close
孫燕姿自從約一年前，嫁咗畀荷蘭籍印尼老公納迪姆後，明顯減產專心造人，舊年年尾，燕姿聽高人指點，將喺右眼角嘅桃花癦脫咗，高人話呢粒癦雖然旺佢桃花仲紅足十年，但唔利婚姻同影響生育，婚姻大過天嘅燕姿第一時間脫癦。唔知係咪真係咁靈，粒癦脫咗冇耐，就傳出燕姿陀龍B，因為未夠三個月所以好保密，仲勁推工作。
偕夫遊新加坡
燕姿幾低調都好，都逃唔過粉絲法眼，大前日有新加坡粉絲喺當地最新嘅Ion商場，遇到燕姿同老公拍拖喺美食街幫襯平價美食，仲將兩人撐枱腳照片放上微博，一向瘦削嘅燕姿着藍色鬆身衫背着鏡頭，但從側面睇嚟十分圓潤，手臂亦發福，散發濃厚孕味，而喺兩公婆撐枱腳前一日，燕姿亦被發現一個人逛百貨公司。經理人曹晉偉對燕姿將榮升媽媽一事，冇直接否認，只係話：「她沒跟我說。」對於推工作，佢亦含糊話：「她有想做的事，而且要籌備新專輯，才減少演出。」聽聞燕姿將會出席6月23日舉行，台灣樂壇一年一度盛事台灣金曲獎頒獎禮，屆時應該夠三個月，相信會有喜訊公布。
同老公納迪姆（右）喺新加坡撐枱腳嘅孫燕姿，着住鬆身衫都難掩圓潤嘅身軀。 微博圖片
孫燕姿舊年下嫁納迪姆後，減產專心造人。 台灣《蘋果日報》
孫燕姿喺新加坡行百貨公司血拼。 微博圖片
全站熱搜
留言列表
