潮𡃁便當

食版監修 Michael　台北直擊宵夜 36小時

好多香港人都喜歡去台北，焦點行程：搵食，同樣地 Michael亦然，對上一次才不過是 3個星期前的事，分分鐘去台灣多過入新界。
作為半個台灣地頭的 Michael（媽媽是台灣人），熟悉台北大小美食，加上有食量驚人到可以帶旺台北飲食業嘅巨胃，自然要請佢帶隊！
今次《 FACE》約咗 Michael 3天，晚上 6:00至早上 6:00，摸黑 36小時食盡台北宵夜！

Day 1凌晨 2： 00　人潮爆到 2am　開胃黃瓜涼麵

好多香港人去台北食涼麵，都會揀陳家，不過 Michael選的是劉媽媽，的而且確，氣氛環境極街頭 feel，凌晨 2點仲大棚人坐到出門外，燈火通明，馬路旁停泊咗一輛輛烈火戰車，似係夜蒲友蒲完找吃，熱鬧又有靚車睇！這裏有名的涼麵，只簡單加入麻油同糖，師傅不停用筷子挑動，以一把大風扇吹涼，弄好後由幾個熟手阿姐放入黃瓜絲及麻醬，涼涼哋嘅麵、爆到上嘴唇的香濃麻醬加「索索」聲黄瓜絲，大熱天時食分外涼快！

涼麵$13(大)涼麵內每口爽口黃瓜，口感一流，再配以香濃麻醬，幾躁底都降火！ 

三合一約$9.7由貢丸、蛋花味噌湯組成，蛋花特滑，配麵吃正！ 

Michael：自從陳家涼麵裝修之後，已經大不如前，所以我揀劉媽媽。

劉媽媽涼麵
地址：松山區市民大道五段 37號
電話： 02 8787 2093
營業時間： 11pm-9am

Day 2晚上 6:05　日賣 2,000碗　無限任加湯肉燥

去到好記，見到滿是古舊餐桌座椅、木櫥櫃及掛畫，勁 vintage，原來這間只是新好記。好記由三家餐廳：舊好記（擔仔麵）、新好記(宴會廳)及阿美飯店組成，成立於不同年份，見證着好記的發迹。專營擔仔麵 20年，曾創出每日賣 2,000碗的紀錄，多年來仍以免費加湯加肉燥吸引大批客人，加上湯底用上蝦殼、豬骨熬製，麵條爽滑彈牙，鮮香味引死隔籬。擔仔麵以外，新好記及阿美飯店則提供各式小菜如煙水沙魚肚、三杯雞、扣肉、粉肝等，口味各適其適，如果再啪多支懷舊波子汽水，簡直好似時光倒流二十年咁！

煙水沙魚肚$28 

擔仔麵$10 

炒櫻花蝦$41.7櫻花蝦甘香帶辛而且卜卜脆，好惹味！ 

波子汽水$10 

好記擔仔麵
地址：中山區吉林路 79號
電話： 02 2521 5999
營業時間： 11:30am-2pm、 5pm-3am

Day 2晚上 8:13　性格老祖　夏全休炭燒羊肉店

曾經在香港見過小店只開星期六、日，以為已經係性格系元祖，不過天外有天，台灣呢間羊肉爐店先係老祖，每年 4月底至農曆 8月都唔會開鋪，謝絕開冷氣打邊爐習慣。這裏的羊肉爐， order後由店員立即以炭火透爐，熱透後連火帶爐上枱再燒，湯底有羊腿配上川芎、黨參、當歸、紅棗、杞子等，滾起飄來令人食指大動嘅藥材香及羊肉鮮香飄勻成個場，當日下着毛毛雨、涼涼哋面對大街食，一流配搭，終於明白，店鋪點解夏天收爐。

