close
阿 B和女友范姜及大女嘉晴、細女鍾懿和鍾幗，個個嬉皮士上身，感冒未完全康復，仍聲沙沙的阿 B，仲兩度同幼女鍾幗嘴嘴，唔驚傳染咩？
名人有喜
鍾鎮濤 阿 B的那些年
踏入六十歲花甲之年的 B哥鍾鎮濤，上週五在深灣遊艇會補辦生日派對，派對以六十年代嬉皮士為主題，笠住假髮戴頭巾的阿 B，仲拖住家中四條女出來晒冷，嘉賓個個亦打扮貼題。但生日會最終變成鍾氏演唱會，阿 B同阿倫一班好友夾 band唱歌，兩個幼女鍾懿和鍾幗都上台輪流獻唱。
自言六十歲有頭髮有精力的阿 B，會帶仔女遊世界，至於同女友范姜幾時正式結婚？他只話：「今年流年不合。」唔怕范姜等？「老婆愈老愈可愛，佢先係決策人。」
極有表演慾的鍾懿（左）和鍾幗，上台唱歌有板有眼。 
有傳復出拍戲的邱淑貞，當晚以藍色斗篷襯牛仔褲，贏得最佳衣著獎，瓜分了三萬元獎金。 
V字手的曾志偉戴住遮口鼻的假鬚到場，贏唔到最佳衣著，佢話：「獎金事小，俾人笑事大嘛！」
同樣年過花甲的陳欣健，披上豹紋外衣和帽，加埋假髮和黑超，似乞丐多過嬉皮士。 
阿 B原定在上月廿三日正日舉行生日派對，為就好友阿倫才改期，咁大面的阿倫當晚著番自己六、七十年代的舊衫到場，但撞啱入咗酒店又返出嚟影相的吳卓羲阻頭阻勢，惟有無奈合照。 
撰文、攝影︰名人、娛樂組
全站熱搜
留言列表
