬八千蚊，出到部原價接近一百萬嘅車，認真吸引。

繁複程序

要打開車頭蓋先可以接上快速充電插頭，稍為麻煩。 

做運輸生意嘅 Eric，半年前成功攞到綠色運輸試驗基金資助，出咗部 Fiat Doblo，「以前揸開貨 van載員工出入，早兩年已經想換車，車行建議我嘗試申請基金，成功嘅話就可以用廿六萬八千蚊出到架原價
九十九萬八千蚊嘅電動貨 van。心諗可以慳油費，又可以環保，就決定申請。」
政府資助七十萬咁筍？查實唔係人人都可以申請，要符合資格先得：公司成立超過一年以上、業務上有需要用車，而且仲有唔少手續同申請需時，「首先要填寫一份十六頁紙嘅申請表，主要係填番公司背景同資料，同埋寫番想測試嘅車種，交表後等半年左右就會有結果。成功嘅話就可以同車廠訂車，前後申請連交車大約用咗一年左右。」 Eric話買車之後兩年，每個月都要交駕駛報告俾政府。

合理續航

寫報告事小， Eric話最緊要慳到錢，「日日由屋企揸車去落馬洲返工，半年就行咗萬八公里，計番每公里『油錢』都係兩毫幾，比起柴油版 Doblo每公里要七、八毫子，划算好多。」續航能力亦有驚喜，「廠方數字話叉滿電可以行 190公里，諗住實際揸落會差一大截；點知試揸咗幾日，就算塞紅隧、開冷氣兼坐滿五個人，竟然行到 180公里，同官方數字差唔多。」
Eric話起初仲俾其他買咗柴油版 Doblo嘅朋友笑，「話我買貴佢哋六、七萬，油錢有排都追唔番，但而家知道架車咁慳油，個個都轉軚問我點申請資助，據我所知至少有兩、三個朋友已經入咗紙。」

電動版同柴油版外表唯一分別，就係電動版車身會貼有「 Micro-Vett」標誌。 

因為電動車行駛時太靜，為怕行人聽唔到車輛駛近，車行專登喺右邊冷氣出風位下方（黃圈）加裝提示聲響按鈕。 

資助金額

綠色運輸試驗基金嘅資助金額係電動車同一般車嘅市價差額，以 Fiat Doblo電動車為例，原價九十九萬八千蚊，政府會以一般輕型貨 van車價廿六萬八千估算，資助成功申請者七十三萬差價（上限為三百萬），而每間公司最多可以申請三架。

每公里平均消費
比亞迪/Toyota/Toyota/Fiat
E6電動的士/混能的士/石油氣的士/電動貨 van
$0.4/km、$0.8/km、$1/km、$0.3/km

環保新角度

講環保唔只得電動車，個人習慣反而最重要，來來去去淨係識叫人「順手熄燈」、「用少啲水」，如果背後冇環保理念或感覺唔到污染殺到埋身，就好難堅持得到。

為後代保藍天　 Fanny/新紮媽咪

環保分子有一百個理由叫人保護環境，而新紮媽咪 Fanny就只得一個，「好多家長都掛住谷仔女學業，但如果下一代根本生存唔到，入到名校又點？」 Fanny話有次帶 BB去巴士站等車，沙塵滾滾廢氣又多，既怕 BB鼻敏感，又怕污糟空氣會搞到囡囡出濕疹，「當時心諗如果將來空氣污染再惡化，香港冇咗個藍天，阿女咪邊度都唔使去？所以搞好環保，等下一代有個乾淨環境都好重要。」
坐言起行， Fanny開始由細眉細眼處入手，「好似順手熄燈、廢紙鋁罐分類同用少啲膠袋，堅持得到，就可以為環保出一分力。」除此之外， Fanny以前會貪方便幫襯超市，而家就儘量去街市同雜貨鋪，「唔係為咗反地產霸權，只係覺得超市貨品太多包裝，好似去超市買棵菜，定死咗幾多公斤一袋，俾錢會印單，有時仲送印花，浪費咗好多地球資源。」而家去雜貨鋪買米， Fanny都會自備麻包袋裝米，儘量減少浪費資源。
Fanny話唔期望影響到其他父母一齊減廢，不過囡囡見到阿爸阿媽有環保意識，將來亦會跟住做，「老土講句，有父母以身作則，好過第時講一千萬句。」

