18/44:30pm準時交收當記者在袋內拿出煙驗貨時,身旁行過的理大生不禁注視,私煙拆家馬上着記者將煙塞回袋內,並說:「咪咁揚呀,之後仲要做生意!」圖片經過處理 

Main Camp

大學生煲煙勁 直擊私煙入侵校園

煙民愈趨「𡃁化」,當中大學生吸煙情況更愈來愈嚴重,即使在各大學校園的禁煙範圍,仍經常發現大學生公然圍埋「打邊爐」。
在禁煙校園煲煙固然離譜,但近來有學生為了食平煙,竟然大膽幫襯私煙拆家,有賣私煙的不法分子更睇中機會,實行服務周到地踩入大學校園送貨。食煙傷身,如今學生為平十多元一包更要以身試法,點計都冇着數!

 


4:28pm早到等畀貨記者一早在理大埋伏等候私煙拆家。見拆家由停車場走到鐘樓時極為熟路,而他亦指自己經常送貨到理大,就算送去不同大樓都沒有問題。圖片經過處理 

大學校園煙蹤處處,除了休憩場地,甚至連宿舍內亦常發現大量煙蒂,有學生更直認不諱有幫襯走私香煙,記者從其中一位理大學生取得私煙拆家電話,扮作是理大學生兼有意幫襯,私煙拆家即熟練地說:「明白!咁鐘樓(理大地標)等啦!因為你間大學喺對面海,所以要 5條先送貨, 310蚊一條!(比一條完稅香煙平$190)(咁有冇得再平啲?)已經平咗啦,唔係學生要$330先買到。你同其他同學夾份買咪得囉!我好多大學生客都係咁做!」

3大都幫襯


理大午飯最旺不少理大生在午飯後都會走到邵逸夫樓旁煲煙。即使不吸煙的同學,見到亦未有迴避或舉報,可見大學吸煙已見慣不怪。 

上週四( 18日),私煙拆家準時出現,拆家在理大人來人往的空地毫不避忌,用黑色膠袋拿着私煙,更叫放蛇的記者放心,「學校冇差佬!保安又唔理嘅!啲學生都唔敢出聲,好安全㗎。」記者稱有其他大學同學都有意幫襯,拆家更自豪說:「我哋啲客咩大學都有,港大中大科大全部都送,你哋要買最好早啲打嚟,我聽日會去港大送貨,宿舍都冇問題,我哋熟晒路,買煙記得搵我,呢行競爭好大,好似我咁都有 3、 4個行家做大學生意!」最後記者以現金不足為理由,沒有交易就離去。

學生:「有平點解要買貴?」

私煙入侵校園,曾幫襯過私煙的理大工程系的煙民阿南(化名)則說:「我食咗煙 4、 5年,一星期都食 3、 4包煙,一個月都成千蚊,對我哋呢啲大學生嚟講都幾貴。半年前同班朋友喺學校煲煙傾開,有個同學畀咗個私煙拆家電話我,話平成半,我咪試吓,其實除咗我,學系同宿舍同學都會幫襯,有得平點解要買貴貨?而且佢哋服務仲幾好,送學校又得、送屋企又得。𠵱家我同 4、 5個同學平均兩個禮拜就夾份買煙,一個月慳近 500元,啲錢用嚟唱 K都好!」
為慳錢犯法買私煙,阿南竟然懵盛盛以為只會罰錢。「買方最多都係罰錢,唔會留案底。不過都唔會買得太揚,喺學校都會匿埋交收,俾啲多事同學見到就唔好啦!其實啲煙唔係成 50蚊包咁貴,我哋都唔會鋌而走險。」貴咪唔好食囉,大學生!


科大少理禁煙除理大外,各大學都有私竇煲煙。好像科大其中一個吸煙熱點就在室內運動場旁外,同學更大模斯樣在禁煙牌下食煙,認真肆無忌憚。 

理大煙民自白


學系同宿舍同學都會幫襯!(真實對白) 

阿南(化名)煙齡約 5年,他承認半年前開始買平私煙後,令他比從前食更多;「以前會就住就住食,𠵱家就唔會計住計住,有時仲會請人哋食添。」理大校方則向本刊回應:「如果係真,我哋會立即跟進,而有關同學在校園吸煙,情況並未太嚴重,但歡迎控煙辦入校巡查!」

宿生食煙騎呢 3招

校園禁煙,宿舍一樣嚴打吸煙,捉到更會即刻踢走冇得住宿。但煙癮起,宿生惟有出奇招,避開校方偵查,你有你捉、我有我煲!


風扇抽不少吸煙宿生會將煙噴向窗外,但少不免煙味會吹回房間,所以有宿生諗到用風扇輔助,將煙味抽出窗外,原理有如抽氣扇! 

吹入樽更有宿生表示:「我哋一定留番閒時飲完嘅膠樽,到癮起打開膠樽,將煙霧噴入空樽內,然後馬上扭實樽蓋,防止煙霧四散。」 

噴香劑為確保安全,學生會定期用空氣清新劑蓋過煙味,但各人方法不同,有人會用止汗劑、有人會點香薰,總之噴到間房香噴噴,保安入到房都難以發現。

黃國桐律師:坐兩年

售賣同購買未完稅香煙都係犯法,最嚴重可以判監兩年以及罰款 100萬,大學生咪試!

 

Main Camp: Main Campus簡稱,意即主校園,各大專潮人潮事當然離不開 Main Campus。


撰文、攝影:校園組

arrow
arrow
    全站熱搜

    tvb4life 發表在 痞客邦 留言(0) 人氣()