今日好玩嘢

迪士尼　新體驗　迷離莊園轉轉轉

唔經唔覺迪士尼新開嘅灰熊山谷原來都已經開咗大半年，要留住遊客同大小朋友，自然又係時候出招玩玩新鮮感，下月 17號正式開幕嘅迷離莊園，屬於樂園擴建計劃嘅壓軸園區。喺呢個大宅入面仲運用多種超高科技設計出類似移動劇院嘅玩法，無軌車廂前進時會不斷轉圈，同時會有高清投影機配合場景製造效果，即使係原創故事冇米奇、胡迪佢哋撐場都一樣刺激好玩！

迪士尼迷離莊園

開幕日期： 5月 17日
開放時間： 10:00am- 08:00pm（星期日或假期： 10:00am-09:00pm）
*票價：$450（ 12至 64歲）、$320（ 3至 11歲）、$100（ 65歲或以上）
查詢： http://park.hongkongdisneyland.com/
*票價包括迷離莊園及其他園區

迷離大宅搵阿拔

呢個迷離莊園主要由迷離大宅同奇幻庭園組成，入面以原創故事為藍本。迷離大宅講探險家亨利博士大宅有勁多珍藏，點知其中一個魔幻音樂盒俾貪玩嘅馬騮寵物阿拔打開咗，結果釋放出神奇「音樂星塵」，令迷離大宅入面嘅珍藏品變晒有生命，十足翻生侏羅館！

佢就係故事主角阿拔，百厭得嚟其實好可愛，表情勁多，同亨利博士相映成趣。

Check Point 1影相由於迷離大宅每次會入 4架車，一架車載 6個人，一轉 24人。所以預咗要排隊，好在排隊位都好多展品，有相影冇咁悶。

Check Point 2轉圈一上車你會發現無軌車廂由 200個無線射頻辨識標籤（ RFID）同 WiFi技術控制，令佢唔使路軌就行得，隨時可作 360度轉圈，睇晒前、後、左、右嘅場景。玩緊嗰陣感覺唔似坐緊車，活動程度仲勁過環球片場嘅《變形金剛》。

Check Point 3激真之後沿住無軌車載你去特定場景，投影機就會射出音樂星塵，令你見到各式展品變成有生命力，好似呢個流出岩漿個效果就勁真，如果會熱就更正。另外，有啲場景就會有激光，甚至噴水，玩盡 4D！

Check Point 4阿拔最抵死係阿拔會跟住你出現喺各個場景，搞搞震引你笑。抵讚係佢嘅動作勁生動，眼仔碌碌勁得意，有時扮慘，有時嚇你！

Check Point5龍捲風好戲在後頭，嚟到最後一個中國場景就最刺激，事關中間個孫悟空會搞到狂風雷暴，架車更會跟住狂轉，天昏地暗轉速好快，加埋有風吹埋嚟，好似被龍捲風捲起一樣！最後雷暴更將成幅牆打爛，但一閃即逝，記住睇清楚。