新車激試

陸上巨無霸　 M-Benz GL500& Audi Q7 3.0 TDI

好多人買車都以大行先，車身夠大先顯出派頭，車廂夠大先坐得舒服，所以 SUV車種愈出愈大，都係為咗滿足呢個心理。講到最多人捧場嘅大 size歐洲 SUV，一定係 Audi Q7！車身長超過 5m，仲要 7座位設定，唔係部部歐洲 SUV可比！
M-Benz貴為 SUV元祖級車廠，點可能放過佢，最近推出第 2代 GL500，車身 size比 Q7更長、更高，車內設備仲一次過豪到盡，擺到明搶 Q7客！今次就搵咗位 Q7車主 Peter出嚟試下部 GL500，睇睇吸唔吸引到佢。

M-Benz GL500

Spec.
引擎： 4,663c.c. V8 Bi-Turbo
馬力： 435hp/5,250rpm
扭力： 71.4kgm/1,800-3,500rpm
驅動：前置引擎、四輪驅動
傳動： 7前速自動波
懸掛：前、後多連桿
制動：前鑽孔透氣碟、後透氣碟
車身： 5,120× 1,934× 1,850mm（長×闊×高）
車重： 2,445kg
售價：$1,384,000起
查詢：仁孚行（ 2895 7288）

Audi Q7 3.0 TDI

Spec.
引擎： 2,967c.c.柴油 V6 Turbo
馬力： 240bhp/4,000-4,400rpm
扭力： 56.1kgm/2,000-2,250rpm
驅動：前置引擎、四輪驅動
傳動： 6前速自動波
懸掛：前、後雙搖臂
制動：前、後透氣碟
車身： 5,089× 1,983× 1,737mm（長×闊×高）
車重： 2,345kg
售價：$851,000起
查詢：合迪汽車（ 2528 1862）

Q7車主 Peter 

有多年揸車經驗嘅 Q7車主 Peter，揀車當然眼光獨到，佢部 Q7係油渣版本，有巨大扭力之餘，又有電油版豪華車廂。「其實 Q7車廂對比 GL500較為平民化，以實用行先， GL500豪華好多。」講真 Q7真係一啲都唔平民，只不過 GL500太豪啫！十足陸上行宮咁！

「外表上都唔算好大，只要揸過就知」

第 2代 GL外表上同第 1代唔算有極大分別，可能因為去到呢個 size嘅車，既要保留上代特色，又要保持 7座位格局，好難再大改。所以新一代集中改頭燈款式同車身線條，比上代更多直線位，同 Peter部 Q7圓渾線條有好大對比。新一代車身長度加至 5,120mm，比 Q7長 31mm，而且高度都創新高，達到 1,850mm，買車前真係要諗諗自家車場入唔入到。筆者就覺得 GL500身形巨大無比， Peter又點睇？「我覺得佢外表上都唔算好大，只要揸過就知，其實睇位都好易，唔係想像中咁難。」筆者以為 Peter有豐富揸大車經驗就梗係咁講，原來係有原因。

車尾都加咗大量電鍍裝飾。 

車頭防撞板由電鍍裝飾造成，點捨得用嚟爬山？ 

7座歐洲 SUV之選

SUV熱潮由 M-Benz ML帶起，至今十幾年都未退減，而且成為唔少車廠嘅金蛋。 7座位 SUV原本只係臨時性載多兩個人，就好似以前啲旅行車咁，可以喺尾廂加多兩個位畀小朋友坐咁。現時市面上 7座歐洲 SUV唔多，有啲係原裝 7個位，有啲要加錢先有。

北歐家庭男 Volvo XC90（車價：$539,800起）
可能北歐人真係特別熱愛家庭車，所以好似 Volvo咁，啲旅行車、 SUV特別好賣，而且 XC90原裝已係 7座位設計。 XC90車身比 GL500細一個碼，要坐 7個人當然比較辛苦，第三排空間好似小型 7人車咁，小朋友就啱坐，大人就窄咗啲，不過勝在可以靈活收藏，唔會太阻空間。

10萬加兩個位 BMW X5（車價：$678,000起）
或者好多人都以為 BMW X5係 5座位設定，但其實廠方係有提供加位 option，據代理表示入門版 X5只賣$678,000起，但加咗後座之後，車價可能達到$778,000，即係貴咗 10萬，唔係咁受歡迎。再者 X5車身唔夠大，後座一定好迫，精明香港人實識揀。

