沙嗲牛肉漢堡$35沙嗲汁、牛肉夾住漢堡包吃並不突兀，有埋半熟蛋，感覺更 juicy，如果公仔面味道濃一點更好。 

潮𡃁便當

大包圍

成日講創意，走轉食店望吓其實就知創意幾時都在， 1895年首次在快餐店 Louis' Lunch出現嘅漢堡包，至今玩法層出不窮，先是夾泡菜玩韓 feel，再來夾叉燒、蛋牛麵走港式路線，最後連包身都轉移用上日本珍珠米 replace，呢幾間新店的創意程度，真係連 Louis' Lunch創辦人 Louis Lassen都估唔到！

讓蛋汁飛　創意港式牛麵堡

上環美食多，科記、孖沙等舊式茶記更是日日塞滿人，受茶記常餐沙嗲牛麵、雪菜肉絲麵影響， Green Lounge的年輕老闆 Joe，在店鋪開業 2個月後靈機一觸，推出一款沙嗲牛漢堡及雪菜肉絲漢堡，夾入流心蛋及公仔麵，直情好似將一碗麵濃縮在漢堡包內，超玩嘢！牛肉汁香四溢，雞蛋一咬爆汁，不過略嫌公仔麵太腍，味道不足，如果麵條更硬、味道再濃或許更佳！不過年輕人勇於嘗試，值得欣賞！除了漢堡，店內早上提供全日早餐、賓尼迪蛋及多款咖啡茶、下午則有意粉麵飯，既可早上叉叉電、又可午餐搵食！
創意度：★★★★★

雪菜肉絲漢堡$35未入口已有雪菜香，鹹鹹香香幾得意，雪菜粒如再爽脆更佳。 

食客 Eriko Kuroiwa學生

我喺附近住，見到呢度環境好舒服所以嚟試吓，今日 lunch有咖喱，味道唔錯！

The Green Lounge

地址：上環蘇杭街 104號秀平商業大廈地下
電話： 2535 9979
營業時間：
星期一至五： 7am-5pm
星期六： 8am-6pm（星期日休息）

86g法式叉燒包

九龍城一間新開的燒雞小店內，偏偏有一款特色叉燒包。不是普通茶樓點心而已嗎？有什麼特別？原來這裏的叉燒包，成個漢堡包咁款，用上烘到脆身的法式麵包，入面夾咗一塊厚切大叉燒同生菜，又中又西，叉燒特別選用半肥瘦，肥膏及肉參半，入口滿口蜜汁燒香，好滿足，靈感正正源自店鋪經理伍先生小時候食叉燒食到非常滿足的經歷，咁又係，慢慢將成塊有成 86g重的叉燒放入口，個下滿足確是難忘。
創意度：★★★★★

法式叉燒包$20麵包微脆，叉燒極具分量，肉感豐腴，蜜味濃，配合脆爽生菜中和，食完唔會罪疚！ 

用磅量過，叉燒有成 85.8g重（已減碟重），都咪話嘢小。 

Siu G店

地址：九龍城城南道 41號地下
電話： 2383 0199
營業時間： 11:30am-10:30pm

塞爆胃　 2碗飯米堡

連鎖店當道，力主 D.I.Y.小店的就更加難能可貴，位於尖沙咀不起眼處的 Obsession，四面都是住宅，望上去一個長方形天井，別有洞天，由一對 80後 couple Keny及 Goldie經營， 2人 3年前在加拿大溫哥華完成西廚課程回港， 1年前開始以 Obsession經營網上蛋糕生意，至 3個月前才膽粗粗開店，主打漢堡包。店鋪 3款麵包香草包、意式軟包、 rice burger； honey mustard醬汁；原個上去肉番茄湯，均由 Goldie一手主理，全能到爆！最推介牛肉米漢堡，用上日本珍珠米，入口煙韌且有七味粉香辛，牛肉加入照燒汁，又香又甜唔乾身，最重要是，珍珠米足料到有 2碗飯分量，身邊另一半都飽！
創意度：★★★

牛肉米漢堡$48（套餐價，連沙律或番茄湯、飲品及甜品）珍珠米內帶辣香，配合脆身香蒜、香甜照燒汁及大啖肥牛，味道層次豐富，食落勁有驚喜！ 

OB肉丸潛艇漢堡$38（套餐價，連沙律或番茄湯、飲品及甜品）麵包用上日本麵粉整成，咬落煙韌有彈性，豬肉丸加入自行調配的 honey mustard，甜甜哋相當不錯！ 

店內有甜品櫃， macaroon單點價錢$15，不妨試試 Goldie手勢。

食客 Janette學生

我之前由朋友帶嚟，覺得呢度夜晚點晒蠟燭好有 feel，所以再來，最喜歡米漢堡，因為其他地方少見。

Obsession

地址：尖沙咀柯士甸路 15A號柯士甸大廈地下 D號鋪
電話： 3689 3890
營業時間： 10am-9pm

激新千呎店　豪歎啖啖美國牛

店內有一個自助沙律吧，買 burger食畀多$30，單食就$45。 

在中環 7號碼頭底層以外賣客為主的 Burger Box，上個月走進銅鑼灣 wtc開鋪，面積 1,800呎，以後食 burger可以坐得更舒服更盡情！最推介泡菜牛肉漢堡，牛肉照例有 150g重，用上美國西冷及牛 loin肉（即牛腰部位肉）打碎後撈成，腍軟口感並重，肉香濃郁，泡菜內加入照燒汁，所以食落酸酸辣辣，爽口又帶甜，好有驚喜。
創意度：★★★★

左起：
鵝肝醬汁牛肉漢堡$59
煎香法國鵝肝醬後混入蛋白，好讓牛肉味道不會被鵝肝覆蓋。

泡菜牛肉漢堡$55
泡菜酸酸辣辣好開胃，一改 burger予人膩口的感覺，加上照燒汁甜香，減低辣口程度，配搭好 match。

Burger Box

地址：銅鑼灣告士打道 280號 wtc more P211A店
電話： 2894 8238
營業時間： 12nn-10pm

日賣 200個　粒粒和牛脆包

新開 1個月的一口烘焙，開在大馬路及巴士站旁，不設堂食位，專吸外賣客，店鋪既賣三文治、薄餅、沙津、又賣蛋撻批酥，玩法多元化。其中意大利 panini，偏偏夾入和牛同及鯖魚，激哈日。客人 offer後即時夾入餡料，用麵包機以 250度烘焙 3分鐘，時間 set好晒，方便客人因住時間拎走。麵包外層脆卜卜，好可口，和牛則切成粒狀，店鋪經理 Daniel說此舉是為了鎖住肉汁，店鋪開業至今，這款和牛粒照燒汁包乃大賣之作，日賣 200個。
創意度：★★★

日式和牛包$32（全份）/$17（半份）一份日牛包有 6粒和牛粒，半份數量減半，入口先脆而後帶肉香。 

煙熏鯖魚包$32（全份）/$17（半份）鯖魚鹹香得來有煙熏味，配埋香脆麵包，可口為主。 

一口烘焙 Bake&Bite

地址：太子彌敦道 783號地下
電話： 2390 2883
營業時間： 8am-8:30pm

撰文：梁智欣
攝影：顏青瑋、吳偉業