若果空氣持續污染， Fanny擔心以後囡囡去邊都要戴口罩。 

Fanny話去雜貨鋪買米可以自備麻包袋，仲有得食幾多買幾多。 

為咗慳電，屋企燈膽就算燒咗都唔換。

環保係 Lifestyle　 Andrew/銀行職員

對比 Fanny為下一代堅持搞環保， Andrew就開宗明義話環保係 lifestyle。
講環保扯到生活態度咁遠？ Andrew笑笑口話以前都同其他人一樣，唔多關心環保，返屋企即開全屋燈同冷氣，電費閒閒哋過千蚊。自從上年一月屋企大裝修，全屋換晒 LED燈，雖然價錢貴三倍，但電費即慳五成，先至開始學人講環保，「當時收到張電費單，即刻嘩咗一聲，原來只係做少少嘢，已經可以慳咁多電。於是就諗吓有咩方法可以慳多啲，搵搵吓資料先知原來只要付出少少，簡單到將玻璃樽回收打碎，竟然可以變成環保磚，減少咗污染，空氣都好啲，何樂而不為？」
做落仲發現，好多朋友都讚佢有生活態度，「以前請朋友返屋企食飯，都會準備汽水啤酒，罐裝支裝照買，飲完會撈埋一齊掉。裝修後約朋友玩 poker，規定朋友將垃圾分類，等我可以拎去回收重用，班朋友即讚我有 style。」
有朋友俾 Like， Andrew完全投入環保 style，連飲食習慣都改變埋，「好似以前出街食飯，明知食唔晒都搏命叫。而家為咗唔浪費食物，會諗過度過先叫，仲食多咗蔬菜，太太都讚我識飲識食咗。」

舊年裝修掉晒全屋舊傢俬電器，若果今日推倒重來， Andrew會揀捐晒出去，環保啲。 

Andrew話環保係舉手之勞，例如將汽水鋁罐同膠樽分類回收，已經踏出第一步。 

最憎烏煙瘴氣　 Judy/家庭煮婦

去年 Judy（左）參加慳電比賽，證明到俾屋企人睇，改變少少習慣就可以達到環保目標。 

有人為下一代、為自己注重環保，但住喺佐敦舊區嘅 Judy，就話支持環保純粹睇唔過眼，「屋企附近好多食肆，後巷多污水唔在講，最衰係好多廚餘，睇見都眼火爆，但我只係一個師奶，好難去改變。」
人微言輕， Judy唯有由個人力量做起，希望感染到身邊人注重環保。上年仲參加地球之友「知慳惜電」慳電比賽，成功慳到七成電費，得到住宅組季軍，「其實我冇乜慳電招數，只係買衫儘量揀免熨款式，平時唔用風筒吹頭同定形水，減少污染環境。」

換物減費　 Sandy/港青創意藝術教育計劃負責人

今年搞咗兩次換物派對， Sandy話原本宗旨並非為環保，點知俾人封做環保人士。 

今年年初，網上好多團體都搞以物易物活動，好多環保團體大讚話可以令年輕人減少購物，將舊物重生仲有助環保。但問番其中一個活動嘅搞手 Sandy，就擰晒頭話冇咁大成效，「事後同參加者分享番意見，我聽唔到有人話學識精明消費。」
其實今年初， Sandy先後搞咗兩次名為「自發晒冷」嘅換物 party，出發點無非想年輕人透過換物同人交流，好過做隱閉青年，「家陣好多年輕人自我形象低落，但通過地攤可以同人傾偈，好似有個攤主平時唔多出聲，最後成功同其他人換到嘢，就話得到認同感，畢竟滿足感大於一切。」
不過， Sandy話短期內唔會再搞大型換物 party，反而會將規模縮細，「下次 event主題係書，等班後生仔拎自己嘅創作或舊書出嚟同人交換，等佢哋學識分享，知道舊書都可以有用處，好過大條道理講環保。」

