Geek友講場

手機大國軟實力 換機吧金仔

北韓金仔成日話要開戰,唔單只將導彈搬出搬入,近排仲喺網上流出一堆北韓美女兵團照片,大晒軟實力。講到軟實力,同佢關係緊張兼密切嘅南韓、日本、中國同美國,最近都齊齊喺手機界晒冷出王牌。先嚟南韓最強嘅 Samsung GALAXY S4喺香港發布,跟手有日本 Xperia抵玩出戰,強國則有中興代表,而美國就新出個 facebook Home,幫你將手機改頭換面,好似想迫金仔換走玩開嘅 HTC一樣。

Spec.


我用開 HTC,唔好引我!(設計圖片、對白) 

系統: Android 4.2.2
處理器: 1.9GHz四核心( 4G版)/1.6GHz八核心( 3G版)
記憶體: 2GB RAM
制式: 4G、 3.5G、 GSM
屏幕: 5" 1,920× 1,080
鏡頭: 1,300萬(後)、 200萬(前)像素
記憶:內置 16GB、最高 64GB microSD
體積: 136.6× 69.8× 7.9mm
重量: 130g
顏色:黑、白
售價:$5,898( 4G及 3G版價錢相同)
查詢: Samsung( 3698 4698)

我會選 4G


《 FACE》 Gadget版監修人903 DJ Donald 

我一向覺得 S III表現好好,所以無論 S4定價如何,一定買!不過我就會買 4G版本,始終自己唔多打機,對上網速度要求反而高啲!最想試玩 S Translator,好似好實用。仲有可以即刻執走閒人嘅橡皮擦,香港地咁多人,呢個 function應該成日用得着,希望表現好啦!

王牌出場 Samsung GALAXY S4

南韓除咗有 K-Pop,軟實力必數 Samsung同搵嚟 Super Junior主將崔始源日播夜播嘅「 Line你埋嚟」。 Samsung王牌新機 GALAXY S4,今個月 19號終於到港。發布會雖然冇美國嗰次咁多表演,只係簡單搵南韓高層介紹新功能,不過都成功迫爆會展!記者拎到真機上手,真心覺得好輕巧,完全感覺唔到佢已用上 5吋大芒。最驚喜係佢條金屬邊,真係以金屬打造,唔係油銀色就算,手感唔錯。


機側包齊金屬邊,一洗膠味。 

拍埋上代 S III旁,外形真係唔覺有太大突破,不過身形更纖巧,睇唔出 S4原來加大至 5吋芒。 

一睇厚度,就知 S4簿咗幾多,視覺上極之接近 iPhone 5,其實實際數字係厚多 0.3mm。

指定動作:南韓高層帶住 S4現身。 


拆開機背, microSD插咭槽同換電功能喺齊度,難得係繼續用 microSIM,要瘦身唔係靠 SIM咭 1、 2mm嘅!

4核定 8核

之前好多人講嘅「 4核+4核」新規格,原來只限 3G版 S4, 4G版就只得 4核心,價錢一樣。先試 4核心 4G,表現合乎想像,再試「 4核+4核」新規格,試玩光學閱讀器、 Air View等新功能,感覺有啲快無可快,要跑分同玩勁複雜嘅 game先發現分別,反而覺得上網速度更強嘅 4G版,上網真係一 load就有。唯一失望係之前令阿奴同好多三星粉絲期待嘅 S Translator即時傳譯,仲未支援粵語,希望快啲更新啦!

試 Air View

S4唔連 S Pen,但一樣有 Air View功能,即係話用手指凌空篤芒,手機就有反應。打開手機相簿,手指凌空掃到其中一個相簿,就會打開個預覽小圖示,見到 file入面嘅相。

試光學閱讀器

打開個 app,鏡頭就會開,對準文字,就識得變字典,搵出解釋同讀音;佢仲可以 scan埋 QR code,以後唔使再另裝 app。實試中英夾雜嘅句子就譯唔到,暫時只譯到單一語言。

