Hilda愛在廚房烹調食物，笑言不怕油煙味。 

青雲路

靚女媒體廚師 梁雅琳 煮出另類星途

5年前， 20歲的 Hilda（梁雅琳）在選美台上，說出她的志願是推廣健康飲食文化，這些不是空談，雖然港姐落選，但 3年後，她走進廚房，做盡洗碗打雜等工夫，終練得一手好廚藝，獲得不同品牌、機構賞識，設計新菜式，兼為報章、雜誌寫專欄，又參與電視飲食節目等，成為新晉的 media chef（媒體廚師），在鏡頭前，呈現一個個獨特菜式，成就她的夢想。

Hilda於 08年曾參加港姐選舉，雖然落選，但轉做媒體廚師，也是一個不錯的出路。 

「係喇，望一望鏡頭， hold住呢個甫士……」跟 Hilda拍照，她一邊烹調雞翼，一邊神態從容地望向鏡頭，在個多小時拍攝過程中，一直面帶微笑，又懂得把食物傾斜來遷就鏡頭，非常專業，全因 Hilda的工作就是 media chef。
「我主要工作要替唔同品牌，例如惠康、雀巢、一斤果醋等，幫佢哋嘅新產品設計 recipes，或者用客戶嘅廚具去煮餸，同埋為報章、雜誌做示範、寫專欄等。除咗要構思菜式，我亦要幫佢哋影相同拍片，所以慣咗面對鏡頭。」
去年 Hilda更獲 TVB邀請拍飲食節目《靚人靚湯》，在 15集節目中，每集教觀眾煲一款湯水。「 TVB搵我拍，想我教吓 OL呢類觀眾煲湯，因為佢哋冇時間煮嘢食，但又想飲啖湯，要教一啲 10至 15分鐘就完成嘅湯。」於是 Hilda便在節目中教滾湯，想到滾湯一般只聯想到節瓜鹹蛋，但她卻想到鹹魚洋葱湯、咖喱牛肉湯等，「我好鍾意 flavor matching，即係將唔同食材拼配，唔會有框框，好似鹹魚好下火，同洋葱味道好夾，點解唔可以一齊煮？」

強項搭配新款菜式

Hilda坦言自己對味覺記憶力較強，吃一道菜式，可以分辨到裏面用了什麼食材，因此在構思新菜式時，已經可以在腦裏配搭味道，然後才試做，如臭豆腐蒸肉餅、叉燒腐乳曲奇等，令人訝異。「當然每次推出新菜式，我要自己試味，再搵親友試，不過有時都會受到打擊，試過有客人未試味，淨係聽個名已經話唔 ok，例如用臭豆腐煮餸，不過我唔會灰心，會想辦法令佢哋改觀，會試吓解釋，但如果客人好堅持，我都會尊重大家有唔同口味，試吓改動菜式。」
Hilda入行年多，其間工作不斷，除了因為廚藝出色，相信靚樣也是原因之一。看到 Hilda，也許會覺得眼熟，除因為電視節目外，原來她曾在 08年參選港姐，更打入 5強，「嗰時喺外國讀書，因為屋企人想我試吓，我就去咗選美。」
骨子裏，她卻最愛烹飪，小時候父母經營酒樓，經常有得試菜，後來到加拿大讀大學，便常看菜譜，興趣愈來愈濃，選美後回加拿大完成學業，終下決心從事烹飪，不停參加廚藝課程，中、西菜、麵包等全部學勻，還到澳洲、泰國、內地等跟師傅學廚。

越式菠蘿青瓜沙律Hilda指靈感來自越南菜，青瓜、菠蘿配搭原味乳酪，健康又清新，加上椰絲、花生碎和辣椒粉，令口感更豐富。 

惹味焗果醬雞翼Hilda愛酸酸甜甜的菜式，雞翼先醃製一晚，再用 19℃焗 1小時至熟透，吃前加入果醬煮勻，味道開胃惹味。

陳皮臭豆腐肉餅把陳皮和臭豆腐跟肉餅混合，難得味道很夾，香濃又有層次感。

面試助理輸給嬸嬸

靚女有助工作，但也會成為障礙， Hilda為得到更多工作經驗，到不同餐廳食肆應徵不同崗位，連打雜都做，與一大班嬸嬸面試較量，卻反而輸蝕。「記得有次我去某大集團應徵做廚務助理，求職嘅全部係嬸嬸，人事部職員好奇怪，問我係咪應徵文職？好多人都會覺得我唔係認真，覺得我捱唔到苦，但其實我真係有心去做。」
應徵經常碰釘，沒有獲聘。 10年，幸而也有西式餐廳肯聘請她，「最初都係叫我做樓面，我成日望住個廚房，好恨入去做。」有時連清潔洗碗也要做，但 Hilda毫無怨言，「我唔覺得洗碗係低下工作，洗碗好講求時間管理，尤其係繁忙時間，要好講效率，唔係想像中咁簡單。」