節能法寶

個人力量微薄，想加大力度，可以借助環保工具，每人每日慳多啲，就唔使驚香港空氣差過北京。

慳電

踩車供電
早排 DHL搵科技大學合作，整咗六部健身單車充電器出嚟，分別擺喺唔同辦公室俾員工踩，做到悶可以踩單車輕鬆吓之餘，仲可以幫收件掃描器充電。原理其實好簡單，喺普通健身單車車轆加裝發電器，車轆一轉帶動埋發電機發電，再將電力儲入充電池。至於電量，只要踩夠三粒幾鐘就夠叉滿八部收件掃描器。科技大學方面仲話換過個手機接頭，踩十分鐘度就夠叉兩部智能手機。另外，香港公司三得環復都有發電健身單車賣，每部四千蚊，踩一粒鐘叉到四部智能手機，都值得考慮。

喺單車上可以揀六級阻力，阻力愈大愈難踩，但發電量就愈高。 

電池用特別插頭連接，暫時只可以叉收件掃描器，想幫手機叉電，就要等科技大學整條手機專用線出嚟。 

電費 app
喺屋企電箱同埋個別電器安裝監察器，再喺 iPad或 iPhone下載相關 app，即時知道全屋或某幾件電器用電量， check到邊件電器「食電」之餘，如果仔女或工人喺屋企亂開冷氣，都知得一清二楚。
售價：待定
網址： http://www.jetlun.com 

調暗
睇緊戲，啲燈唔使開咁光，傳統燈泡得開同閂兩個選擇， LED燈膽就可以用遙控器調暗，既慳電又可令燈膽長壽啲。
售價：$698（遙控器連兩個 LED燈膽）
網址： http://www.philips.com.hk 

360發電
太陽能板多數係平板，向住太陽先儲到電，但係德國西門子就發明出 CIGS太陽能管（紅框），無論陽光喺邊個方向射埋嚟都吸到，就算地下反射亦吸埋，唔好嘥！最正係唔似平板咁阻定，冇地方裝少幾支管亦得，靈活好多。
售價：約$10,000/m2
網址： http://www.energy.siemens.com 

再慳多啲

LED燈愈嚟愈流行，但仲有好多人因為易壞同埋款式少而唔肯轉用。其實近年已經改良咗好多，以前 LED燈易壞，正確嚟講只係壞咗個散熱器，燈膽本身仲用得，但都焗住成個換；而家新設計已經將兩樣嘢分開，邊部分壞就換嗰部分，減少浪費。款式方面，有部分 LED燈設計到可以加燈罩，造成唔同散光效果，效果媲美勁嘥電嘅射燈，以後就冇藉口唔用 LED燈。

安裝唔同燈罩，就可以做到唔同光度，冇之前嘅款式咁死板。 

慳水

提水
沖涼沖得太耐，係人都知好嘥水，唔通要戴住隻錶沖涼？裝個計時器就得，頭四分鐘，中間顏色圈會 keep住綠色，之後會轉藍色，沖多過八分鐘就見紅，超過十二分鐘直情會眨燈，提你係時候閂水喉。
售價：約$200
網址： http://www.h2o-power.net 

衝力噴水
傳統花灑每分鐘出水量可以高達十一公升，想慳水，理論上最好就低過九公升。不過，出水量低就會嫌射水唔夠力，沖得唔夠暢快。韓國設計嘅噴射式花灑，將空氣注入水流加壓，加強水流速度，明明只有六公升出水量，感覺同沖十一公升嘅差唔多，慳到水又沖得舒服。
售價：約$300
網址： http://www.ekosdo.com 

循環再用

燈膽電筒
LED燈膽加個充電池，開燈時順便叉電，叉滿電拆落嚟可以轉做手電筒，最長用到兩至三個鐘，唔似傳統電筒咁嘥電池，一物兩用兼減廢。
售價：$180
網址： http://www.lyd-ledlighting.com 

產品提供：科技大學、中電「綠適天地」及建築業議會「零碳天地」 

熱力回收
冬天開電熱水爐，嘥好多電先可以煲熱啲水，可以喺浴缸去水位裝個由荷蘭引入嘅「熱能回收器」，將沖涼水嘅熱力傳番俾熱水爐用嚟煲水，計過數可以慳六成電。
售價：待定
網址： http://www.hei-tech.nl 

