close


劉青雲與郭藹明結婚14年依然非常恩愛，經常在西貢拍拖食飯，唔生B一樣幸福。《蘋果日報》圖片

磚頭獎

第31屆香港金像獎上週日（15日）舉行，《桃姐》狂擸5獎成為大贏家，葉德嫻大熱做影后眾望所歸，反而劉華爆冷撼贏劉青雲就令人跌晒眼鏡。叫兩飛都食唔出，當晚完騷後仍然出席慶功的青雲，大方表示冇失望。輸獎唔志在，劉氏伉儷最緊要有「獎金」。原來兩人投資眼光獨到，18年來買賣物業從未損手，至今已累積賺過800萬！逢炒必賺，青雲唔使評審投票都證明到自己有實力啦！


憑《竊聽風雲2》及《奪命金》獲兩項提名影帝的劉青雲，輸畀於《桃姐》表現一般的劉德華，老婆郭藹明同老死吳鎮宇都話失望，反而青雲非常睇得開，「唔係贏就輸，今次唔得咪下次囉！」

炒樓6連勝
贏民意輸獎的青雲，除了演技掂，炒樓亦同樣有實力。由94年買入何文田乾隆閣單位開始，青雲同郭藹明多年來曾賣出6個物業，全部賺錢離場，最少都賺七十多萬。往績優良，劉青雲兩夫婦現仍持有3個物業，當中包括一個貝沙灣千四呎單位，07年以1,030萬買入，已升值至近2千萬，好搵過拍戲。雖然手持千萬豪宅，但低調的劉氏夫婦反而鍾意租樓住，現時以約6萬5元租住西貢龍嶺二千多呎獨立屋，方便養狗之餘，亦可隨時與吳鎮宇等西貢友飯局。

郭藹明復出
除咗炒樓掂，其片酬亦由650萬起跳，影帝級的劉青雲每年至少有兩部戲揸手，今年未出街的有《追兇》、彭發新片《完美童話》，及與謝霆鋒合作的《消失的子彈》，單計2012年已賺近2千萬，青雲同老婆打跛腳都唔使憂。不過休息太耐都會悶，港姐出身的郭藹明早前就同王維基見面，有機會復出同娘家打對台。「有時都會有戲癮，但太耐冇拍過戲驚唔適應，老公都有鼓勵我去拍！」既然青雲開綠燈，自己又keep得咁好，快啲出山拍劇益觀眾啦！

有賺冇蝕
劉青雲同郭藹明先後持有9個物業，其中6個已經賣出。兩夫婦對樓市眼光非常獨到，所有物業均賺錢離場，多年來單靠炒樓已賺過8百萬！兩人仍持有的貝沙灣豪宅賬面賺近千萬，簡直係隱形樓神喎！

已售出
深水埗兆昌大廈買入：435萬（10/11）賣出：520萬（1/12）賺95萬 深水埗基隆街地鋪買入：583萬（6/11）賣出：765萬（7/11）賺182萬 共賺：807萬

仍持有
新蒲崗富德工業大廈買入：216萬（10/11）市值：約220萬升值4萬 石硤尾街地鋪買入：516萬（11/11）市值：約620萬升值104萬 升值：1,078萬 ####


公布結果一刻，劉青雲曾忍唔住黑面1秒，但好快已回復笑容祝福劉華，交足戲。


劉華憑《桃姐》三度封帝，不過市民就話佢表現好一般。


劉青雲喺《奪命金》（圖）同《竊聽風雲2》分別做義氣古惑仔同怕事股票佬，演技爆燈的青雲在金像獎評審投票中票數最高，但因有兩個提名令票數被分薄，輸個馬鼻畀劉華。


6萬5住house 青雲以月租6萬5租住西貢豪宅龍嶺，屋苑住客多數係外籍人士，影帝唔怕俾人騷擾。


照去party 失落影帝，但青雲夫婦仍畀面出席寰亞慶功宴兼舒淇生日會，當晚贏得「最佳男配角」的盧海鵬，更安慰一齊拍《奪命金》的青雲。


顧家7人車搵到錢，但青雲唔似其他男星愛玩超跑，出入只以價值約40萬的七人車代步。《忽然1周》圖片


何文田乾隆閣買入：638萬（4/94）賣出：745萬（5/97）賺107萬


筲箕灣逸濤灣買入：598萬（9/04）賣出：674萬（6/07）賺77萬《蘋果日報》圖片


沙田第一城買入：87萬（9/02）賣出：169萬（3/10）賺81萬《蘋果日報》圖片


西貢大埔仔買入：838萬（9/97）賣出：1,180萬（10/10）賺342萬《壹週刊》圖片


貝沙灣買入：1,030萬（3/07）市值：約2,000萬升值約970萬《蘋果日報》圖片

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