Webber

石磊明Lou記 style

拍片永遠木口木面、靠上 YouTube大玩 iPhone 5、 6、 7代 gag片而為人認識嘅 Lou記，之後仲上埋《蘋果日報》頭版，係香港最早期兼數一數二嘅 YouTuber，好多作品都俾人狂 like同瘋傳過！之不過， YouTube係唔會有受歡迎方程式，甚至連佢自己都話 viewer嘅喜好冇得計算，想一直保持網絡知名度，就要搵 partner壯大自己嘅力量。所以佢就加入「香港互聯網創作及藝人協會」，但最重要仲係發掘出自己嘅 style！

Webber's profile

原名：石磊明（ Louis）
職業：財經雜誌行政人員
拍片資歷： 3年
作品總數： 57個
總 hit rate： 650萬次
Subscribers： 34,000人

拍片時估唔估到邊條片會 hit？

《 Lou記 Style》上載 7個幾月， hit rate超過 94萬，絕非個個 YouTuber都有咁好成績。 

完全估唔到！我有好多片拍嗰陣諗住會爆，自己覺得好好笑，但出到嚟唔得囉！相反，有時求其拍條，又可能好多人睇。老實講，我個人啲片不嬲唔會喺製作上好花巧，但多謝我啲 fans，佢哋已經接受我啲片一定係低成本製作，一定唔會有剪接、配樂之類。我都試過喺製作上玩花臣，點知出嚟反而多負面 comments，真係估唔到，或者製作簡單就係大家鍾意嘅 Lou記 style。

YouTube整體點擊率係咪跌緊？

雖然 YouTube整體點擊率下降，但 Lou記絕大部分片上載初期都打得入觀看次數榜， like嘅數目仲持續高企，唔容易㗎！ 

其實我哋研究過，現時 YouTube整體 hit rate確係下降得幾嚴重，唔似幾年前求其擺段片上去都好多人睇。咁係因為香港已出現咗好多 YouTuber，有啲 viewer已睇到厭厭哋，開始揀片睇，我相信一定要有突破先多人睇，可能條橋要爆，或者製作要好認真！

PSY個新 MV郁啲就有接近 3億 hit rate，有陰謀論話係篤數，你信唔信？

〈 Gentleman〉發表唔夠 1個月， hit rate就接近 3億，但今次 dislike人數多咗，有成 38萬。 

〈 Gangnam Style〉全世界咁多人睇，跟住隻〈 Gentleman〉有番咁上下 feedback係好正常，就算好多人 dislike，啲人都會 click入去睇吓係咪真係咁差，所以我唔信篤數。不過我知大陸真係有畀錢買 hit rate嘅情況，所以如果大陸有 YouTube睇都幾麻煩，而我亦相信韓國真係會有 YouTuber篤數。

點解會加入
「香港互聯網創作及藝人協會」？

Lou記有成幾百萬 hit rate嘅片，就只係喺佢上環幾十呎 office入面，用 lunch時間拍出嚟。仲要就咁放部 iPhone上枱就拍，製作極之簡單，但 viewers就係 like佢咁樣搞 gag。 

兩年前 YouTuber風氣仲未好熱，我同 Ming仔、 Eminleo、 Hay Wong、窮飛龍 5個 YouTuber，因為呢個會嘅會長招募我哋，所以就成為最先一批會員。我哋想有個組織做 backup互相幫忙，譬如有啲人好叻拍攝、有啲人剪片叻，我哋就可以分享強項，令啲片更專業。好似我個人最高 hit rate嘅《 Lou記 Style》，𠵱家有 90幾萬 views，最大功勞係窮飛龍嘅詞講到當時好 hit嘅 topic。呢兩年陸續有其他 YouTuber加入個會，𠵱家有 10幾個核心成員。

Webber

每星期專訪一位網絡紅人，每星期展示一種網絡力量。

撰文：陳兆奇
攝影：彭自維