新車激試

小號增壓獸　 VW Polo GTI& Hyundai Veloster Turbo

揭背辣車仔幾時都代表青春、火熱、玩味，所以各大車廠設計呢類車都放膽一啲，愈係勇於開創新事物，愈係吸引到買家！ VW一向都係穩打穩紮品牌，鮮見有刺激嘢推出，不過最近引入 Polo GTI，為揭背辣車仔市場帶嚟新衝擊，車仔細細集車廠多項著名系統於一身，威力直迫高一班嘅 Golf GTI！另一方面，韓國 Hyundai亦趁日本車仔冇晒聲氣，再落重藥推出 Veloster Turbo，馬力達 186匹，今次有姿勢有實際！兩款車都以增壓器加強輸出，由平平無奇腳車化身小辣車，以 27萬樓下價錢就可以擁有，後生仔搶住買！

VW Polo GTI Spec.

引擎： 1,390c.c.直四 twin charger
馬力： 180ps/6,200rpm
扭力： 25.5kgm/2,000-4,500rpm
傳動： 7前速自動，附+/-模式
懸掛：前搖臂式，後扭力桿
制動：前、後透氣碟
車身： 3,976× 1,682× 1,452（ mm）
售價：$269,800起
查詢： VW HK（ 3698 9688）

紅色框線蜂巢式鬼面罩，係所有 GTI車系最大特色。 

軚盤都刻有 GTI字樣，同埋用紅線繡真皮。 

Hyundai Veloster Turbo Spec.

引擎： 1,591c.c.直四 turbo
馬力： 186ps/5,500rpm
扭力： 27.0kgm/1,500-4,500rpm
傳動： 6前速自動，附+/-模式
懸掛：前支柱式、後扭力桿
制動：前、後透氣碟
車身： 4,250× 1,805× 1,399（ mm）
售價：$248,800起
查詢：仁孚行（ 3428 8288）

紅色 Turbo章其實有啲老土，唔加好過加。 

真皮前座繡上 Turbo字樣，如好似普通版咁用 Veloster字更好睇。 

Veloster Turbo右邊車身用單門設計，加上肌肉感線條，有型過 Polo GTI好多。 

今次兩款車都唔係全新款，但不約而同加入增壓系統令馬力激增，喺呢個馬力大平賣年代， 180匹馬力其實已經唔係新鮮事，但如放喺一部車仔上，成件事就變得有趣！當然車廠喺設計之初已留有一手，預咗會有增壓版本推出，所以微調上都同普通版有啲唔同，咁先至突出表現，只要試過車，就知唔係換副偈咁簡單。

同級車貴一大截

擁有 180匹馬力、車價又要 under$280,000嘅揭背小辣車真係冇咩選擇，日本車直頭冇呢類車，市面上較接近嘅車全部係歐洲車，其中以 MINI Cooper S同 Audi A1 Sportback 185最多人捧場，不過車價統統過$330,000。

MINI Cooper S始作俑者

細車、大馬力、好操控，呢條方程式可以話由 MINI Cooper S一手帶起， 1.6公升 turbo引擎可輸出 184匹馬力，而且配特短車身同軸距，操控表現勁到冇人有！另一令 MINI Cooper S大紅原因係有特多 options玩，車主買部車返嚟可以改到好個人化，同級中冇車可以比得上。車價$333,000起

Audi A1 Sportback 185最強引擎

係人都知 Audi A1其實同 Polo共用好多嘢，包括底盤、引擎、同埋波箱，當中最強版本 2年前已用咗 Polo GTI嘅 1.4公升 Twin charger引擎，馬力更強！有 185匹！係呢副引擎暫時最強輸出。不過由於車價亦達到$379,800起，比 Polo GTI貴 10萬有多，吸引力唔算大。

Polo GTI忠於傳統

得罪講句，其實 VW Polo由 1975年推出第一代以嚟，根本一直守住實用家庭車位置，冇乜跑味可言，就算由第 3代開始加入嘅 GTI型號，外表上都係穩陣型，只可以話小車一部。最新第 5代 Polo GTI一如以往較普通版本遲咗 3年先出，不過個款未 out，而且比以往多代都醒神，就算係普通版都有唔錯賣相，為 GTI版打好基礎。
VW沿用低調升級方針， Polo GTI套用貴 10萬嘅大佬 Golf GTI包裝，先喺車頭鬼面罩加上 GTI版著名嘅紅色框，而頭唇及裙腳都用新款，令外觀更加貼地。最突出之處係轉用 Golf GTI常用嘅梅花圖案 17吋合金軨，而車尾亦加上小尾翼點綴。整體嚟講， Polo GTI外形其實驚喜唔大，不過就勝在有傳統經典味，亦同普通版有較大分別，對比同場嘅 Veloster Turbo，係就係冇咁爆，但一望個樣就知佢係辣版。

