Geek友講場

齊換耳機　夏日樂 style

踏入 5月，雖然係考試季節，但亦意味暑假又就快到，話晒有個悠長假期同班 friend出街、開 P、去 camp，隨時隨地都要有靚歌伴隨，點可以冇個新形象襯番先？無論你係型人、品質向、慳家王定係運動達人，各大耳筒、耳機品牌已經狂推新款，畀你襯番自家 style。仲未諗好邊款？即睇介紹！

潮味至上 SOL REPUBLIC× tokidoki

提起 tokidoki，一定諗起佢哋勁 colourful嘅設計，同粗線條公仔，街頭味十足。睇落似足日本 figure，之但係佢原來係出自意大利設計師手筆，夠晒奇特！今次仲踩過界，同耳筒品牌 SOL REPUBLIC搞 crossover，出嘅耳筒又係夠晒奇特，成個耳罩可以拆出嚟，而耳帶就十足頭箍。單睇樣呢款 SOL REPUBLIC× tokidoki已經潮味十足，再試埋聲亦滿足樂迷要求，低音同清晰度都表現唔錯，讚！

怕粉色耳罩 carry唔到，同系列仲有呢隻較沉色設計。 

線控都有細心打造，銀色設計加埋中間個 logo，值回票價。 

耳帶位出面有設計，原來入面都畫有圖案，由外靚到內。 

耳插位呈 L形，夾 iPhone更方便。 

Spec.

單元：未有提供
頻率響應：未有提供
阻抗：未有提供
靈敏度：未有提供
售價：$1,499
查詢：思維（ 2955 1000）

用家有 say

Sales Leo：又靚又好聲
「我用開 Monster大耳筒，覺得耳筒都係要有一定造型。呢隻聯乘版幾靚，戴出街應該幾搶眼。而且佢都幾好聲，我會話接近完美。不過我隻耳比較大，佢個耳罩位好細，包唔到成隻耳，舒適度真係一般。」

同 style推介

方形耳罩 JVC HA-SR85S
SOL REPUBLIC玩到耳罩可以拆出， JVC新出耳罩就大玩半透明方形設計，夠晒 special，潮人必 buy！除咗外形正，仲內置 40mm單元，重低音表現同分析力都唔錯，聽五月天嘅 rock歌，夠晒正！

Spec.
單元： 40mm
頻率響應： 8-26,000Hz
阻抗： 36Ω
靈敏度： 106dB
售價：$1,180
查詢： JVC（ 2732 8220）

搶眼黑橙 Philips Fidelio M1
自問又想威、又要戴頭盔，呢隻玩撞色設計嘅 Philips Fidelio M1，就 fit晒！頭帶同耳罩設計簡約，只係以橙色車線突出效果，低調地型。而且 M1係 Philips旗艦級產品，音質夠晒清晰，用嚟聽阿 Kay首〈最好的時刻〉最正，唯一係隔音未臻完美。

Spec.
單元： 40mm
頻率響應： 15-24,000Hz
阻抗： 16Ω
靈敏度： 106dB
售價：$2,399
查詢：永利達（ 2407 1118）

細味獨樂 JVC HA-DX2000

香港夏天閒閒哋都過 30度，有時唔出街喺屋企靜靜哋聽歌都係一種幸福，要貫徹品味生活，自然對耳筒有要求。 JVC鑑聽級耳機 HA-DX2000，肯定唔會令樂迷失望。耳罩以松木打造，來減低音質失真問題，加上用喇叭音箱結構設計嘅內置 50mm單元耳筒，直接令音質細緻度達鑑聽級。除了音質，佢亦夠晒矜貴，作為信興 60周年紀念限量版，全球只發行 60對，每個耳筒更有獨立編號，買少見少。

巨型圓形耳罩以松木打造，避免音色失真。 

線插係 6.3mm設計，仲係用 24K金線插頭，確保傳真度。

兩邊耳帶都有細心位，一邊刻有獨立編號；而另一邊就寫上「 Made in Japan」，品質有保證。 

耳罩同頭帶都係用真皮打造，舒服得嚟又有貴氣。 

用家有 say

Model Tio：最舒服
Tio試戴晒咁多款耳筒拍攝，惟獨對呢隻 JVC讚口不絕。佢話：「雖然隻耳筒真係好大嚿，不過戴上耳真係好舒服，最誇張係一笠上耳，完全聽唔到記者同攝影師講咩，隔音功力一流！賣得咁貴，絕對有原因。」

