本身任職 programmer的 Keith，自小熱愛各類球類運動，業餘做籃球教練，因而構思到寫球類戰術 app。 

創業通

籃球戰術 app　 NBA教練都 buy

坊間 app多不勝數，要突圍談何容易，然而本身同為 programmer兼籃球教練的 80後 Keith，卻把興趣與專長結合，製作各項球類戰術 app，深受不少球類教練歡迎，連 NBA華盛頓巫師隊也採用，並出現在電影《 Thunderstruck》的情節中，雖然 app每月盈利約 2萬，但公司今年剛得到天使基金的 31萬美金資助，很快便可大展拳腳。

由 NBA球星 Kevin Durant（杜蘭特）主演的電影《 Thunderstruck》，有其中一個情節，講述籃球教練拿着戰術板向球員不停講解，但他在筆記板上畫來畫去，愈講愈亂，此時助教拿出一部 iPad，利用一個 app，便可在 iPad上畫上各項戰術，畫面可移動及重設等，非常簡單易明。
這個 app是由 Keith編寫的 Coach's clipboard，「我設計呢個 app，用途同電影講嘅一樣，希望可以畀教練好清楚咁講解到籃球戰術，等球員容易明白，傳統嘅教練畫板實在太唔方便。」
去年年頭，電影公司開拍《 Thunderstruck》前，便致電 Keith取版權，「我當然答應啦，因為係一個好好嘅宣傳途徑。」令 Keith更雀躍的是， NBA華盛頓巫師隊教練也採用了他設計的 app，「平時我哋唔會知有咩客人用緊個 app，但舊年 1月，收到巫師隊教練嘅 email，佢畀意見我，話想加啲新嘅功能入去，嗰時先知佢哋都有用呢個 app，真係好開心。」

自幼熱愛球類運動

除了籃球外， Keith還推出了足球、冰上曲棍球及手球等 14種球類戰術 app。要懂得編寫這麼多球類程式，莫非 Keith全部球類都識打？「係呀，呢 14種球類我都識打，好似足球、籃球等，我仲係校隊。」原來就讀國際學校的 Keith，很熱愛課外活動，每個暑假都會學一種球類。中學後，他往加拿大讀書，畢業後雖然於當地從事 IT工作，但業餘還會到中小學做籃球教練。
09年，正因為工作關係，令他想到編寫這個 app，「我本身做 programmer，寫 app好簡單，原本淨係寫咗個籃球 app，畀自己上堂用，後嚟試吓放上 App Store，賣 0.99美金，又真係有人買，跟住我開始加多啲功能，例如可以轉位、移動等，又有球員系統，可以加入球員名同號碼。」

電影《 Thunderstruck》其中一個情節，球隊教練最初用畫板跟球員分析戰術，但畫得太花球員看不明白，其後助教拿出 iPad顯示 Coach's clipboard，球員一看即明。 

回流香港成立公司

後來 Keith逐步加入其他球類戰術 app，見銷路不錯，於是嘗試創業。「嗰時啱啱結婚，屋企人都叫我諗清楚，但好在有太太支持。」 12年，他便與太太回港發展，並成立公司。「我喺加拿大上網搵資料，知道香港有個數碼港培育計劃，好適合我，一返嚟就申請，花咗 2個月就成功申請到，解決咗 office租金同人工問題。」
Coach's clipboard自 09年推出至今，在 App Store排位一直很高，但 Keith也接過不少投訴，「有啲客要求好高、又想免費、又想樣樣功能齊，成日 send email嚟鬧，好難滿足晒佢哋。」試過因為用戶想像力極大，加入 100個戰術，令 app會變得慢，甚至彈 app，「我花咗 2、 3個月重新整理個 app，去解決呢啲問題。」
Keith會採納有用的意見改良程式，如巫師隊教練希望 app可以接駁到電視，「因為佢哋籃球人員太多，想駁到更衣室嘅電視度，方便啲睇。」今年初，他還推出雲端服務，令 iPad內的資料，可傳送到自己家中電腦，「隊員各自返到屋企，都可以重溫番啲戰術。」

