每次使用液態氮製作雪糕，都會產生出大量煙霧，猶如科學實驗一般， Ronnie當初就是被這效果吸引，興起創業念頭。 

創業通

煙霧瀰漫　分子雪糕新奇吸客

創業有時只是一個念頭， Ronnie在英國試過一杯分子雪糕後，便與女朋友日夜在家研究用液態氮製作雪糕，在 12年回港開設首間 Lab Made分子雪糕專門店，開店首月已達至收支平衡。除了製作方法夠新奇外， Ronnie為了保持水準和研發新口味，自設中央工場，全店更以實驗室為裝修主題，製作雪糕時煙霧瀰漫，帶給客人新鮮感，並一再回頭光顧，每月盈利約有 5萬。

採訪當日，店外店內聚滿客人， Ronnie說︰「雖然煙霧效果會引起客人好奇心，但保持質素先係留客之道。」 

採訪當日是下午 5點，記者去到位於大坑的 Lab Made，店內已站滿了客人，每當員工製作雪糕時，便會出現大量煙霧，白色煙霧更會蔓延到店外，就像一場表演，吸引不少客人拿起手機狂拍。
「一般雪糕由雪糕漿凝固成雪糕，要用 15至 30分鐘，而我哋採用-196度嘅液態氮整雪糕，佢無色無味無害，可以喺 30秒內將雪糕漿凝固，令水分子冇時間結成大冰粒，分子雪糕入口比一般雪糕更加幼滑。」 Lab Made售賣全港獨家的分子雪糕，創辦人 Ronnie正與客人解釋用液態氮整分子雪糕的原理。
在 menu上，分子雪糕的口味十分獨特，如凍檸賓乳酪、海鹽焦糖配朱古力薯片及蜂蜜杏仁乳酪等，每杯售價$39至$44。記者試了海鹽焦糖配朱古力薯片味雪糕，口感與普通雪糕無異，更加滑之餘，奶味亦冇咁重，食得出海鹽、焦糖及朱古力等味道，口味十分新奇。
Ronnie笑說：「我哋每日賣 4款口味，每兩個星期會換一次，希望保持新鮮感，今期仲有母親節限定嘅荔枝玫瑰乳酪，每款口味嘅雪糕漿都係由我哋工場整，喺其他地方試唔到。」 Lab Made現時平均日賣 200杯分子雪糕，假日高峰更可賣到 400杯，客人以學生及 OL為主，每月約有 5萬盈利。

英國讀書成創業路

Lab Made於上年 7月開業，創辦人 Ronnie只有 27歲，他的創業路原來有段古。 15歲時讀書不成，被家人送去英國讀書，怎料成績突飛猛進，考入曼徹斯特大學修讀藥劑學，成為正式的藥劑師，月入愈 4萬港元，並認識了同是藥劑師的現任女友 Jenny，可謂事業愛情兩得意，但一次意外的倫敦之旅驅使他回港創業。
「有次同女朋友想返香港旅行，去到倫敦先發覺買錯機票，要滯留喺嗰度，於是改咗行程，喺倫敦搵朋友玩番幾日，朋友帶咗我哋去試一款用液態氮整嘅分子雪糕，見佢整嗰陣出晒煙，味道又唔錯，覺得好新奇，就興起研究嘅諗法，其實我好想返香港發展，見香港冇人賣分子雪糕，就想試吓返香港搞。」
決定創業， Ronnie和 Jenny開始嘗試製作分子雪糕，「我同 Jenny買咗缸液態氮返屋企，每日放工就去研究點整，將啲雪糕漿凝固成雪糕唔難，難在啲味道好難調校，唔係樣樣材料都夾到，好似試過將朱古力奶加忌廉，整出嚟又硬又難食，用咗半年時間試到十幾款味道，就決定返嚟開鋪。」

設中央工場保質素

客人 Serene之前朋友介紹試我嚟試，覺得好好食，雪糕味道好特別，𠵱家不時會過嚟再食，其中流沙奶黃包係我最鍾意嘅味道。 

回港後， Ronnie和 Jenny將多年儲蓄用來創業，斥資百萬開設工場及雪糕店，「想發大嚟搞，諗住第時會開分店，中央工場嚟調校唔同口味嘅雪糕漿，及研發新材料加入雪糕漿，好似將海鹽焦糖朱古力調好嘅雪糕漿，再運去店鋪，味道就可以統一，唔會俾人覺得店與店之間有分別，同時又容易控制水準。工場由 Jenny負責，其實香港嘅租金都好貴，有 3分 1成本用咗喺租金度。」
液態氮是分子雪糕店的賣點，但同讓令 Ronnie煩惱不已，「液態氮喺香港屬於第二類危險品，受政府規管，又冇人試過用佢嚟整雪糕，最初政府認為唔開得，之後我各個部門去問，好似食環署、消防處等，拉鋸咗成年，研究過啲條例，又發現唔到有犯法嘅地方，最終都畀我哋傾掂咗。」
另一難處就是找地方開鋪，「液態氮要由專車運送，部車好大部，窄嘅街泊唔到，支液態氮百幾公斤重，有石級或者樓梯都唔方便搬運，香港好多地方已經唔得，大坑咁啱配合到，加上附近多食肆，好多人食完飯會食甜品，於是決定喺度開業。」