同 style推介

透明音質 Shure SE846
玩鑑聽級耳筒，屋企要有位擺鑑聽器材，想出街一樣聽到靚聲？玩靚聲耳機，一樣不失味道。上星期剛於日本發布嘅旗艦級耳機 Shure SE846，除咗有得換線，透明耳機更內置 4單元，音質呈現有保證，樂迷肯定好期待早日喺香港上市。

Spec.
單元：高音× 1、中音× 1、低音× 2
頻率響應： 15-20,000Hz
阻抗： 9Ω
靈敏度： 114dB
售價：$1,399美元（約 HK$10,856）
查詢： Shure（ 2893 0411）

自拆元件 Marshall Monitor
製作擴音機起家嘅 Marshall，近年殺入耳筒界，以靚聲作主打。新出 Monitor獨有 F.T.F.系統，能夠畀 user揀自己想要嘅音質。只要打開耳罩，就見到 F.T.F.植入片，如果想 bass再出啲，就可以自己拆走植入片。想要平衡感就擺番入去，夠晒專業。

Spec.
單元： 40mm
頻率響應： 10-20,000Hz
阻抗： 42Ω
靈敏度： 99dB
售價：$1,999
查詢： Street Value（ 2577 2599）

運動霸氣 SOUL RUN FREE

後生仔連做運動都要有型過人先有態度，梗係要襯多款運動型耳機啦！呢對 SOUL RUN FREE其實係同有「閃電」之稱嘅世界短跑冠軍保特（ Usain Bolt）聯名，因此無論耳機 case抑或耳機本身，都印有保特招牌拉弓動作剪影，絕對係身份象徵。由於耳機真係設計畀運動時用，所以用上易戴嘅耳掛設計，同時可以調校角度，而外殼就用抗菌物料生產，有汗水都唔怕耳機易壞，加埋 28克超輕重量，戴住佢兩、三個鐘都唔會攰。音色方面意外地唔錯，偏向平衡，人聲特別出，聽乜歌都啱。

呢對耳機顏色用上黑撞金，效果非常浮誇，有冇霸氣都係靠隻色。 

保特呢個招牌動作變成耳機設計之一，個剪影效果都幾過癮㗎！

保特 

備有線控，做緊運動時有電話入，唔使咁麻煩拎部手機出嚟聽，平時迫車講電話都用得。 

個耳掛有彈性設計，同時可以調校角度，好易就戴到。

Spec.

單元：未有提供
頻率響應：未有提供
阻抗：未有提供
靈敏度：未有提供
售價：$699
查詢： Towervision（ 2553 1151）

用家有 say

中學生李陶源：最主要睇樣
「我都有買過運動型耳機，打波嗰陣都可以聽歌，揀邊款最主要都係睇樣，同埋會唔會好易跌，勾得住隻耳就最好，其次要靚聲。呢隻耳機都幾好，幾有型，摸落都幾實淨，應該唔易跌爛。不過個耳掛好大隻，我耳仔太細，好似戴得唔係幾舒服。」

同 style推介

S4專用 SOUL SL99S
GALAXY S4一推出就成為手機界熱話，但部機咁新，未必所有耳機都對應。好在 SOUL已急不及待推出完全支援 S4嘅 SL99S耳機。 SL99S用上純白加電鍍藍色 outlook，音質方面以低音令人印象深刻，表現非常實淨。另外，用上大熱嘅扁身防纏繞耳線，加上完全對應 Samsung手機嘅線控，剛轉 S4嘅朋友可以諗諗。

Spec.
單元：未有提供
頻率響應：未有提供
阻抗：未有提供
靈敏度：未有提供
售價：$1,099
查詢： Towervision（ 2553 1151）

拆得洗得 Philips ActionFit SHQ5200
採用頭戴式設計嘅 Philips ActionFit SHQ5200，保持 99克輕身之餘，外形同樣靚仔。為咗方便你做運動，佢有雙矽膠頭帶等你戴得更穩固，而分段式耳線就確保用 arm band後，耳線都唔會過長。最勁係耳墊唔只防水，仲可以拆出嚟洗，唔怕個墊用耐咗成陣汗臭味！