試 S Translator

對 mic錄完句英文,手機即時翻譯成中文,按人頭 icon,更識以普通話讀出,可惜未支援廣東話。

好玩攝影法

等咗咁耐, Samsung終於肯將相機像素升級至千萬級別。 S4唔只像素升級,亦加入好多新影相功能,唔計 filter,都有 9大種玩法。好似 Drama Shoot可以一口氣連拍 5秒,將人物嘅連環動作合組成相片,夏天影朋友做運動,好似動畫相片一樣,連拍 5秒相片合組成 gif圖,出嚟效果十足 stop-motion咁。加埋其他影法,真係全日都玩唔晒。

實試 Dual Shoot


可以自訂小圖嘅畫框,仲能夠喺畫面上拉來拉去同縮小放大。 

先前於美國發布時,率先介紹嘅 Dual Shoot,可以同時用盡前後鏡頭,用前置鏡頭影埋揸機者,再將影像合併去後置鏡頭嘅影像內,影合照更方便!

 

 


一打開相機介面,同之前有唔少改變,左上角除咗揀影相功能外,仲有 Dual Shoot嘅相機 icon(紅圈),直接擺埋喺介面上,而下方仲可以直接加 filter,好易用。 

人像試相於發布會上試影 model,因現場好暗,加埋屏幕對比,好易搞到 model面容暗淡。不過影完放電腦睇,起渣問題都唔算大, model髮絲都睇得清楚。 

夜景試相實試夜景拍攝,對焦快,夜晚嘅雲都影埋出嚟,層次感唔錯。

試 Drama Shoot可以將 5秒內嘅動作合併成一張相嘅戲劇效果,真係幾靚。不過記得主角只限 1人,如果想影成隊人打波就唔 work喇! 

fail圖5秒效果其實唔易掌握,跳起嘅一刻可能太快同太細微,有可能會「斷片」有鬼影。 

好玩橡皮擦可以將後面途人「擦走」嘅橡皮擦,係阿奴最想試嘅新功能之一。我哋搵 Line公仔做主角,後面有班籃球員,發現只有最近鏡頭嘅(粉紅)運動員先會被「擦走」。

4G機價創新低
Sony Xperia SP


強烈爭取北韓有 4G!(設計對白) 

南韓雖有超強 S4,但日本 Sony啱啱先出咗旗艦 Xperia Z冇耐,冇可能咁快又有新勁機,所以呢次就改派中階機 Xperia SP迎戰。部機睇牌面一定唔夠 S4勁,不過 Sony手機好似日本申辦 2020年奧運大使多啦 A夢咁,總會有法寶幫到手,今次嘅法寶就係平機價!事關佢定價只係$3,398,比之前最平嘅 4G機 HUAWEI Ascend P1 LTE($3,680)再平近$300,成為目前最平 4G行機!話晒 Sony係日本大廠,入門用家轉用 4G機享受高速網絡,絕對有信心。

Spec.

系統: Android 4.1
處理器:雙核心 1.7GHz、 1GB RAM
制式: 4G、 3.5G、 GSM
屏幕: 4.6" 1,280× 720
鏡頭: 800萬像素
記憶:內置 8GB、 microSDHC
體積: 130.6× 67.1× 9.98mm
重量: 155g
售價:$3,398
查詢: Sony Mobile( 8203 8863)

電視玩 game駁手掣

Xperia SP嘅法寶唔只平機價咁簡單,原來佢都有其他新功能做賣點。最特別係可以駁到 DUALSHOCK 3手掣,再靠 HDMI線或無線 DLNA連接大電視輸出畫面,咁就能夠似足打 PS3咁玩 Android game,一定爽過喺個芒仔篤啲細細粒嘅虛擬掣!另外,佢嘅 NFC系統亦新增 One-touch功能,只要同任何內置 NFC嘅無線配件拍一拍,兩者就會接通,比以前嘅配對程序簡化得多,啱晒懶鬼。