Polo GTI個天窗其實都唔細，但比起 Veloster Turbo仲差一啲。 

GTI版會有專用金屬門檻，紅線地氈，同埋金屬腳踏。 

Polo GTI用大量 LED做日光燈，比普通版更高級。

Classic車廂得人心

呢一類車仔，好大程度上都係滿足一班想用蔗渣價錢換燒鵝味道嘅人，所以除咗外表設計好重要外，車廂都唔可以 hea搞。同場兩部車唔單只外表取向有好大分歧，連車廂布局都南轅北轍！ Polo GTI由於有歷史可尋，車廠又有 GTI系列在先，所以車廂會貫徹傳統，但筆者唔會話佢保守，係 Classic！今時今日有邊款頂級車唔需要扮高級配真皮座位？ Polo GTI做得到！ GTI車系經典格仔布座重現，而且前座用上半桶形設計，承托力比普通版好得多，而後座同地氈都繡咗紅線，配襯得非常靚，如果係 GTI車迷，見到呢個車廂必冧。

雖然 Polo GTI車身比較細，但後座頭部空間都算唔錯。 

原廠格仔布座靚仔到不得了，而且承托力出色。 

Veloster Turbo破格到爆

上年先推出嘅 Veloster，如果遮住晒 Hyundai個廠章，你點會估到佢係韓國車？集跑車同家庭車優點於一身嘅「 2＋ 1」車門設計唔使多介紹，更值得留意係 Veloster不論普通版還是今次新出嘅 Turbo版，車身線條都十足個玩健身嘅大隻佬，肌肉橫生！如果以香港男士身形形容 Polo GTI， Veloster Turbo大概會係歐美大隻男，唔睇內在美同性能， Veloster Turbo贏晒！
其實 Veloster普通版同 Turbo版外表都嚇鬼，但 Turbo版性能勁一大截，點都要用個特別包裝襯托吓。先嚟 Turbo版獨有、出車加$5,200就有嘅啞灰色車身，令本身已經好爆嘅外表更出位。鬼面罩、泵把射燈、 18吋軨，全部換新款，車身又加更低裙腳，而最靚係新款尾泵把比之前更肥大，中出圓形雙尾喉成碌炮彈咁，而且下方有擾流設計，整體極具侵略意味，拍埋部低調 Polo GTI度，好大對比。

天幕式車頂為 Veloster Turbo車廂加強空間感。 

軚盤上有齊音響控制同電話功能，唔會比歐洲車輸蝕㗎！ 

Xenon大燈外圍係圈狀細燈，有啲似 BMW嘅設計。

奇異布局都舒服

筆者試坐完 Polo GTI再上 Veloster Turbo車廂，即時有種奇怪感覺，除因為真皮前座好老土咁繡咗個「 Turbo」字樣外，後座只可以用左邊後車門上落，都係一定因素。但呢個奇異設計又唔係亂嚟，右軚車會喺左邊設兩隻門，左軚車則會調轉，唔會好似 MINI Clubman咁，只得右邊可以開後門。
後座空間方面， Veloster Turbo同 Polo GTI接近，兩側更闊落一啲，但因為車尾頂向下垂，所以高人會易頂頭，廠方都有解決方法，就係用上比 Polo GTI天窗大 30%嘅天幕車頂，令空間感更強。

前座用雙色真皮設計，難得有電暖同電動前後功能。 

後座頭部空間一般，勝在只有兩個位，坐得幾舒適。 

扮豬食老虎

現時流行將引擎 down size，再用 turbo系統輔助，一來可以減低生產成本，二來用家升級更容易。 VW嘅 1.4公升引擎已發展得相當成熟，同一台引擎可以加 turbo，甚至好似 Polo GTI咁用孖叉！早喺上代 Golf GT出現過嘅 Twin charger（ Turbo＋ Supercharger）引擎，原本只有 170匹馬力，但今次放落 Polo GTI前再度升級至 180匹！比普通 Polo嘅 85匹足足多 95匹！多 1倍以上！加速力猛過之前好多，直迫上代 Golf GTI！從佢斯文外表點睇得出咁堅？而且 Polo GTI採用車廠最出名嘅 7速 DSG波箱，表現係同類波箱中最進取，對比同場 Veloster Turbo嘅普通 6速波箱，大勝！除此之外， Polo GTI唔單只引擎升級，連懸掛及迫力都加強，尾轆由鼓式改為透氣碟加紅色鮑魚，大大增強剎車信心。

整個駕駛艙其實同普通版有 8成相似，用料唔算好高級。 

孖叉引擎輸出達 180匹馬力，而且表現勇猛，數值上低過 Veloster Turbo，但實際有過之而無不及。 

追加新尾翼隱藏迫力燈，試車當日大霧極之有用。

雙出尾喉設計都好低調，冇任何花巧。 

梅花形 17吋合金軨造型嚟自 Golf GTI。 

Polo GTI車身細小，彎路上表現比 Veloster Turbo靈活。

外表兇狠內裏斯文

從廠方數據所知， Veloster Turbo嘅引擎係直接由普通版升級，即係同樣用 1.6公升引擎，加咗 turbo後就有 186匹馬力，進賬 46匹，數值上比 Polo GTI大，但升幅唔多。筆者之前試普通版時發覺輸出真係同外表唔相符，所以對 Turbo版有頗大期望。但試過之後，發覺佢表現並唔係想像中咁勁。首先引擎反應同 Polo GTI比較顯得懶洋洋，唔似有 186匹，頭段加速唔算快。而且 Turbo版竟然放棄雙離合器自動波，改用傳統式自動波，雖然表現已經好快，但有比較之下，都係雙離合器自動波更狠勁！如果要筆者揀，情願加多$10,000要 6速手波版，仲可以多啲樂趣。 Veloster Turbo除咗引擎升級外，懸掛都有微調，主要都係加強抗傾表現，令快速入彎時更有信心。

