close

有兒子的，常會被人問到同一個問題：「驚唔驚個仔大個變同性戀？」見到林一峰，我用自己的方式恭維他：「如果個仔第時係你呢種同性戀，我又唔拘喎！」早已出櫃認自己是同志，說光明磊落是爸媽從小教落；要才華有才華、要風格有風格，十年來音樂搞作多多，奠定自己典範港式小清新地位；更有膽量，最近以版權持有人身份出聲出力抗爭《網絡23條》；重點是，開口埋口世上只有，毫無疑問媽媽將是他一世人最愛的唯一一個女人…… 說起媽媽，林一峰含羞答答說要給我看一條媽媽傳給他的短信：「媽咪好少讚我，呢個係上個月我36歲生日前send畀我……哎吔……唔好俾我見到呀，我面紅㗎啦！」

 
林媽媽與林一峰的WhatsApp互動很長很多，林一峰刷呀刷找了很久才找到，內容說道：「你從小到大的認真和專注，每樣事情都做得這麼出色，我曾害怕太多人讚你令你驕傲，也因為對你緊張得過了分，而不敢讚你，心底卻希望終有一天，能讓人知道我有一個非常值得我驕傲、和令我更珍惜自己健康的兒子，希望一直見證你對世界慈愛的胸懷，知道你的好！」已經是母的驕傲，其他人說甚麼想甚麼還重要嗎？

勇過明哥
出道廿五年的黃耀明上月突然在達明一派演唱會尾場向全場宣布：「我鍾意男人，我係基佬！」人人讚好、誇他勇敢，10年前出道時已經公告自己同志身份的林一峰說，亦師亦友的明哥選擇在這個時候出櫃，不只是勇敢而已。「明哥好勁，選擇喺一個好得意嘅timing做呢件事。佢從來冇否認過佢係（同性戀），點解係家呢？我幾覺得關乎最近言論自由嘅社會熱話，佢要以身作則話畀大家聽，你有信念、你要講嘅時候就要出聲。佢喺呢個傳媒做咗25年，唔會唔知公開個後果，佢一樣做咗，不惜犧牲自己個人空間，有邊個夠佢勇？」接受和公開自己的性取向，對大多數人來說，最難坦誠的反而是家人。林一峰說，知子莫若母，從小母親就看在眼裏並且全盤接受，父親則是樣樣聽母親話，老婆話得就得。「我同我屋企關係好好嘅，由細到大父母對我別無他求，淨係想我快快樂樂健康成長。對於我嘅同性戀身份，爸爸冇任何壓力，從來冇抱怨。佢最聽阿媽話，阿媽冇反對，佢咪阿媽話咩佢就聽咩囉。我哋家庭係一個好有大愛嘅家庭，由細到大佢哋已經知我咩人，冇問冇求證，知子莫若母。阿媽成日都喺廚房同我傾偈，切切吓菜彈出嚟一句：「嗰個男仔唔啱你㗎……」我最怕家庭會議，我屋企最好，永遠唔會有家庭會議，唔會畀壓力我。因為咁，因為媽咪好講道理，我一路都好舒服、好坦然面對自己呢個身份，由細到大，我亦冇嗰啲要做乜師物師考份政府工嘅諗法。我可以行到十年，行到呢一步，唔係因為我鍾意男仔定女仔，而係因為我係咩人、做過啲咩貢獻。」