熄匙有冷氣

熄匙後開到幾耐冷氣，視乎車頂有幾多位裝太陽能板，以充電十個鐘計算，大型貨車大約開到三個鐘，至於的士或者私家車，就用到個幾鐘。 

法例規定停車熄匙，夏天等人都幾慘，本地公司陽光動力就諗到喺車頂裝太陽能板發電，用電嘅部分都可以由太陽能提供，就算停車熄匙都繼續有冷氣。至於慳到幾多油，就要視乎部車有幾多位可以裝到太陽能電板，不過平均都減到一成至三成耗油量，一年都慳到唔少油費。

未來能源

環保能源零污染又解決到石油危機，一向都係好多國家、大學重點研究項目，所以每隔幾年就有新技術提升效能，隨時跑出取代舊有發電模式，成為生活不可或缺嘅新能源。

菠菜增效

外國政府興建太陽能發電站供電俾市民用，就因為轉電效能低要以量取勝，但日後提高到轉電率，就唔使霸佔咁多地方。 

太陽能發電一向係重點再生能源研究項目，不過而家大部分太陽能電板嘅轉電效能只得一成，發電量始終唔夠大。美國科學家發現只要將菠菜入面光合蛋白提煉出嚟，再搽喺太陽能板表面，就可以將轉電效能提高到兩至三成，又平又方便，預計三年後就有得用。

氣流充電

架上面嘅藍色裝置就係氣流發電器原形（細圖），實際用喺車上面，體積要放大幾十倍先夠用。 

電動車可以話係未來汽車發展方向，但係續航力問題仍未完全解決到。 IBM就研究緊一種新電池，主要將行車時嘅氣流引入電池位，當氧氣經過電池表面嘅納米層就可以發電，做到一路行一路叉。而且新電池叉滿電後，最多可以行到八百公里， Toyota已經用新技術開發混能車電池，估計幾年後就有得用。

垃圾有價

香港政府想開徵廢物按量收費之餘，不妨考慮埋引入垃圾再生，雙管齊下仲實際。 

香港垃圾每日過萬噸，要清理，政府淨係識得堆填同焚化。其實香港公司柏堅國際已經研發到將有機垃圾，好似塑膠、廚餘等加熱分解，變成一氧化碳、氫氣、納米碳管等有用物質，唔單只可以合成做塑膠原料出售補貼成本，仲可以用嚟發電俾市民用。而家同奧地利企業合作緊，東南亞亦有唔少國家有興趣，唔知香港政府會唔會考慮？

污水價值

污水發電改良版係由華裔教授劉紅研究出嚟，其實佢幾年前已經搞緊污水發電，搞到最近先有重大突破。 

污水加入細菌就發到電，原本好環保，但始終發電量弱、培養細菌時間長，實用性低。上年 Oregon State University改良舊式污水發電設計，用特別物料代替細菌，令污水發電量較之前設計高出十倍至五十倍，每立方米污水可產生約兩度電，以全港每日二百幾萬立方米污水計算，足夠為過百萬家庭供電。

香港研油

位於屯門環保園嘅倡威科技主力出產生物柴油，由大型酒家回收廚餘，經提煉同淨化，就可轉化成生物柴油。 

專門研究環保科技、零碳天地總監李貴義博士話，生物柴油有望成為未來能源，「目前本地有三間公司生產緊生物柴油，而家只係$9一公升，比工業用柴油只係貴幾毫子。一公升油可以製造三度電，我哋 office都有三成電力來自生物柴油。香港唔少洗衣房都用生物柴油發電煲熱水，部分大廈用嚟維修嘅升降台，亦都用緊生物柴油，始終佢冇污染物排出嚟，唔似得以前用柴油會噴黑煙，如果再多啲人用，可以量產生物柴油嘅話，有機會平過用電。」

facebook

只要在 Facebook以「 NEXT 3.0」為關鍵詞搜尋，或以手機的「 QR code」 app掃描，就可以睇到更多新聞同產品情報。

text：科技組
photo：攝影組