Keith根據客人要求，不停改良程式，如換位、還原等。 

用家可在 app上畫線，顯示球員進攻、防守走位等。 

成功申請天使基金

為了不斷加強系統， Keith要不斷進行研發，因此需要尋找更多資金，今年透過數碼港參加「天使基金」，便成功得到 31萬美金的資助，「搵投資者嘅過程好辛苦，試過不停被拒絕。」在參加基金演講前， Keith專誠修讀了數碼港提供的 32小時課程，改善自己的演講技巧，又有一些專家給予意見，如何包裝公司等。「演講得 40分鐘，要一次過面對 50位投資者，講番自己個 business，真係好緊張，之前一日我仲發燒，好在最後都成功。」
Coach's clipboard於 2年前，已提高價錢，售 1.99美金，所有球類戰術 app累積 20萬人次 download，當中以籃球反應最好，其次為足球。 Coach's clipboard曾在去年 12月和今年 1月，在 iOS、 Mac以及 Android3個不同平台上（美國及加拿大），體育收費程式排第一位，過去 2年於更被 Apple Inc.列為推薦程式之一。

連 NBA華盛頓巫師隊教練 Randy Wittman也有採用 Keith設計的 app。 

客人美國 MARA Basketball救練以前用畫板和筆畫球員走位，好混亂，但用咗 app後好清楚易明，而且啲戰術會有 record，方便日後分析。 

計劃開設網上平台

現時公司月賺 2萬，雖然盈利不算多，但得到基金支持， Keith已有滿腹新計劃。「除咗繼續改良個 app外，我仲想開設一個網上討論平台，類似社交網，分成幾個球類 forum，畀各地嘅教練同球員喺網上分享戰術，交換意見同討論。」
為了達成這個目標， Keith坦言要不斷尋求新資金，像 3月完成採訪後，他便飛往美國矽谷最少 3個月，主動出擊，找新的投資者，看到他如此積極，相信這個社交網，很快便可面世。

Coach's clipboard去年打低逾 200個對手，奪得首屆「亞洲智能手機應用程式大賽」的榮譽大獎，成為大贏家。上圖為 Keith在頒獎禮上分享創業心得。 


Keith租用數碼港的 office，工作得累，便在 office打籃球減壓。

開業成本

租金：$0
製作程式：$20,000
總投資：$20,000

每月收支

租金：$0★
人工：$40,000★（ 6人）
雜費：$5,000
營業額：約$65,000
盈利：$20,000
★（數碼港資助）

J Plus
網址： http://www.jpluscorp.com 

數碼港培育計劃

數碼港技術總監 Dr. David舊年 6月，係我哋第一次到矽谷做交流，當係見識同推廣我哋香港嘅公司，今年將會有第二次活動，會去 LA同三藩市，今次會 send參加者嘅企業資料畀當地投資者，希望可以安排到會面。 

計劃為培育不同的科技人才而設，得到計劃資助的企業，分駐場及非駐場兩類，像 Keith便屬駐場公司，在 24個月培育期，可獲值$530,000的支援，包括免費租用辦公室、以及財務津貼，包括實習生薪金開支、市場推廣費用等，而非駐場企業可得$330,000財務津貼。
另外，企業還可得到$30,000的津貼，以支付參與由數碼港舉辦或協辦之活動，每位參加者以$15,000為上限，像去年 10月，數碼港便舉辦為期 10日的活動，約 43人一同出發到矽谷，參觀當地的公司，以及與投資者會面，讓參加者可以到當地交流外，還可了解國際市場情況，甚至可嘗試尋找投資者。
網站： http://www.cyberport.hk 

咩係天使基金？

政府近年為大力推動創新抖技， 2011年推出由香港科技園與香港 4家大學合作創立的「香港天使投資脈絡」（簡稱天使基金， HKBAN），集合擁有高淨值資產的業內資深人士，向初創公司進行高風險投資，發展至今，已協助逾 10家公司取得超過 6千萬元資助。
HKBAN現有逾 50位會員，當中包括個人投資者及企業投資部門代表，基金為投資者及初創公司提供一個有效的配對平台，初創公司需向投資者進行演講，詳述公司背景、業務等，甚至是帶投資者參觀公司等，想辦法引起投資者興趣，吸納更多資金，投資金額由 5萬美金至數十萬不等。
網站： http://www.hkban.org 

撰文：洪芳俠
攝影：傅新發、黃家活
部分圖片由被訪者提供