Hyundai好少喺私家車用 turbo引擎， Veloster Turbo表現只算中庸，仍有進步空間。 

車廂布局前衞，中控台仲有 7吋 touch mon。 

頭冚有假狗入風口，落雨天會形成小水氹。

18吋合金軨可選配跟車身顏色。 

新鬼面罩有啲似 Audi新車設計。 

升級多選擇

其實好似 Polo GTI同 Veloster Turbo一類車仔，再大馬力都有一個限度，車架同底盤都未必可以 handle到，盲目追求大馬力好易因小失大。如果想 keep住有 hot-hatch玩味，其實都可以畀多少少錢升級上標準 size揭背車，車廂更大更豪之餘，成部車寬容度更大。

M-Benz A250 Sport市場新寵

近期最爆揭背車一定係 M-Benz A250 Sport！除因為外表大改， Sport版仲用上專屬包圍，靚仔度爆燈。而且更重要係 M-Benz出品，一定有名牌效應。性能方面比 Polo一類車高一班，配 2.0公升 turbo引擎，有 211匹馬力，車價$399,000起。

BMW 125i唯一後驅

BMW 1系係揭背車市場中唯一用 FR布局嘅車系，操控表現異於常見揭背車，而 125i配用 2.0公升 turbo引擎，馬力達 218匹，而配用 8速波箱亦都係市場獨有，車價$418,000起。

Audi A3 TFSI未出先紅

A3車系其實同 VW Golf車系共用多項系統，兩車定位唔同，雖然 Golf比 A3更早到港，但據知已有唔少人落訂，車價約$400,000。性能方面會用 Golf GTI嘅 2.0公升 turbo引擎，有 220匹馬力，而 S-Tronic波箱都有改良。

VW Golf GTI下月到港

為 VW立下汗馬功勞嘅 Golf GTI下月即將到港，新車外表貫徹 GTI車系 design，引擎同 A3 TFSI一樣，有 220匹馬力輸出，估計車價只需約$360,000，有興趣朋友可以留意下月我哋嘅試車報道。

睇你要姿勢定要實際

講到速度，揭背小辣車始終都係一部車仔，尾段加速或者連中型房車都不如，但呢啲車唔係用嚟飛入機場，而係為多彎山路而生嘛！所以我哋今次都揀咗出名多彎嘅大帽山試車！加上大雨又大霧，對人對車都有一定考驗。筆者先駕駛 Veloster Turbo後追 Polo GTI，上落山後覺得軚盤靈敏度似房車多過跑車，懸掛有唔錯抗傾力，但唔算細膩，連續彎路有少少虛浮。值得一讚係 turbo lag控制得幾好，唔會有好突兀感覺，而油門踩到底其實仲有一小段深度，要用少少力先可以踩深啲，呢個時候波箱會自動 kick down，扯高引擎轉數，爆得更勁！
但 Veloster Turbo可唔可以追到 Polo GTI？有啲難度！因為到筆者試 Polo GTI時，發覺引擎同波箱配合得天衣無縫，好似隨時進入作戰狀態咁，油門同軚盤敏感度高，攻連續急彎極之有用，更重要一點係 Polo GTI車身細、軸距短，基本上車頭一指入彎，車身已完成入彎動作，跑味濃過 Veloster Turbo多多聲。

Polo GTIVW式簡單表板，所有出品都用近似款式，勝在易於閱讀。 

7速 DSG波箱，同引擎極之匹配。表現亦非常進取。 

Veloster Turbo立體式表板比 Polo GTI更簡單，留意轉表下嘅顯示燈位置都跟番弧位。

改用傳統 6速自動波，令快感減少咗，用手波可能更好。 

雖然 Polo GTI有更強行車表現，但講外表， Veloster Turbo更爆。 

總結

一部德國車，一部韓國車；兩部車性能數據相若，但實際表現完全兩回事。
如果你一心想買部揸到你興奮發笑嘅 hot-hatch， Polo GTI一定 K.O. Veloster Turbo，唔可以否定 VW多年嚟喺呢個領域嘅功夫，強如 Toyota都未有呢個本事， Hyundai？未係時候！
不過，如果你只係想要部有話題、外表出眾嘅小跑車， Veloster Turbo就啱用，甚至普通版 Veloster都可以，揸出街一定比 Polo GTI搶眼。

撰文：袁國基
協力：陳致新
攝影：葉偉豪