DC解碼

DC新「細」紀　 Pentax Q10

動畫界神作《新世紀福音戰士》最新劇場版《 Q》今個星期四就會喺香港上畫，真嗣、渚薰同十三號機必定成為𡃁界話題。連帶 figure、特別版波鞋同勁矚目嘅 Pentax Q10別注版 DC，更係 fans最想要嘅 product。可惜限定 1,500部嘅 Q10別注機只喺日本發售之餘，亦已經賣晒！所以玩普通版 Q10都係唔錯選擇，事關呢部機行貨都有 100種色，其中有 3種真係同別注機有 8成似，足以滿足 fans要求！

Spec.

雖然要等約 4星期，但 Q10嘅「自選相機顏色」共可玩出 100種不同配搭，送畀女仔都有心思得多！ 

像素： 1,240萬
感光元件： 1/2.3" CMOS
感光度： ISO 100-6,400
影片： 1080p
屏幕： 3"
記憶： SDXC
體積： 102x58x33.5mm
重量： 180g
售價：$3,990（機身連 5-15mm鏡頭）、$5,490（機身連 5-15mm及 15-45mm鏡頭）
查詢：捷成消費品（ 2926 2300）

自選相機顏色　最似零號機

之前， Pentax K以 DSLR憑住多色 body襯手柄成功殺出血路，今次輪到無反嘅 Q10都引入「自選相機顏色」玩法。訂機時先選定黑、銀、紅、紫、白等 20種機身顏色，再配上黑、白、棕、粉紅、粉藍 5種顏色手柄，約需 4星期，你就會收到自選嘅 Q10，總配搭多達 100種！其中白色 body襯粉藍手柄，就同別注機中嘅 TYPE00最似，只係差轉盤上紅邊同白色 kit鏡，其他真係 8成似。其次普通版嘅紅×粉紅，以及紫×黑都同別注機 TYPE01、 TYPE02好似，可作自選之列。

普通版（白×粉藍）機身顏色完全一樣，驟眼望落去普通版真係可以扮限定機。想再似啲，買盒零號機模型，將入面嘅貼紙貼上去就會更似。 

限定機（ TYPE00） 

普通版（紅×粉紅）明日香用嘅二號限定機係用紅×橙，但普通版只得紅×粉紅。好在隻粉紅色勁深色，唔細心睇其實同限定機都好似。

限定機（ TYPE02） 

普通版（紫×黑）果然係主角機，特別喺閃燈位加入青色，令到普通版嘅紫×黑，睇落始終同限定機有少少距離。 

限定機（ TYPE01）

對焦雜訊有改善　追貼 M4/3

話晒係最細嘅無反 DC，論輕巧、論外形， Q10絕對贏晒！之不過，上一代 Q喺對焦速度同雜訊處理上都唔係太滿意，所以 Q10就喺呢兩方面下苦功。佢喺機身上加入自動對焦輔助燈，令佢喺昏暗環境下更易對焦。實試發現喺長焦距或室內環境對焦都算快手，感覺同 prosumer機差唔多，比上代 Q快好多。而雜訊方面，雖然佢最高有 ISO 6,400，但雜訊始終唔少，建議 ISO 800已算極限，用落似 M4/3機。好在佢吸光情況好咗， ISO 400都足以應付一般拍攝，減輕雜訊問題。

莫講話 DSLR同其他無反 DC，即使拍埋咭片 DC， Q10竟然可以再細少少，好似玩具一樣咁 cutie！ 

試相上代 Q成日有迷焦情況， Q10終於大有改善，而且開 ISO 400都夠光， model五官夠 sharp之餘，膚色都自然，幾啱女仔用。 

撰文：張穎麟
攝影：黃家活