「泊車 TV又幾好用，效果全面」

巨大車身為 GL500帶嚟一定霸氣，起碼筆者試車時見小路啲 van仔、的士都唔敢亂衝出嚟！不過當去到泊車時，唔係對自己冇信心，只不過 GL500大到剛剛入到車位，非一般初次駕駛者可以一手泊入。「車身大係會影響到泊車，不過 GL500套泊車 TV又幾好用，效果全面，設有全車四面圖像，感覺好安全。」
Peter口中所講呢套泊車系統其實都唔係新鮮嘢，早兩、三年前開始出現喺日本車上，不過用喺 GL500咁大部車上面功效更明顯，不單可以泊車時睇四周，仲可以組成前或後 180度鏡頭，呢啲大風大雨日子泊車有佢最穩陣。

分割畫面可以睇得更加清楚。 

180°前、後視鏡，可以睇到車頭，車尾極 wide景觀。 

「車廂布置豪華，用料好高檔」

Peter話 Q7車廂比 GL500平民化，原因唔難理解，因為 GL500車廂設計大致取材自 ML，由真皮至木料都已用上極之高規格設計，唔少仲未出現過喺其他車上。「一坐入車廂就覺得 GL500車廂布置豪華，用料好高檔，而且車頂稍高，頭部空間感覺寬敞啲。」 7座位採用 2＋ 3＋ 2布局，中、後排都有一按式摺合功能，而後排更可以按掣還原位置，中排嘛？筆者會懷疑一個女性冇可能將佢還原，筆者大男人一個都要用一定氣力先可以撳低座位還原。

GL500 

Q7GL500車廂明顯比 Q7豪華，用大量木料及真皮裝飾。 

兩圈筒式表板同 ML同出一轍。

電動後排可以喺門邊操作開合。 

中排按掣後合摺成呢個樣，但還原就要好用力先可以返回原位。 

「整體駕駛舒適，好似揸房車一樣」

Q7嘅前、中排其實已經有唔錯舒適性，不過 GL500更勝一籌。受惠達 3,075mm軸距，車廠成功將三排座位平均分布空間，最難搞嘅第三排都有 988mm垂直空間，加埋每一排都有天窗，令空間感大大增加。上文提到嘅電動摺合中、後排，可以連貫成 2,300L平地台儲物空間，成部單車可以唔拆轆直入！「兩部車車廂布局差不多， GL500整體駕駛舒適，好似揸房車一樣。」 Peter有咁嘅感覺唔出奇，因為 GL500全車座位都比較厚身，對震盪及噪音過濾能力都比 Q7好，筆者甚至覺得佢達到 S-Class水平。

Q7 

GL500GL500後排頭部空間比 Q7好得多。 

Q7

GL500GL500中排用料較 Q7厚，但舒適性差唔多。 

Q7 

GL500GL500前座極盡豪華，包上白色邊之餘，仲有按摩功能。

全新設計車身，有更硬朗線條，同 Q7大大不同。 

3個天窗可以令車內空間感倍增。 

「踩落油門感覺力度源源不絕，唔似揸大車」

Peter部油渣 Q7車重 2,345kg，配 240匹馬力、 56.1kgm扭力引擎，其實已經有好好起步加速表現，但 GL500嘅引擎同 Q7唔啱班，用咗 4,663c.c.雙 Turbo電油引擎，馬力達到 435匹，扭力去到 71.4kgm，雖然車重有成 2,445kg，但一踩油門就應聲起步，完全冇因為車重而稍作遲緩。「我只係試咗一段路，已經發覺踩落油門感覺力度源源不絕，唔似揸大車。」 GL500之所以有咁快又順嘅加速，引擎之外 7速波箱都有好大功勞，用家仲可以喺軚盤操作加減模式。
作為一部四驅 SUV， GL500已裝上多項有利進出崎嶇路面嘅系統，如「 4ETS」可調節個別車轆輸出，有助脫險，而「 DSR」就可以喺落斜時發揮作用，牽引落山車速。此外， SUV要喺 on/off road間取得平衡，懸掛都非常重要，所以原廠已有電子升降同軟硬調節，真係動靜皆宜。

面對 GL500， Q7呢個巨無霸都要認第二。 

中、尾段加速力深不可測，呢啲就係 V8嘅魔力。 

設有「 ECO」（紅圈）停車自動熄匙系統，唔再一味倒水耗油。

多項行車系統全歸納喺手枕上，遇上崎嶇路面即可使用。 

引擎力大無窮，低轉扭力比油渣 Q7更勁。 

7速自動波採用軚波設計，而且可用軚盤操作+/-系統。

GL500車身唔大之餘，仲舒服到好似豪華房車一樣。 

高速公路巡航可調低車高，令行車更穩定。 

撰文：袁國基
攝影：黃家活