面對面
灘叔救地球 鄒凱光
《 Saving Private Ryan》港譯《雷霆救兵》，是史提芬•史匹堡導演、湯•漢斯主演，於 98年上映的經典戰爭電影。
這一天的訪問， 44歲的鄒凱光先後兩次提到這部電影名，說自己是：「 Saving Private Ryan，救得一件得一件。」
第一次，說女人：「女朋友唔縱得，我係教育！我同啲女仔一齊，唔係想剝佢衫，係 Saving Private Ryan，救得一件得一件。」
第二次，是說聽眾：「你唔好睇小我每日做緊嘅嘢，用笑聲化解怨氣，救到一個，即係害少一個，已經功德無量！呢啲叫 Saving Private Ryan，救得一件得一件。」
「每日做緊」是指原職編劇、導演、作家的鄒凱光，近年主力投放時間精力的 DJ工作，從林海峰、吳君如的下把，做到現時擁有兩個個人掛帥熱門電台節目，更因為《一八七二遊花園》的成功，引伸出 6月的兩場《灘住吹之齋呵唔鬧》個人 talk show。鄒凱光說，兩場共兩千名買票觀眾，是他的 VIP，這兩晚，要專心服侍班 VIP，用笑聲化解怨氣。
即係咁，鄒凱光的那套理論不是人人認同，不過入得場買得飛的，無疑都是灘叔信眾。學佢話齋，救得一個得一個，當下維港兩岸被怨氣籠罩，這兩晚起碼有兩千人是帶笑入睡的，都算功德無量。
呵呵吓就變咗鬧
6月 13、 14日，將在理工大學賽馬會綜藝館舉行兩場個人 talk show，鄒凱光話內容包保突破電台尺度，平時聽唔到。
「齋呵唔鬧」本來是一年多前鄒凱光自度，加插在每晚《一八七二遊花園》節目中的特別環節。鄒凱光說，做節目前，總會再三叮囑余迪偉和 Bu兩個拍檔：「記住一定要呵，唔可以爆㗎！一爆就唔好聽㗎啦！」結果呢，每晚聽聽眾電話第一個沉不住氣爆煲喪鬧的永遠是灘叔。
「開頭嗰一年半載，我真係唔知自己做乜，做咩要幫啲 15歲嘅人解決愛情問題？黐膠線㗎！我係放工會揸車走上去大帽山頭嗌㗎，嘩──咁囉……」我質疑主持深宵 phone in節目使唔使抑鬱到咁？鄒凱光即反駁：「你試吓！仲要戴住 headphone、仲要代入佢哋角色喎！」然後嘟起嘴唇、鍊住喉嚨即場示範用 15歲少女聲發聲：「唉喲……係呀，個男仔咁衰呀？ 16歲呃你 15歲呀？……要入佢 channel㗎，小姐！直到有一日，同個朋友傾偈，佢話得啱，我哋，某程度係佢大哥哥大姐姐，聽佢講一句，可能成為佢成長中好重要嘅角色。」
除咗主演暑假檔喜劇《飛虎出征》外，鄒凱光下半年亦將再做導演，提到戲中拍檔杜汶澤：「我哋冇反面、亦都冇 friend番，從來冇 friend過。」
給鬧過的女孩們
儘管一個星期五晚節目，幾乎晚晚都會爆，愈爆聽眾愈愛，鄒凱光還是說， 30歲以後，脾氣收了不少，年輕時一觸即發、一發不可收拾，專揀啲女朋友及的士司機落手。
鄒凱光極崇拜好友陳可辛及吳君如：「我哋生小朋友，係話佢知個世界有幾殘酷，但做吳君如同陳可辛個女，係話佢知佢生喺呢個家庭有幾幸運。」《忽然 1周》圖片
「廿幾三十歲時，我最鍾意當街當巷鬧女朋友，食食吓飯又指住佢咆哮：『係唔係唔想食！係唔係唔想食！！！』好彩以前電話冇得拍片，如果唔係我實係 YouTube點擊出鏡率最高鬧女王，港九新界離島都鬧勻，全港市民都識我：『嘩，乜又係佢呀！』」還有鄒凱光話自己前世欠落的士司機：「以前我係上車前度定㗎，咦……講句咩『 un』住個死人的士佬呢？落車再要加多句：『死人的士佬，抵你一世揸的士呀！』有時就算諗唔到嘢講，打電話去煩佢一日都好㗎……其實鬧贏的士佬有幾型呢？鬧得盡，自己落車都過意唔去，使唔使去到咁盡。你落咗車，俾個的士佬咒足一日，咪又俾負能量跟足一日，自己唔抵囉。我呢幾年少鬧咗的士司機，以前用腦去度點「 un」佢「 un」一日，𠵱家個腦用番去度有用嘢，咪幾好，不過前幾日皮質醇升高，唔小心又衰咗。」
