楊思琦去年二月在美國秘密誕下女兒楊卓穎後，由港姐冠軍淪為單親媽咪，鑑於女兒最近入讀playgroup，連計供樓開支，經濟壓力可想而知。

為了孭起頭家，思琦除了密密到國內登台賺人仔外，最近更轉戰舞台劇，要着泳衣晒身材之餘，又要兼顧唱歌跳舞；加上同時主持美食節目，幾乎忙到冇得瞓，連榮升媽咪後首個母親節亦要開工，無奈地「要錢唔要囡」！

縱然由思琦妹變思琦媽，但擘一字馬時得心應手，話落就落，柔軟度十足。

角色百變

剛赴澳門拍完《May姐有請》的楊思琦，趁空檔先到中山出席樓盤活動賺人仔，上周三（1日）返港後，即馬不停蹄為後日公演的音樂劇《山水又相逢》綵排。雖然已為人母，但思琦的體力及童顏依舊，邊唱邊跳兩小時仍面不紅、氣不喘，又忍痛拿衣夾夾鼻，更即席表演一字馬晒柔軟度，果然犀利。

劇情講述思琦與黃宇詩為爭上位及男人，由好姊妹變仇人，思琦說：「我哋要由十六歲演到六十歲，後生同阿婆嘅造型互相穿插，喺台上冇得休息o架！」為了開闢財路賺奶粉錢，思琦不介意性感上陣，反串扮《卡門》造型兼化大戲裝已屬小兒科，更自爆要以泳裝上陣：「粵語片年代啲泳衣好保守，只係平腳褲啫。」不過，其體態如此輕盈，就算着三點式亦絕不失禮！

為保靚聲，思琦每次綵排均自備暖水及喉糖。

暖水護聲

除了性感外，思琦亦為連場歌舞：「要扮男仔啲老牛聲好辛苦，練咗幾星期已經喉嚨痛，所以每日綵排都帶備暖水同喉糖，仲戴埋護膝免撞瘀。」但最令她心痛的卻是冇時間湊囡：「呢個月晚晚排到深夜，第二朝又要錄影，返到屋企個囡一係瞓咗，一係未醒，真係掛死我，好彩電話有囡囡啲相，望梅止渴。」

至於榮升媽咪後的首個母親節，思琦則要在台板上度過，她賣口乖說：「做舞台劇過節仲難忘啦，雖然阿囡未夠六歲唔入得嚟捧場，媽咪又要幫手湊住，咪夜晚再慶祝囉！」縱然為錢大小通吃，但思琦始終要獨力供樓兼養B，亦捨得使錢買英文教材、報play group催谷卓穎，難怪她多次明言恨拍劇：「演舞台劇學識執生，可以幫助演戲，希望TVB嘅監製記得我，幫囡囡搵多啲奶粉錢。」可見單親媽咪的經濟壓力絕不少！

劇情講述思琦與宇詩極怕臭豆腐味，只好忍痛拿衣夾夾鼻，認真敬業。

除了在舞台劇會性感演出外，思琦更會嘗試反串扮男人，演出《卡門》。