有線或無線駁電視嘅方法同普通手機一樣, DUALSHOCK 3就好似駁 PS3咁,要先經 USB線連接一次,然後就可以無線玩。 

就係咁樣同 NFC無線耳筒等配件拍一拍,嘟一聲就會接通,再喺手機㩒個掣確定就搞掂。 

久違滲光機邊

Sony手機畀到人信心嘅,仲有佢嘅 design,今鋪 SP有番上幾代 Xperia手機經常出現嘅滲光透明機邊,配埋日系味道設計,拎出街嘅自我感覺良好。而且佢個 720p BRAVIA芒,同埋 f/2.4大光圈 800萬像素鏡頭表現亦保持一貫水準,唯一失色只係仍然行雙核 U,好彩試用後覺得速度可以接受,中階平機要將就少少。


試 4G開 YouTube app睇段 1分 32秒嘅 HQ多啦 A夢片,唔使等就有得睇,速度同$5,000以上旗艦 4G機冇分別。 

試芒屏幕雖未達 1080p級數,但經 BRAVIA Engine處理嘅 720p畫面,細緻度同色彩都正過唔少同級機。 

試相雖然 noise比較多,但整體仍 keep到 Sony手機嘅不俗相質,用 f/2.4光圈鏡頭影相亦夠晒明亮。

紅、黑、白 3色機背配埋有少少弧度嘅設計,睇落幾靚仔。 

抽起晒芒底實體掣,所以 back、 home、 multi-task 3粒掣變成虛擬掣長駐介面,好彩 4.6吋芒都算大,唔太阻碇。 

機底條透明邊,播歌或好多時篤芒都會滲出 7色燈光,引人注目!

繼續鬥平 Sony Xperia L

嚟緊 Sony仲會出多部 Xperia L,主要功能同 SP差唔多。只係冇咗 4G,屏幕 downgrade至 480p芒,同埋改用粒再慢少少嘅 1GHz雙核 U,但就換嚟更低嘅$2,498機價,最啱入門用家上車。

Spec.
Android 4.1.雙核心 1GHz. 1GB RAM. 3.5G、 GSM. 4.3" 854× 480屏幕. 800萬像素鏡頭.內置 8GB、 microSDHC. 128.7× 65× 9.7mm. 137g
售價:$2,498
推出日期: 5月

抵用祖國機  ZTE Blade L

韓日 Android機雖然正,但金仔咁敵我分明,要引到佢用實在唔係易事,反而北韓同中國關係咁好,引到佢用大陸牌子手機嘅可能性最大,彼此可能真係好似《喜羊羊》咁喜洋洋。最新嘅中國代表就有 ZTE(中興)呢部 Blade L,呢個牌子曾俾美國屈係間諜,應該同金仔一樣咁憎美國,大家口徑實一致!咁部機最大賣點係咩呢?唔使講嘢,又係一個字——平!連 Sony手機都劈價到兩千頭, Blade L梗係更加平啦,$1,999有交易,金仔用佢實唔會俾人話奢侈!


可拆殼換電同插 microSD,仲支援雙咭雙待,不過只有一條槽對應 3.5G,另一條只對應 GSM SIM咭,啱上大陸用。 

純白機背冇乜 design,但起碼冇畫蛇添足,拎出街唔失禮。 

10.5mm機身算幾厚身,而且 200g重量亦幾墜手。

硬件未算強

Blade L仲主攻另一賣點--大芒!佢個 5吋芒雖唔夠 5.5吋嘅 Samsung Note II等機大, 800× 480解像度亦唔算標青,但機價平人$3,000幾,仲想點?就算佢仲係行緊雙核心 1 GHz CPU,同埋只得 512MB RAM,筆者用慣四核旗艦機,硬係覺得連捽介面嘅反應都有少少窒,但一般入門用家相信會接受到,幾啱只求大芒睇得清楚、對其他規格要求唔太高嘅人。尤其係送部畀父母,等佢哋可以同你用 WhatsApp聯繫,點都好過送不知名山寨機啦!


試芒Blade L個 5吋屏幕比 5.5吋嘅 Note II少半吋,但機身就同 Note II差唔多大。論畫質就梗冇可能同 Note II比,好在唔算差好遠。 

試相500萬像素鏡頭質素一般,相片矇矇哋,一睇就知係手機影,但相質總比山寨機好。 

Spec.