話說較早前電召的士，司機提早到場又不肯多等幾分鐘，等鄒落得街已經不見蹤影，鄒凱光於是火都嚟打去的士台興師問罪：「我嗰日真係低，遇到菩薩，我一味鬧，佢就一句聲都唔出。我中咗計，講咗句：『你唔好×唔出聲呀！』佢先至出聲：『你講粗口呀，咁冇得傾啦！』跟手收咗我線……唔係佢高呀，係我低過佢囉。其實我真係計劃寫一本書，同我鬧過嘅女朋友、其他人講句對唔住。不過未夠吖嘛……係我道行未夠，都係會爆。」
冇同杜汶澤 friend番
二千年，食正《男親女愛》條水，搵黃子華搭梅艷芳拍《男歌女唱》，以為掂硬，結果上畫一個月僅收 127萬票房。《蘋果日報》圖片
對住女朋友同的士佬極火爆，相對來說，入行 24年的鄒凱光，在行內惹的是非已經算少。繼合作主持《在晴朗的一天出發》激到盧覓雪辭職後；兩年前又曾經因為《 3D肉蒲團》在微博與杜汶澤掀起罵戰。不過呢個世界冇永遠敵人，繼與盧覓雪握手言和後，灘叔最近與杜汶澤又 friend番，合作演出電影《飛虎出征》。
「你千祈唔好話我哋 friend番，我冇同杜汶澤反過面、亦都從來冇 friend過，有嘢做、見多咗，就係咁。我冇乜圈中朋友，夾硬講得一個吳君如，佢對我嚟講係一個恩人，做電台係佢搵我，係佢同我講，冇 step 1就唔會有 step 2。到我開發到電台呢條路，又係佢同我講喺電台咁多年，係時候出番去做戲，唔好脫離本行，佢同陳可辛次次有戲、有飯局都記得搵我。呢行好多人見到你好熱情，但個個都係夾硬 chok個樣出嚟，我好享受同吳君如嘅關係。」
鄒凱光歷年電影成績，客串賤男及編劇作品最深入民心，尤其是 98年編劇的《生化壽屍》，絕對是本港 cult片經典。
當年捕魚收穫豐
最後，循例講吓愛情，鄒凱光話，現時閒閒哋有十幾廿個女朋友，成個電話簿全部都是女朋友，年輕的時候已經不相信不奉行一對一的感情關係，現在更甚：「我成日覺得，啲男人有能力可以照顧多幾個女人，點解要一對一？以前晚晚出去蒲，海面海產咁豐富，又冇休漁期，晚晚如是，食得一件係一件，狀態好咪食東星斑；唔係咁掂，嗰晚咪食泥鯭囉……𠵱家係我自己冇呢個癮，所以我話後生真係要玩，壞事做盡。𠵱家我啲關係唔再係肉體行先，女朋友多啫，但係話畀你聽，搞嘢，我好耐冇搞。」
話題再次講到去曾經大鬧過的女朋友們，鄒凱光口講話想寫書向前度們道歉，不過講講吓，又覺得其實是自己打救了前度們：「我成日聽電話都同啲𡃁仔講，女朋友唔可以縱，係要縱，就唔該你縱到去分手、縱到去佢死嗰日為止。唔好為咀佢剝佢衫就幾日，到你搞完人，又覺得縱佢好傻。我啲女朋友，講得嚴重啲，係教育。我脾氣大，好多女朋友係都要遷就我，用咁嘅方法得到我芳心，惡性循環，搞到我脾氣愈嚟愈大。其實我哋分開都唔係淨係我唔着，佢係唔係冇嘢賺呢？都唔係㗎，佢都學到一段關係，唔係一味遷就就得囉。」
專揀啲食得住嘅弱女呼呼喝喝，但是遇着多年女神舒淇就沉默是金驚破壞形象，我問鄒凱光：「你啲前度學到嘅咪就係，下次千祈唔好再搵你啲咁嘅男人囉！」
鄒凱光答：「都可以咁講，不過我唔會話自己係『啲咁嘅男人』。」
鄒凱光說自己一直是母親最擔心的一個：「相士同佢講個仔會撈偏門，阿媽以為係行古惑返嚟日日喊。佢唔係驚我學壞，係覺得我冇用，好快俾人斬死。」 
96年任《百分百感覺》編劇，鄒凱光與鄭秀文合照：「其他女人我冇嘢，但係女神舒淇，我永遠唔會行埋去，費事講嘢唔好笑破壞形象。」
零污染
說話一輪嘴，與鄒凱光齋 talk個半鐘後，雖然歪理謬論極多，修辭論據亦頗刻薄，不過老老實實，記者和攝影師笑咗幾勻，確係幾歡樂。有關尋開心，鄒凱光說，其實很簡單。
「唔做《晴朗》以後，我再唔睇報紙新聞。我細個住葵盛，下下走過球場就俾啲古惑仔兇。望吓你，佢話望咩望，打你㗎。唔望嗰日，佢又話做咩唔望我？又打。我咁辛苦，由個歪理世界走出嚟，做咩又要走番去嗰個扭曲、靠吹、預先設定立場嘅新聞同網絡世界呢？睇少啲信少啲，就唔會污染自己嘅 timeline。」
撰文：朱小博
攝影：范仲良
髮型： Arthur Poon@Salon Core
化妝： Yen Lai
眼鏡： Visual Culture Optical
形象： Bryan@the Flaming
服裝：:CHOCOOLATE
地點提供： FACTORY99
留言列表