Hilda大學畢業回港後修讀不同的烹飪課程，以提升廚藝。圖為她學造麵包時與老師合照。 

Hilda偶爾會開班教煮餸，喜愛小朋友的她，笑言最愛親子班。 

試過一日兼兩份工

Hilda主力為不同品牌如惠康設計食譜及示範菜式，經常要出席 event、影相及拍片。 

後來廚師見 Hilda滿腔熱誠，終肯讓她進廚房工作，而 Hilda為求用最短時間，學習最多的東西，她曾身兼兩職，早上到三文治店兼職，下午再到咖啡店沖咖啡，每日工作十多小時，「我唔覺得辛苦喎，有啲人打一份工，都返足十幾個鐘。」
同時 Hilda又會 keep住寫食譜和拍片放上網，與人分享製作心得，在網上薄有名氣。在 11年，經朋友介紹下，替飲食雜誌《煮飯仔》寫專欄，開啟了她的 media chef之路，有了知名度，開始有媒體找她做訪問，又有品牌找她設計菜式，拍攝《靚人靚湯》節目後，更是人氣急升，去年她又推出書本《品味靚湯》，教人煲養顏湯。
講咁多湯水，以為她最愛煲湯？「好多人以為我鍾意整甜品或煲湯，其實我鍾意煮菜式，父母都有問我唔怕油煙咩？可能我真係太鍾意喇，所以一啲都唔介意。」

閒時教烹飪興趣班

Hilda喜愛 media chef的工作，因可以把菜式與數十萬觀眾分享，但閒時她又會走進廚房，接一些私人派對工作及開興趣班，教人烹飪。「兩者工作好大分別，喺鏡頭前煮餸，要就角度，同執靚碟餸；入廚房煮餸，可以直接畀客人食，睇到佢哋最真實嘅反應，同樣都有滿足感。」
Hilda的工作很浮動，每單工作由數千至數萬元不等，視乎複雜程度，如出席 event便屬簡單工作，而為品牌設計食譜及要進行拍攝，便要過萬收費，現時月入過萬，雖然收入不穩，不過已婚的她，工作純為興趣，「未來我都會繼續朝呢條路前進，亦好想開一間屬於自己嘅餐廳，可以畀更多人試到我嘅菜式。」
雖然當年港姐大熱倒灶，但如今以廚師身份站在鏡頭前，也開張了她的另類星途。

Hilda去年推出《品味靚湯》食譜，教讀者煮養顏湯水，圖為書內介紹的毛豆杏仁排骨湯。 


嘉出版負責人邵寧子我覺得 Hilda做嘅菜式好特別，咩食材都可以配搭，所以我哋專登搵佢寫專欄同出書，反應都好好。

點入行？

以前講起電視節目教煮餸，只會想到方太，但近年愈來愈多年輕廚師出鏡，要成為 media chef，除了廚藝和外形俱備外，也可以想辦法提升知名度，吸引其他機構、品牌接洽工作，像美女廚神 Kit和 Hilda等，在入行前，都愛在網上寫食譜， Hilda表示：「我以前都鍾意喺網上寫食譜，放上 blog，又會自拍一啲烹飪過程嘅短片，無論成功定失敗，都可以同人分享，當時純粹係想同人 share吓感受，不過呢啲方法，都可以累積到經驗同人氣，對未來工作會有幫助。」
不少雜誌、報章和網站，也會邀請廚師或食家寫專欄，或做菜式示範，有時也會找網上人氣 blogger，所以有興趣入行者，可以從網上示範做起，也可嘗試自薦，甚至自資出飲食書，讓更多人認識自己。

後記：親子食譜

眼前的 Hilda手腳纖瘦，動作輕盈，不知情的攝影師在訪問過程中，完全沒察覺，她已懷孕 7個月，「我早排唔知有咗 BB，仲去咗學中廚，學點拋鑊，學咗成 2個月，雖然好辛苦，不過又好開心。」現在 Hilda仍然投入工作，朝早跟記者做了 3個鐘訪問，只吃了件三文治，下午又做另一個訪問， BB未出世，已想好下年出親子食譜，「我原本今年書展會出新書，𠵱家要暫停，或者等下年可能出親子食譜，教吓點整嘢畀小朋友食。」 BB將來必定很有口福。

撰文：洪芳俠
攝影：傅新發　
部分圖片由被訪者提供
場地提供：煮飯仔 Cooking Studio