香港精神
出櫃十年，林一峰時常被拍到身邊的男伴轉個不停、又被妹妹林二汶大爆感情生活豐富，男友數目多得可以坐滿博覽館。以前明明向雜誌自稱周遊列國、每年美國、歐洲游走三五個月，係去拍拖。剛滿36歲的林一峰，現在自稱過了戀愛至上階段，還改口說游走為了吸收日月精華：「我好多創作喺旅行時發生，我寫過一句歌詞『人還在心存感激』係冰島嘅旅行感想。冰島天氣無常，搭架飛機來回三次都唔可以降落。好忟之際，諗真啲，真係降落可能連命都冇呢？所有嘢都係安排，我永遠唔覺得喺你身上發生咩事，就可以決定一個人嘅命運同將來，所有嘢都係睇你點睇，我睇緊莊子，佢話畀你聽世事無絕對，睇你點睇。佢講嘅：凡事唔係得一條路行、唔係得一種睇法。我亦鍾意紐約曼哈頓，嗰度每一樣嘢都發生得好快，喺其他地方最唔平常嘅事情，對嗰度嚟講都好平常，每個人都可以好舒服咁做自己，好多騷好多文化嘢發生，每個人去到都可以盡吸收日月精華。」人人都說香港不是個絕佳的創作和生活環境，男朋友仔又個個係外籍，為甚麼不出走他鄉：「主要係因為父母喺度，有爹哋媽咪嘅地方就係家，我永遠都唔會離開。其次，香港呢個地方有辣有唔辣，香港人肯努力就會得到機會得到認同。我呢十年，真係好勤力，大家有眼睇。真係多勞多得，係香港先至咁公平。」

愛情冇計
事業大計多多，又因為全力捍衞二次創作自由搞到心煩意亂，上週切親手指尾搞到上港聞，36歲的林一峰果然不再愛情至上，自稱常常冷落男友，是個自私自利的另一半。「我啱啱送咗個相展畀自己36歲生日，還咗我由細到大一個心願。下一件事，係出一隻翻唱小鳳姐歌嘅碟。小鳳姐首〈雙城記〉寫於80年代尾，當時全香港金碧輝煌，突然間有首咁滄桑嘅歌出現，我覺得好勁。喺呢個時候寫首咁嘅歌好了不起、好劃時代。小鳳姐嘅歌永遠擺喺任何時代都有生存智慧。作為創作人，當然想有一首劃時代金曲，但係我都好好彩，正係嗰個時代、有兩首〈The Best Is Yet To Come〉和〈遇見〉好切合人心嘅歌，我要養家，公司人少啫，都仲要養公司班人㗎，呢兩首歌令到我做其他嘢時舒服得多，呢樣嘢我真係要長期感恩……」忙到咁，男友呢：「我太投入工作、為對方做嘅好少，我真心攞24小時嚟做嘢，另一半，可能幾個星期前約咗食飯都唔記得。做人有得必有失，我選擇攞我嘅時間去做天賦嘅嘢，結果係可以影響到更多人嘅。感情生活，暫時ok，健康快樂。我咁多年嘅感情體驗，冇嘢係你㗎，瞓覺時就算身邊有人，入睡都係一個人瞓咋……有啲人，成日話自己遇到人渣，我就冇啦， it's takes 2， tango唔係一個人跳，唔好畀機會對方做人渣啦。唔好期望對方為自己做啲乜，淨係問自己，你可以付出幾多先？」

 

媽媽請你輕鬆吓
（曲詞：林一峰） 要我吃飽 要我穿得暖叫我去街 過馬路小心點重複的說 重複的說囉嗦也很溫暖 有餸有湯 有愛心梳化教我有膽 有困難不必怕我好聽教 我好聽教媽媽你聽住喇 我會吃 我會笑我會常歸家我會記得休息 放假就輕鬆吓摺摺被 洗洗衫我又學插花好好打理一個家媽媽請你輕鬆吓

第一次
林一峰堅稱，雖然是創作歌手，從未寫過歌畀另一半，一世人第一次，是今年母親節，寫了一首歌給媽媽。左邊，是林媽媽的短訊；右邊，是林一峰的新歌，一個字講晒，冧！ ####

 


上週一，一心應節孝敬母親自製乾果的林一峰，入廚時不慎切傷手指尾入院。


年年都會用三五個月四處遊歷，林一峰以前說是為拍拖，最近改口風說是獨自上路。


上月36歲生日，林一峰為自己開相展：「所有相賣晒，真係自己最好嘅生日禮物。」


與妹妹林二汶感情要好，又做同一行，林一峰說媽媽的讚賞短訊唔敢招搖：「驚阿妹妒忌呀！」


目前與男友感情，林一峰說健康快樂，不過死口唔認是曾被拍過的外籍猛男。《忽然1周》圖片


感情生活精采的林一峰，曾被拍到與多年同居外籍男友齊齊外出乾洗，二人07年分手。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