搜尋氣
牛頭角「腹肌生果佬」：要超越羅仲謙
上週因一張赤裸上身賣生果照在網絡瘋傳的「腹肌生果佬」，鋼條身形加靚仔樣，即引嚟大量網民「人肉搜尋」，刮出多張肌相，仲激讚佢線條靚過羅仲謙，更有不少港女 like佢夠大隻，話要親身去幫襯兼𥄫仔。
呢位大隻靚仔原名叫 Felix Ip（葉俊豪），今年 26歲，正職係沙田潮服店 sales，放假先落牛頭角老豆嘅生果鋪幫手。咪睇佢咁大隻，原來講嘢勁斯文，一身肌肉亦全靠睇書自操，終極身形目標，係韓佬權相佑！
上個禮拜睇鋪時被人偷拍 post上網，一日內喺網上瘋傳而成大紅人， Felix話真係冇諗過有咁大回響！ 
咪睇 Felix大大隻，查實佢講嘢斯文外，仲係怕醜仔一名，操肌以外另一嗜好係摺紙，圖中嘅摺紙便是他的作品，鐵漢柔情唔只得尹揚明。 
週日（ 21日）訪問期間，生果鋪一早已有唔少街坊幫襯，忙到連 Felix做訪問途中都要幫手，現場真係好多女途人路過暗𥄫佢嘅肌肉。
生果鋪係老豆喺「沙士」（ 03年）時期開嘅，附近有老人院又有廟，加上牛頭角下村重建就更忙，多咗人嚟買生果，我見老豆有時做到好辛苦，加上我比較黐家，所以一放假咪落鋪頭幫輕吓，我𠵱家正職喺沙田做緊時裝 sales。
我細個係肥仔， F.1先開始有做運動，講真我成身嘅肌肉真係靠搬生果練番嚟，最多都係自己睇完啲健身書學吓點樣操肌肉，一直都冇去做 gym㗎，平日放工後會自己做肌肉運動同跑步，咁我老豆副業係跑步教練，我有時都會跟佢一齊跑。
我目標係最想好似權相佑、郭富城咁嘅身形，之前都有搵過羅仲謙做目標，但我想超越佢，之前我試過比佢更橫，但覺得太誇張，所以減磅練線條。網友搵咗我嗰啲 model相出嚟，其實只係一啲攝影師朋友幫我影嘅，我從來冇做過 model，如果有人搵我入行都有興趣嘅，不過暫時冇囉！我哋男人多汗，搬貨唔着衫舒服啲，平日做開街坊生意，佢哋（街坊）都唔覺有乜特別，我有睇過啲網友討論，都多謝一班網民，令鋪頭呢幾日生意好咗！
阿叔都 fit生果鋪係 Felix老豆及阿叔打理，訪問當日 Felix爸爸去參加跑步比賽冇落鋪，睇鋪嘅阿叔同 Felix一樣咁大隻，全部都係搬生果練番嚟，「腹肌生果佬」唔只形容 Felix一個，佢阿爸、阿叔都一樣可以咁稱呼喎！ 
網上話 Felix正職係 model， Felix就澄清話冇簽過 model公司， facebook內的 model相，係幫做攝影師的朋友客串影的。網上圖片 攝影： Ken Chan 
採訪、撰文：魏紫嫦
攝影：賴穎雋
留言列表
