U花 U草
浸大法籍妹 住劏房的公主
法國人出名浪漫識歎，而在巴黎浮華大地出世的 Wendy Lauwensa亦繼承法國人優良傳統， 12歲前住三層獨立屋，自細過公主生活恨死人。
現讀浸大副學士 Yr.2，剛獲英文系學士課程取錄的 Wendy， 12歲時父母希望可在香港落地生根，回香港後，父母想 Wendy學會獨立，竟安排她住在佐敦的 100呎劏房。
公主由天上跌落凡間，不過 Wendy冇怨父母：「全靠呢一個月，我知道要學獨立，再唔係公主！」
中文超差
雖然法國的生活勁歎，恨死唔少港女，不過 Wendy卻說：「嗰邊冇咩娛樂，都係落街跑吓步，鋪頭未夠六點就關門，其實好悶，香港又方便又多嘢玩，唔經唔覺就十點幾，香港生活多姿多采好多！」
Wendy略帶鬼妹仔口音（有點像樂基兒）說：「因為國際學校入面大部分都係法國人，既然嚟得香港，我想接觸多啲香港人，學吓廣東話。」
從來未正式學過中文的 Wendy，連中文名都沒有，會考以法文代替， Wendy笑言：「我覺得自己中文得幼稚園程度，識聽唔識寫，平時睇新聞都係睇條片，但係叫我講發生咩事我真係唔知。」現讀 Yr.2的 Wendy還剛獲浸大英文系取錄，距離做幼稚園老師的夢想又近一步。
港仔男友
與同讀浸大的男友拍拖一年多的 Wendy，大讚港男夠體貼夠細心，「唔好以為法國男仔好浪漫，其實係個環境氣氛影響，講細心浪漫，香港啲男仔仲好！」
屈居百呎
法國人生活寫意悠閒，去年暑假 Wendy就趁假期到波爾多探親戚，順路到附近的酒莊參觀，「我爸爸鍾意儲紅酒，所以嗰次都買咗一箱紅酒慢慢歎！」
法國讀書歎， 20歲的 Wendy憶起仍懷念：「喺法國，我每日一定會 snack time， hea足一個鐘，返學一個學期只有一個測驗，連考試都唔使，而學校又會借埋書畀我哋，返學根本唔使帶書包，加上唔使着校服，放學就可以去玩。一有長假，父母就會帶我同哥哥去西班牙、英國玩！」
可惜夢幻生活直到 12歲完結，父母為了 Wendy可試獨立滋味，故着她先提早回港搵學校，但不料竟要屈居百呎劏房。「父母想返香港生活，所以 12歲時叫我自己一個坐飛機回港搵學校，估唔到親戚幫我喺佐敦搵咗間百幾呎劏房，對住四面牆，加上環境好雜，鄰居全部係成日講粗口嘅金毛飛，雖然有姨媽同表妹輪流陪我，但我都好驚，每日要等到夜晚 11點先敢返劏房瞓覺，日日捱味精飯盒，因為雪櫃細到只可以放飲品！」
撰文：葉浩婷
攝影：何榮亮
形象： Bryan@the Flaming
服裝： Bershka
化妝： Wing@Wing L image
留言列表
