29歲的阿威已成為一田百貨的倉務主任，看不出他以前也是頹廢青年一名。

青雲路

頹青大逆轉　 4年升 3級成主管

社會上不少老闆對 80、 90後青年的評語，多為沒承擔、好玩懶做，而阿威在 5年前正是一個沒方向、沒目標的 80後青年，遲到、早退是常事，在一田百貨任職倉務員期間更差點丟掉工作，但人事部給了他一次改過的機會，他痛定思痛，努力工作，在 4年間升了 3次職，現已升任倉務主任，可算是找回了自己的青雲路。

倉務員阿龍：入嚟做咗 1年，阿威成日教我哋做嘢，有時貨多，仲會一齊幫手搬，覺得佢真係關心我哋，係一個唔錯嘅上司。深知同事間的溝通十分重要，阿威有機會便會與下屬聊天，增加他們的歸屬感。

「做咩遲到呀？係咪噚晚玩得夜咗呀？下次唔好啦……今日會有特賣場，客人數量會比較多，大家一陣擺貨時留意番個位，唔好阻住通道同快手啲。」一田百貨大埔店的物流主任阿威正在與屬下開早會，分配好人手後便開始這天的工作。
見阿威拿着貨單在倉庫、店面、辦公室三邊走，十分繁忙，「主要都係喺貨倉做嘢多，𠵱家我唔使再搬貨，多咗跟單，好似睇番店面嘅貨有冇擺啱位，數目啱唔啱，睇吓邊度需要人手，如果有特賣場呢類活動先要同同事開早會。」
倉務員主要負責收送貨、倉存、貨物管理，亦要注意安全，「雖然講落簡單，但好似搬嘢要用正確姿勢，貨物數目要點算清楚，食物要留意番個保質期，用先入先出嘅原則。自己做咗咁耐都試過出意外，有次幫同事搬嘢入雪房，關門時俾個門柄𠝹親，喺手背𠝹咗成條血痕，一出力傷口就裂開，請假唞咗成個月先好番。」

曾經也是頹廢青年

雖然不用再搬貨，阿威仍要去貨倉核對貨品數目，確保沒有出錯。

今年 29歲的阿威，現時是 6人的主管，原來他曾經也是一名頹廢青年，「讀完中三後出嚟打工，做過跟車、保安、侍應、地盤及清潔等，但份份做落硬係覺得唔啱自己，又多人事問題，不時聽到是是非非，冇份做得長，大約半年就轉一次工。喺 00年去咗一田百貨快餐部做兼職，做落發覺冇乜是非，人事唔複雜，於是就咁做住先。」
那時全無方向的阿威，做事隨波逐流，沒有主見，「當時唔會話想升職，只係想賺錢去玩，屋企人成日叫我搵份長工，但自己懶唔想搵工，喺 06年見到一田物流部聘請全職倉務員，唔想俾屋企人煩就去做住先。」
訪問時，記者發現阿威說話不多，很多時都是問一句才答一句，「可能第一次接受訪問比較緊張，其實𠵱家講嘢比以前多咗好多，身為上級點都要同下屬溝通，之前我好少講嘢，平時返工都係做自己嘢，同同事冇咩幾句，可以話對公司冇咩歸屬感。」

成日詐病返工遲到

戒了夜蒲後，阿威（後排右四）積極工作，和同事聯繫都多了，圖為他參加公司 annual dinner與同事合照。

阿威一邊做訪問，一邊回應屬下的提問，憶述以前的日子與現在可謂天壤之別，「以前返工等放工，一放工就同班 friend夜晚落吧、飲酒、去機鋪，玩到朝早 5、 6點先瞓，返工只係消磨時間，又唔係博升職，冇精神咪詐病請假囉，起唔到身就會遲啲返，一個月都有 7、 8日係咁。」
這樣的日子過了兩年，直至上司不能忍受阿威的所為，決定把他交給人事部，打算給他警告信，「上到去都知自己衰，人事部同事問我點解會咁，我咪講冇方向囉，自己都唔知想點，估唔到佢肯聽我吹，又慢慢開解我，之後仲畀多次機會我， hold住封警告信先。」
原來一田一向都很體諒員工，人事部回應話：「我哋一貫做法都會畀員工多一次機會，做咗輔導同勸籲先，冇改善先出警告信。」
回到家中，阿威反思了很久，「之前上司間中都提過我好幾次，不過都係聽過就算，今次隨時冇咗份工，返到屋企諗咗好耐，人事部嗰邊又講得冇錯，我做嘢太 hea又冇目標，出嚟做嘢咁耐，唔通真係想一世都係咁咩，𠵱家份工又唔係太辛苦，好似幾適合自己，唔想轉咪惟有改囉。」

投入工作減少夜蒲

一田百貨邀請阿威出席招聘會講座，分享自身的經歷勉勵年輕的求職者。

下了決心後，阿威開始減少夜間活動，全心全意投入工作，「發覺自己要改都唔係好難，可能夜晚去玩係因為空虛，一落決心想做好份工，就覺得蒲吧、唱夜 k真係有啲無聊，慢慢拒絕得多，班 fd都冇咩點搵我；返工時有嘢唔識就問，同事間亦講多咗嘢，投入份工後時間就過得好快。」
10年時，上司見阿威有所表現，升他為高級倉務員，「有日收到信話升我職，雖然知道只係資深啲，又係做同一樣嘢，但點都係人生第一次升職，嗰刻真係好開心，覺得自己嘅努力得到肯定，當中最大改變係成日返屋企食飯，仲記得阿媽問：『點解你咁早返嚟嘅？』」
事隔 1年，阿威在工作上積極表現，又熱心幫助新入職的同事，上司看他在教導新人上有些心得，於是升他為助理倉務主任，協助一些管理的工作。一田百貨打算在荃灣開分店，上年 7月上司決定推薦阿威升為倉務主任，等今年 6月荃灣店正式開幕時派他過去管理。

教導新人並非易事

阿威雖然不算年輕才俊，但在 4年間連升 3級，也實非易事，「望到啲新人好似以前嘅自己，唔想佢哋咁 hea，會同佢哋傾多啲，鼓勵多啲。加上𠵱家啲新人唔鬧得，試過有次新人成日遲到，我咪話佢幾句，佢仲惡番我轉頭，又話唔關我事，嗰次差啲打起上嚟，俾即場同事阻止咗，之後仲要氹番佢，𠵱家教人真係唔易。」
談到將來發展，終於聽到阿威肯定的語氣，「荃灣店會喺 6月開幕，公司會派我過去帶新人，做多啲關於管理上嘅工作，但其實都驚自己唔夠料，近排去報讀咗管理技巧及電腦應用嘅短期課程，想增值自己，唔想再令人失望。」

物流經理阿健：見到阿威嘅變化好大，積極工作之餘，仲肯教導新人，當人事部問我有冇人可以去幫手管理荃灣新店，所以我推薦咗阿威。阿威現在開始接觸管理人手的範疇，會與上司商量如何編製更表。

現在阿威為了以身作則，鮮有遲到、早退，但也笑言︰「一年都仲有遲 1、 2次嘅。」

好動的阿威，平時也會參與滑水等戶外活動。