close


由於心悠與苟姑娘的廣東話咬字不清，所以葉念琛避免她們不停NG，醒目地在劇本中稍作修改，將苟姑娘的角色定為台灣人，批准她們以國語讀對白。

唔計靠葉德嫻海外攞獎開靚個頭的《桃姐》、《大追捕》、《春嬌與志明》票房錄得好成績，證明港片不一定靠大卡士、動作爆破。擅拍低成本電影包括葉念琛，新作《天生愛情狂》已拍到尾聲，張智霖（Chi Lam）初搭劉心悠，再加埋苟芸慧做Chi Lam前度，觀眾唔覺得熟口熟面。但劉心悠苟姑娘講廣東話，同樣唔鹹唔淡，為免不停NG，導演臨場改劇本，讓二人同場對手時講普通話，成功避過超時超支一劫！

冇得嘴
有機會做張智霖前度女友，苟芸慧說自己諗都唔諗，即接！「我係袁靚靚嘅fans，有次出活動，見到佢一家三口好幸福，今次又同Chi Lam合作，加上我覺得葉念琛拍愛情片好到位，所以導演一搵我就答應。」拍攝當日，苟姑娘卻因為腸胃炎又屙又嘔，導演唯有臨時cut走她與Chi Lam的嘴嘴鏡頭。「唉，本來有場戲係要同Chi Lam kiss，但嗰日我拎住個膠袋standby隨時嘔，好唔衞生，係人見到都驚啦，但我真係有啲失望。」苟姑娘說。

大食狂
現場所見，當心悠與苟姑娘同場埋位，兩女即時轉channel講普通話，原來因為她倆的廣東話均咬字唔正，為免不停蝦碌，葉念琛索性改劇本。「嗰場戲係要交代啲好重要嘅事，我哋兩個都咬字唔正，觀眾會聽得好辛苦好難明，導演好好，即刻執生將我個角色變成台灣女仔，同心悠對話嗰十分鐘，全部講普通話，唔使再配音。其實拍《金枝慾孽貳》都遇上咬字問題，因為劇本出唔切，成日飛紙仔，我唔想阻礙進度，所以已經搵咗言語治療師幫我改正；咬字唔清令我冇信心，所以想做得好啲。」苟姑娘說。苟姑娘要面對咬字唔清障礙，劉心悠同Chi Lam則齊齊嗌辛苦。「拍愛情片本來唔辛苦，但今次例外，唔知點解，劇組無時無刻都會有好嘢食，導演同我哋輪流萬歲，一日食五、六餐，再係咁食法，真係好大鑊！」心悠說拍《愛情狂》變「大食狂」，當務之急，要減肥。 ####


心悠在戲中扮演護士，在醫院內碰上男友的前度女友，而得知男友很多的往事。


最近忙於拍《金枝慾孽貳》的苟姑娘，見到ChiLam時即擺出一個參見皇上的甫士，成功引到ChiLam留意，非常識趣。


在未埋位前，ChiLam很勤力用iPad睇劇本，做足演員的基本需要。


大大聲聲話要減肥的心悠，一邊偷燒賣食，另一邊又與ChiLam齊齊食B仔涼粉。


探班當日已前後叫了四次外賣，到放晚飯時，見到滿桌都是餸菜的ChiLam已飽到抬不起頭來。


蕭定一是該電影的投資者，他早前特別帶了數支香檳探班，與眾同樂。


心悠與ChiLam早在去年拍《你太善良》的MV中合作過，兩人已有一定的默契，拍《天》片時相處很融洽。


戴上搞笑的啤酒帽與心悠拍攝外景，在鬧市中引起哄動，途人紛紛要求與他合照。


拍戲的時候已不停叫外賣，ChiLam的fans更親手整曲奇餅送給大家吃，認真窩心。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