Jenna 20歲理工大學投資科學系 Yr.1 

U撈

Poly妹兼職　為入金融業做準備

香港擁有大專學歷的人愈來愈多，所以大專生在職場上的競爭只會漸趨激烈。機會是留給有準備的人，現時就讀理工大學投資科學系的 Jenna，上年開始兼職做財經數據分析員，既能將學校知識學以致用、又能汲取實戰經驗，希望畢業後輕易打低對手，為投身金融行業作好準備。

分析完數據後， Jenna會把有關資料影印一份給教授。 Jenna希望餘下的校園日子繼續在教育中心工作，「班同事個個都對我好好，令我好快就適應咗呢度，加上老闆好鼓勵我，令到我無論幾辛苦都想幫佢做嘢，如果要我走，我會好唔捨得。」 

「我平日嘅工作係分析資料，例如分析香港嘅人均生產總值、失業率、恒指同行業板塊嘅數據，然後整合成為教材，再畀教授用嚟做報告，聽教授堂嘅人好多，當中包括銀行家、保險公司 director同埋投資銀行等專業人士，所以啲數據要好準確，唔可以有半點差錯。」現年只有 20歲的 Jenna，就讀理工大學投資科學系 Yr.1，並於林本利教授開設的活道教育中心當兼職財經資料分析員，中心主要提供經濟及金融課程給有興趣人士參加。
自考畢 A-Level後， Jenna選科及找兼職，全為了下一步鋪路，如她對數字的敏銳感，也是由上一份兼職鍛煉出來的，「考完 A-Level後，好想訓練自己嘅文書處理能力，所以想搵份文職工，喺 JobsDB見到一間律師樓請人，份工指明要對數字敏感同中英文流利，咁我認為自己適合，試吓去 in，之後真係請咗我。」

做樓契學處理數字

在律師樓工作， Jenna一日要面對很多不同的數字，「我主要做樓宇買賣，一個數字都唔錯得，要非常小心處理。最初我都試過出錯，喺樓宇買賣合約入面計錯數，令到所有嘢要由頭做過，好在班同事對我好好，不單止冇鬧我，仲教番我點做，喺律師樓做嘢嗰半年，可以話係練出一身好武功。」
直至 Jenna入大學後，便放棄了律師樓的工作，但當時她不是直入 Poly，而是入了樹仁讀經濟及金融系，因一次機緣巧合下，找到現時的兼職，「有次林本利教授嚟樹仁講咗一個關於『大學生財富管理』嘅講座，本身對金融都有興趣，所以去參加，席間林教授話佢間教育中心請兼職，我就膽粗粗去應徵。」
因有在律師樓工作的經驗，令 Jenna成功獲聘，「成個樹仁得 2個人入到去做，我係其中一個， in我嗰位上司話我比其他人成熟同埋有工作經驗，所以請咗我。」

為了打工， Jenna每天都安排自己上 8點半的堂，「就算上最早嗰堂，我都好少走堂㗎。」 

一有空堂， Jenna便會把握時間溫習，「兼職同 GPA同樣重要，所以有時間我就會溫書。」 

同事 SylviaJenna做嘢好仔細，又唔怕蝕底，做嘢快得嚟，枱面都唔會亂，整齊有條理。

轉學科為將來鋪路

投資科學是理大近年新推出的學士課程，內容主要教授經濟及投資的數學知識和數據分析等。 Jenna得知有這新學科，覺得適合自己，有助將來發展，便決定轉科，「因為份兼職令我對投資產生咗濃厚興趣，同埋自己對處理數據幾有信心，所以決定轉讀投資科學，希望畢業後可以喺金融行業發展。」
現時一星期工作 3天，月入約$6,000，為了平衡工作及學業， Jenna可謂付出不少，寧願少一點休息時間，也為將來作好準備，「𠵱家我安排啲堂喺朝早 8點半開始上，可以空到下午嘅時間出嚟返工。雖然會唔夠瞓，但返工學到嘢，咩都抵返晒啦。我知身邊唔少同學畢業後打算投身金融業，覺得競爭好大，自己唯有努力啲邊讀書邊工作累積經驗，第時出嚟搵工份 resume都靚啲啦，希望將來可以完成夢想入投資銀行做嘢。」

到了 presentation前夕， Jenna(左一)會相約組員做 project。 

除了讀書和做兼職， Jenna(左三)也會盡量參加學校活動，圖為她參加話劇學會聚會時跟同學們合照。 

請兼職財經資料分析員

無論你現在是否修讀有關金融的學系，只要你是在學大學生、同時又有興趣從事金融業，都可以到林本利教授開設的活道教育中心申請成為兼職財經資料分析員，人工約 6千。 Jenna表示：「我認為投資知識係必要嘅，呢份工可以令到你哋對投資同金融業有更多了解，假如你將來想從事金融業，呢個係一個可以畀你磨練嘅好地方。」有興趣人士可寄個人履歷到 mailto:info@livingword.edu.hk或致電 2512 0677/ 2512 0699查詢。

撰文：何倬然
攝影：傅新發
部分圖片由被訪者提供