實驗室做主題吸客

開業初期，制服、 logo、鋪頭設計完全由 Ronnie與 Jenny一手包辦，「我哋想用實驗室做主題，員工嘅制服係模仿實驗袍；開放式嘅廚房設計，想畀客人睇到雪糕嘅製造過程，除咗畀到人有做緊科學實驗嘅感覺，都會有新鮮感。」
Lab Made開業首月已達至收支平衡，令 Ronnie感到驚喜，「未開鋪前，我哋有諗過要捱一排，但估唔到鋪頭開業前幾日，已經有傳媒上門約訪問，開業後即吸引到好多人嚟食，變相幫我哋宣傳。但我哋啲材料雪糕漿製作唔切，試過星期五已將六、日嘅貨賣晒，我哋惟有唔做生意，同請多啲人幫手，𠵱家工場加埋鋪頭有成 10個員工幫手。」
除了新鮮感，讓 Lab Made持續受到客人追捧還是要靠質素，「初頭客人可能會俾白色煙霧吸引嚟試吓，但唔好食嘅話冇人會再嚟，質素變得好重要，我會不時試味，睇吓水準有冇差到，而 Jenny就研發新嘅口味。」

上年置地廣場邀請 Lab Made合作，舉辦聖誕節活動，兩個半小時內就派出 6百多杯雪糕， Ronnie笑說︰「唔少人都話好好食，多咗人認識到我哋。」 

Ronnie每天都要從氣瓶中取出液態氮，放入特製的儲蓄器內，方便職員使用。 

接公司客變相宣傳

說到宣傳方面， Ronnie說自己出力並不多，「經傳媒大幅報道後，令唔少人注意到我哋，好似 Landmark、連卡佛及 adidas等公司主動搵我哋合作，叫我哋去搞活動嘅場地派雪糕。本身我哋冇諗過可以咁樣做宣傳，接呢啲 event我哋冇咩錢賺，當可以畀多啲人認識到我哋。」
以為 Ronnie會乘勢急速擴張，他卻說要穩步發展，「唔少人搵過我哋傾合作同做特許經營，但我哋唔想發展得太快，暫時都唔會考慮住，𠵱家嘅成績已經好過預期。希望可以喺年底開第二間分店，最理想嘅位置喺尖沙咀，因為好多遊客，𠵱家仲物色緊鋪頭。」

Ronnie與女朋友 Jenny一同開設 Lab Made，男主外女主內，分工明確。 

話明店面工夫由 Ronnie負責，少不免要搬運貨物。 

15秒製作分子雪糕

將預先製好的雪糕漿倒入器皿。 

再將液態氮倒入雪糕漿內，同時經雪糕攪拌機高速攪拌。 

約 15至 30秒後，雪糕漿就會凝固成雪糕，可供客人享用。

海鹽焦糖配朱古力薯片$44味道較濃，帶有少少鹹味，配上還脆口的薯片，衝擊感十足。 

母親節限定：荔枝玫瑰乳酪配士多啤梨$44食落味道清新，淡淡玫瑰味，內有口感十足的士多啤梨粒，可說是炎夏之選。 

開業成本
租金︰$360,000(3按 1上)
裝修︰$300,000
設備︰$400,000
總投資︰$1,060,000

每月收支
租金︰$90,000
人工︰$110,000(兩位老闆+10位員工)
雜費︰約$80,000
營業額︰約$330,000
盈利︰約$50,000

Lab Made
地址︰大坑布朗街 6號地下
facebook： LabMade

咩叫分子料理？

近年歐美國家流行分子料理，分子雪糕是分子料理的一種，其實分子料理、分子廚藝及分子食物等用語都是譯自 Molecular gastronomy這個詞彙，本是一門科學，是一名法國科學家對不同的烹飪食物方法作出研究，目的是找出如何令食物更加美味。 Ronnie解釋：「後嚟有廚師開始採用呢啲理論嚟整嘢食，採用呢個理論煮嘅食物都叫做分子料理，好似將固體食材變成液體或者氣體、將一款食材嘅樣同味變咗做另一款食材，或者用其他方法去烹調，好似由牛肉整成嘅蛋，由液態氮整雪糕會比傳統方法更加幼滑等。」

撰文：曾志恒
攝影：崔百祥
部分圖片由被訪者提供