Spec.
單元： 40mm
頻率響應： 18Hz-21KHz
阻抗： 32Ω
靈敏度： 101dB
售價：$699
查詢：永利達（ 2407 1118）

平民慳家 Philips SHL3105WT

𠵱家乜都貴，出去唱 K都閒閒哋幾百蚊落樓，想平平哋買個耳筒出街，一樣有選擇。 Philips新出嘅 SHL3105WT設計簡單，方便襯衫出街。雖然只係幾百蚊貨仔，但內置都有 40mm單元，音質表現更恰如其分，而且耳罩位相當大，隔音表現完全唔失禮，喺旺角女人街行都聽得清楚。再細睇耳筒配置，其實扮足 DJ耳機，耳罩位可作 165度反轉，仲有埋線控位，玩法都算多變化。

怕白色款易污漕的話，其實仲有黑色款可以選。或者買晒兩款，日頭、夜晚分開用都唔使$800！ 

咪話平嘢冇設計，其實耳線位特別用上唔同顏色，睇落有層次。

線控位只係可以聽電話同收音，用法比較簡單，但型味十足。 

耳罩位可作 165度反來反去，點戴都得，扮足 DJ耳筒。 

同系列另有 SHL3100，冇線控所以再平啲，只賣$299。

Spec.

單元： 40mm
頻率響應： 18-20,000Hz
阻抗： 32Ω
靈敏度： 107dB
售價：$359
查詢：永利達（ 2407 1118）

用家有 say

潮鋪店長 Irene：好有驚喜
「我平時出街聽歌，用開 Monster大耳筒，試聽完呢隻 Philips，真係好有驚喜！佢音色表現唔錯，感覺拍得住我隻 Monster。真係你唔講，我都唔信佢只係賣$300幾蚊，抵！」

同 style推介

平玩名牌 Sennheiser CX 275s
一聽見你用名牌 Sennheiser，個個都知你係知音人。之但係個 Sennheiser耳機其實值幾千定幾百，就唔係太多人識分。如果想平平哋感受名牌耳機有咩唔同，呢隻新出 CX 275s就係不錯之選。佢強調低音表現，而且亦設有線控方便 user拎出街聽歌，初心者之選。

Spec.
單元：未有提供
頻率響應： 17-23,000Hz
阻抗： 16Ω
靈敏度： 121dB
售價：$549
查詢： Sennheiser（ 3412 8400）

入門 DJ JVC HA-SR44X
平價 DJ耳筒除咗 Philips， JVC新出嘅 HA-SR44X都好抵玩。既有自家開發嘅 XPLOSIVES低音導管技術，加強低音表現之餘，兩邊耳罩更可以反起，又設有線控操作，夠晒齊料。不過設計就比 Philips硬朗得多，價錢只係差幾十蚊，真係好難揀！

Spec.
單元： 40mm
頻率響應： 8-23,000Hz
阻抗： 32Ω
靈敏度： 106dB
售價：$448
查詢： JVC（ 2732 8220）

貴一點也不是問題

《 FACE》 Gadget版監修人 903 DJ Donald 

我當然希望買到 JVC旗艦級限量版耳筒啦，一來未用過雙圓環木腔設計 headphone，唔知戴上後感覺如何？另外，又真心想買入耳式 Soul耳機，因為自己喜愛跑步，而且 Soul個輕巧組合式耳掛，跑步時夠穩固，防菌都係賣點。飛利浦都係信心保證，這個價錢 good！我買 headphone音質行先，因為是享受嘛！價錢貴一點也不是問題，因為好 headphone可以用很長時間。揀選 headphone時我會帶自己聽開嘅音樂去試機，因為自己知那一種音色才順耳。

撰文：鄺浿鏇、熊俊彥
攝影：黃家活
模特兒： Tio@Jamcast
場地提供：滑板城 SkateCity（ 6688 7195）