系統: Android 4.0
處理器:雙核心 1 GHz、 512MB RAM
制式: 3.5G、 GSM
屏幕: 5" 800× 480
鏡頭: 500萬像素
記憶:內置 4GB、 microSDHC
體積: 148× 78× 10.5mm
重量: 200g
售價:$1,999
查詢: ZTE( 2245 7773)



用中國機,喜洋洋!(設計對白) 

介面冇乜特別新設計,幾重原生 Android味道,但影相選項好齊,亦有唔少顏色、美顏 filter玩吓,值得一讚。 

試效能《 Candy Crush》對手機要求唔高,用 Blade L玩都唔會慢,只係玩 3D game時有啲窒。 

平用 IPS
ZTE Blade G

同期 ZTE仲有部 Blade G,粒雙核 1.2GHz U反而比 1 GHz嘅 Blade L勁少少,而且用較高質嘅 IPS芒,只因屏幕得 4.5吋,比 Blade L細半吋,所以仲賣平$119,唔使太大芒嘅慳家人士可揀呢部。

Spec.
Android 4.0.雙核心 1.2GHz. 512MB RAM. 3.5G、 GSM. 4.5" IPS屏幕. 500萬像素鏡頭.內置 4GB、 microSDHC. 133× 67× 9.8mm. 140g
售價:$1,880


因屏幕細咗半吋,但解像度 keep住同 Blade L差唔多,再加埋 IPS高質芒,所以畫面睇落仲細緻過 Blade L。 

手機軟着陸 facebook home

一向強硬嘅美國,除咗有 Apple喺手機界擔任重炮手,軟件代表必數 facebook!之前盛傳嘅 fb手機得個講字,反而將 fb化身手機介面嘅 facebook Home,今個月 12號就喺美國 Google Play登場。香港玩家暫時要下載 apk檔先玩到,裝完之後,朋友擺上 fb嘅相片會變晒做你手機動態 wallpaper不斷 loop,左下方仲有齊留言同 like嘅操作,向左面掃一掃就可以睇近況。最搞笑係自己張 profile picture變埋做手機 home掣。想打電話咩? Sorry,要退出成個 fb Home先做到,呢點真係要時間適應。


美國有我做代表!(設計對白) 

我宣布,北韓人民今日開始可以玩 facebook!(設計對白) 

3大必識操作
①篤自己

 


重點操作長按自己個樣,就會彈出 3個操作,將個樣拉去左面個「即時通」 icon就可以用 facebook Messenger傾偈,上方「應用程式」係開啟程式集同發布近況,想離開 fb Home介面就係右面 icon。 

Messenger同朋友用 facebook用 Messenger傾偈,對方張相都會變成圓形 icon喺畫面上出現,如果想對方消失,長篤佢個樣拉去最底就得。 

隨時簽到打開應用程式,上方有齊簽到、發近況功能,下面就可以直接開手機 app玩。

②長按

睇番原相
朋友擺上 fb嘅相會變成 wallpaper,不過如果張相唔 fit手機屏幕的話,就有機會睇唔晒。想睇晒成張相,就要長按畫面。

③雙 click

快速讚好
「 Like」作為 fb嘅偉大發明, fb home當然重點加強,只要於屏幕任何位置點兩下就可以 like朋友張相。反而筆者想問,「幾時有 dislike」?

乜機可以玩


於美國發布嘅 HTC First係首部內置 fb Home嘅手機,之但係 HTC證實,可以於設定內熄咗佢,咁算唔算剃 fb眼眉呢? 

只限美國 Google Play免費下載嘅 fb Home,香港 user要自行搵 apk檔下載唔難,反而最重要唔係部部機有得玩, iPhone當然免問。即使係 Android,暫時只得 HTC One X、 One X+、 Samsung GALAXY SIII同 GALAXY Note II可以玩。旗艦機如 S4同 HTC One,就要等一排喇!


撰文:鄺浿鏇、陳兆奇
攝影:葉偉豪、傅新發、黃家活

arrow
arrow
    全站熱搜

    tvb4life 發表在 痞客邦 留言(0) 人氣()