羊肉爐$209 

麻油麵線$14白色似係冇味米線，有強烈麻油同蒜香，而且滑不溜口，簡單得來好味。 

Michael：聞到羊肉藥材香，未食口水先流。

正土產烘燒火炭羊肉
地址：中山區民權東路二段 135巷 31號
電話： 02 2503 6213
營業時間： 4pm-1am

Day 2晚上 12:30　喪攪拌 uncountable　牛精華肉麵

來到台灣，牛肉麵是定食！八德路的林東芳是 Michael推介。頭啖湯清淡之中帶藥材味，麵條略帶嚼勁，頗為彈牙，所謂牛肉，其實是香港人說的牛𦟌，肉中帶筋，牛肉味愈食愈出。想了解這碗牛肉麵的美味真諦，不得不提店外三個大鍋，第一鍋牛汁煮到呈深黃色，極濃，另一鍋盛載着清湯，頭啖湯味道正正原於此！最後還有一個煮麵大鍋，煮麵師傅收到 order之後，會將為數 7-8碗分量的麵條放進鍋內，然後不停攪拌，其間更會將麵條撈上來略為透氣，為時達 5分鐘之久，少啲臂力都唔得，難怪麵條咁有質素！

第一鍋（左手邊數起）盛載着由早上開店到關門不停熬煮的牛肉汁，賣完再落再煮，所以集合了數唔清咁多牛肉的精華。 


半筋半肉麵$53又有牛𦟌又有牛筋，前者牛肉味愈食愈濃，後者爽口煙韌有膠質，加埋好咬口麵條，捨不得吞下。 

辣油$31/樽呢度亦有自家製辣油，以辣椒及牛油熬製而成，望落去似濕咗嘅泥，入口帶微粒，辣味食到尾嚟料。 

林東芳牛肉麵
地址：中山區八德路二段 274號
電話： 02 2752 2556
營業時間： 11am-6am

Day 2晚上 2:25　運食 3碗 36C貢丸王

同 Michael食嘢，發現佢至愛貢丸湯，閒閒哋一餐 3碗。分成 4片好似朵花咁嘅貢丸，入口彈牙，肉身帶強烈胡椒香，配清淡滑爆蛋花湯同吃，正好是連串宵夜的消膩湯，飲食完可以繼續吃！不說不知，這間位於南京東路小巷不起眼的街邊檔，原來已經有 40年歷史，至今傳到第三代，由第二代劉先生以家鄉「東引」命名。除了特大貢丸，這裏麻醬麵同樣出色，極濃極杰，離遠都聞到，食完麻香好持久，唔試唔得！

蛋花貢丸湯$14（大） 

麻醬麵$17(大) 

台灣可愛大男孩小天就住附近，亦是東引座上客。

Michael：東引的貢丸好似桌球咁大，簡直係貢丸界的 36C。

東引小吃店
地址：松山區南京東路 5段 291巷 20弄（南京市場內）
電話： 09 8723 4406
營業時間： 11am-5am

Day 2晚上 9:10　臭住過夜　街頭辣脆豆腐

香港臭豆腐就食得多，不過十蚊得嗰兩件，仲分分鐘唔好食添，台北嘅臭豆腐無他，平靚正而已，近乎香港價錢，卻有成 4大件，加入大蒜汁、辣椒、醋等，酸辣香勁開胃，外脆內臭，至緊要係嗰陣蒜頭味，第二朝都仲殘留口腔，名副其實：臭！

臭豆腐$11/盒 

脆皮臭豆腐
地址：中山區遼寧街 244號
營業時間： 11am-1am

Day 3晚上 12:00　考牙勁　 Q爆米苔目

網上勁多人都話高家米苔目好 Q，今次去開台北，點都要驗證一下。在一個自行搭製的土炮爐頭上，師傅馬不停蹄煮着一大鍋米苔目，以為白雪雪冇咩味，偏偏湯底清淡之中有油香，麵條以 Q彈香滑取勝，煙煙韌韌似食打邊爐魚麵，咬不停口。除了米苔目，店內亦有多款小菜，如大腸燒肉豬肝等，不過相對不及米苔目出色。

