美容後Lavinia教各位主人在家中 D.I.Y.寵物美容，唔使下下出街咁麻煩。

Petbook

慳爆！狗狗護理 D.I.Y.

夏季已到，是時候為狗狗換個清新造型，要幫狗狗剪毛沖涼染髮，到寵物美容店每次花費起碼 5、 6百。擁有 10年以上寵物美容經驗的 Lavinia，今次教各位主人如何在家中為狗狗做美容，買齊所有工具 2千左右，做 3、 4次已經回本，慳錢之餘，亦可方便自己時間。

Profile

美容前

Lavinia
擁有 10年以上寵物美容經驗，現於恩寵專業寵物美容教室開班授徒，今年更獲僱員再培訓局頒發最佳導師獎項。

剪指甲篇

Lavinia表示一般人家中地板比較平滑，狗狗的指甲會因為磨擦不到而變長，「如果指甲一直長落去會影響狗狗嘅手指骨生長，會對狗狗隻腳唔健康，所以指甲太長就要剪。」

所需用品：指甲鉗$50

剪指甲要緣邊剪，先剪突出部。

紅圈為可剪部分，紅線以下為血管，小心不要剪到，否則狗狗會受傷流血。

洗白白篇

夏天潮濕，主人每隔 7至 10日同狗狗沖一次涼，「每次最好洗兩遍，第一次洗走身上嘅油脂；沖第二次可令狗狗保持香味。每次沖完涼都要吹乾狗狗啲毛，唔係好易冷親同有可能會生癬。」
如狗狗有蚤，可用滅蚤用沖涼液，「搽晒沖涼液後，要用手巾包住狗身，焗 15分鐘，然後過水，先可殺蚤，要小心狗狗嘅眼耳口鼻接觸到沖涼液，因沖涼液帶有毒性，狗狗食到會中毒。」

所需用品：狗狗沖涼液$130

去蚤沖涼液$150

洗耳篇

狗狗耳朵容易藏污垢， Lavinia建議主人每星期要為狗狗洗兩次耳仔，「好似史納莎、八哥及曲架等狗狗嘅耳仔容易啲發炎，最好洗密啲，每星期 3次。如果狗狗耳朵已經發炎，就要每日洗 1次。」

所需用品：洗耳水$85棉花$20耳鉗$80

首先翻開狗狗的耳朵，並倒洗耳水進去，然後按摩耳朵。

再用耳鉗加棉花把污垢掏出，「之前要喺佢耳洞四周抹下，等佢有心理準備，之後先慢慢挖出污垢。」

剪毛篇

香港夏季氣溫經常維持攝氏三十幾度，幫狗狗剪毛，可避免中暑。 Lavinia說：「可選用電鏟，比鉸剪方便，電鏟有得調校長度，如果你想鏟剩 5mm就較做 5mm， 3mm就校做 3mm，如此類推。記住要剪埋腳板底毛，幫助散熱。」

所需用品： 7吋直剪$400、電鏟$500

剪毛時用手 hold住狗狗個身，不要讓牠亂郁，否則好易剪到一忽忽。「沿住條邊由上而下，弧形咁剪就可剪到波形，要慢慢剪先會夠圓。」

如用電鏟就要用手指公、食指同中指握住。「一般狗狗只要順毛鏟就可以，但有少數狗狗，好似貴婦狗就逆毛鏟，咁先有短嘅效果。」

染毛篇

唔只人可以染髮，狗都可以染毛，夏天來到，為狗狗染上鮮艷顏色，更添活力，「一般染色可以維持 3個月，染髮過程同人差唔多，如果平時有幫自己染開髮會好快上手。由於狗狗多毛，要掌握染全身需要一定技巧，我建議大家幫狗狗染少少，有 highlight效果會更為搶眼同容易。」以下用狗狗尾巴作示範：

所需用品：狗狗用染髮劑$300

保護 cream$300

在尾巴周邊不用染色的毛上搽保護 cream，以防染色劑沾到不必要的地方。

把染色劑倒在容器上，用掃把染色劑塗上，不要塗到毛的底部，否則會傷到狗狗的皮膚。

然後把染色劑用手指捽散。

用錫紙把染色部分包住，等 20分鐘。

然後先沖水，再用沖涼液洗走染色劑，然後再用風筒吹乾。

完成