一連四場達明一派紅館演唱會，上週五（20日）晚開騷，難得黄耀明同劉以達隔咗8年再合體，當然要玩大佢。


明哥一向形象出位，當晚唱首本名曲〈禁色〉時，就着上全黑戰衣，最特別係頭上頂帽竟然用「何B仔」做裝飾，FBI都嚇一跳。講到全場高潮位，就係明哥唱新歌〈It's My Party〉時，舞台上大熒幕彈出「黄耀明是同志？……神愛梁振英同志……。」等語帶雙關字句，借玩政治gag出櫃、之後又彈出唐唐金句：「你講大話/你呃人」寸爆唐英年。攞自己同志身份搞gag，事後明哥鬼馬話：「我係咩人大家都知道，只係熒幕上出現嘅名人唔承認係同志，我都唔認啦，可以畀傳媒有嘢寫。」識借「同志」撈版位，明哥醒爆。唔只明哥醒，連劉以達都精靈埋，演出時識望住超大貓紙「提詞器」唱歌，真係服咗佢。

最強提詞器
演唱會唔係淨係明哥唱，拍檔劉以達亦開金口唱飲歌〈排名不分先後左右忠奸〉2012新版時，為怕唔記得歌詞，達哥就一路望住安置喺控制台下面嘅特大提詞器嚟唱，唔怪得冇甩轆啦！

飛機頭
達明一派出名形象獨特，當晚梳上一個飛機頭，而頭髮尖更可隨時變形，夠晒盞鬼。


達明一派有好多歌諷刺時弊，演唱會當然唔放過機會，擺之前參選特首嘅唐英年同梁振英上枱，玩一餐。 ####



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