米苔目$8.3入口 Q彈好嚼勁，配埋啖啖葱味香，上癮！ 

紅燒大腸$22.2 

高家莊米苔目
地址：中山區林森北路 279號
電話： 02 2567 8012
營業時間： 8:30pm-5:30am

Day 3凌晨 1:02　人氣重口味滷大腸

米粉湯是台灣人傳統美食，近欣欣百貨附近這間胡記，有 45年歷史，湯底以蝦米熬成，呈奶黃色，入口鮮味，米粉粗身但嫩滑，好咬口唔易斷！此外，小店亦專賣豬大腸、豬心、豬舌等小吃，其中豬大腸可謂人氣之選，入晒味有極香濃滷水味，重口味怪至啱！

魯大腸頭$27.8 

魯肉飯$8.3 

米粉湯$8.3

胡記米粉湯
地址：中山區林森北路 283號
電話： 09 3851 6978
營業時間： 12nn-1am

Day 3凌晨 4:30　 24小時長開豆漿鋪

人是犯賤的，夜媽媽偏偏想食早餐雙寶豆漿油條！延吉街這家全日 on call的豆漿店，夜媽媽仲勁多後生仔嚟，個個唔係豆漿就油條，似係想彌補早餐當午餐食嘅空虛！豆漿仲有鹹有甜，前者加入蝦米，似飲味噌湯；後者唔似香港豆漿，一味加糖甜到死，味道較淡。除咗深宵早餐雙寶，小店更有小籠包及蛋餅等，餐牌最貴都不過$25，放任點都冇問題，香港點搵？

油條$4、豆漿$4 

湯包$17/籠 

原味蛋餅$8.3外層酥脆，唔似香港油條硬而厚。

宏記豆漿
地址：大安區延吉街 64號
電話： 02 2777 2663
營業時間： 24小時營業

宵夜之外 What's more！熱到台灣　咖啡弄也賣咖喱

香港咖啡弄熱到爆，去得台灣當然要到年輕人密集的東區咖啡弄睇吓。採訪當日下着毛毛細雨，仍不減人潮，店員跟門外客人說明要等候 40分鐘，客人仍然在屋簷下耐心等候，就知人氣一時無兩。提供窩夫、雪糕、咖啡等，水果如士多啤梨、香蕉、蘋果等，全是台灣貨，鮮甜味美。不過至搞鬼，都係撈過界出售咖喱牛腩，先喺香港店熱賣，𠵱家索性仿效港式咖喱造法，重辣香味，有別於較甜身嘅日式咖喱。

冰淇淋水果千層盒$47 

法國麵包佐咖喱牛腩$55.6 

店內兩名年輕店員，打扮新潮。 

香港咖啡弄選址在銅鑼灣邊寧街，本年 1月先開業，乃咖啡弄海外首家分店。 

咖啡弄
地址：大安區忠孝東路 4段 101巷 45號
電話： 02 2711 1912
營業時間： 12nn-11pm

Check！連城「訣」

正席旅遊淡季， travel唔揀𠵱家揀幾時？好似華航最近飛台灣再轉飛日本，就提供特別優惠計劃，其間仲可留台灣最多 7天，比平時轉機玩平成$500-1,000，連城狂玩！
另一邊廂， 4月 8日在桃園國際機場開咗全新的豪華 VIP Lounge梅苑，有齊按摩椅、沖涼房，仲可以用 iPad點牛肉麵食，勁潮！

連城任玩資料：
優惠期：即日-2013年 7月 10日
目的地：東京/宮崎/廣島/大阪/福岡/名古屋
可停頓地點：台北/高雄（可選出發或回程停飛）
費用：$1,230起（未包稅及燃油附加費）
查詢電話： 2868 2299
網址： http://www.china-airlines.com/hk/ 

撰文：梁智欣
攝影：何衡暉
鳴謝：中華航空
註：文中價錢已兌換成港幣（ HK$1=3.59NT）