日本蟾蜍（最受歡迎）簡介：地棲性，背上有紅點，顏色鮮艷，深受蛙迷歡迎，是日本獨有的品種。幼體價錢：$1,600罕有度：★★★★★（ 5粒星最高）

Petbook

喜愛毒物

在《射鵰英雄傳》中，歐陽峰專練毒功及蛤蟆功，獲得西毒的稱號，蛤蟆（蟾蜍）外形不討好，又帶毒性，鮮有人喜歡。但現實中 Herman喜歡飼養青蛙和蟾蜍，他不認為牠們樣衰，反而覺得十分有型，更無懼放毒，猶如西毒上身。

「蟾蜍好得意㗎，好似呢隻咁，日本漫畫《火影忍者》入面啲蛤蟆都依照佢哋嚟畫，聽完我咁講係咪冇咁抗拒呢？」說罷， Herman拿起一隻日本蟾蜍給記者看，雖然日本蟾蜍外形夠霸氣，十足武士，但知道蟾蜍眼後長有毒囊噴毒液，加上皮膚巖巖巉巉，記者對牠們仍有點抗拒。
有 20年以上飼養爬蟲經驗的 Herman，喜飼養爬蟲類動物，包括蜘蛛、守宮、蛇和變色龍等，貪其外形獨物，而屬兩棲類動物的青蛙和蟾蜍更成為他的新寵，原因是繁殖難度最高，最具挑戰性。「最初由養守宮開始，因為佢哋易養之餘，仲俾我成功繁殖到，自此覺得繁殖寵物好有趣，想試吓繁殖其他動物。」

黃斑樹蟾

簡介：半樹棲性，是極少數的樹棲性蟾蜍，雌性會有黃斑，黃斑愈多愈珍貴。
幼體價錢：$1,000
罕有度：★★★★★

金背蟾蜍

簡介：主要來自南美洲，腹部與身體側同色並分布有白斑，市場上屬罕有。
幼體價錢：$1,000
罕有度：★★★★★

番茄蛙

簡介：地棲性，番茄蛙因體型和體色似番茄而得名，表面有微弱毒性，觸摸後切記洗手。
幼體價錢：$800
罕有度：★★★★★

蠟白猴子樹蛙

簡介：樹棲性，樣子趣怪可愛，喜歡用四肢在樹幹上攀爬而不愛好跳躍。懂得用雙手捕食昆蟲，與別的品種習性有很明顯的分別。
幼體價錢：$900
罕有度：★★★

青蛙蟾蜍難繁殖

3年前， Herman透過爬友得知青蛙及蟾蜍比較難繁殖，香港好少人成功，所以想挑戰自己，「我由青蛙開始養，之後發現蟾蜍都好得意，不單外表有型，個樣比青蛙更加霸氣，所以我愛上埋蟾蜍。養落青蛙同蟾蜍嘅繁殖習性同守宮好唔同，佢哋需要一個自然生態環境先有交配意慾，要整一個自然盆景嘅飼養缸需要好多時間，我到依家仲未成功繁殖到，不過我會繼續嘗試，希望將來可以成功。」
Herman現時總共養了 15隻青蛙及蟾蜍，高峰時期曾擁有 30隻以上，約 9個不同的品種，由於青蛙和蟾蜍外表相似，很多人會以為牠們是同一種動物，「佢哋雖然同屬兩棲類，但其實好唔同，青蛙大多都係近水源，濕度要求比較高，表面光滑；蟾蜍就比較乾身，四肢粗短行動較慢，重點係佢哋眼後長有毒汁分泌線而青蛙冇。佢哋都有分樹棲同地棲性，顧名思義樹棲就係樹上生活，地棲就地上生活。佢哋咩都會放入口，無論昆蟲、雀仔、老鼠，只要放得到入口嘅佢哋都食，同類都唔例外。」

眼後長有毒囊，是蟾蜍其中一個特徵。

Herman每星期都會悉心照顧寵物，圖中他正為他的日本蟾蜍餵食杜比亞曱甴。

蟾蜍有毒冇有怕

即使蟾蜍帶有毒性，但 Herman笑言冇有怕，「雖則佢哋嘅毒足以毒死一個人，但只要唔係生吞佢，平時觸摸佢哋對人體冇影響，佢哋嘅毒囊釋放毒汁唔係為咗攻擊或者獵食，只係用嚟自衞，假設有一隻狗咬住佢，蟾蜍會釋放毒汁令隻狗吐返佢出嚟。」
Herman表示帶有毒性的青蛙比蟾蜍更強，在他飼養的青蛙中只有番茄蛙帶有毒性，「當番茄蛙受到攻擊時，佢表面會分泌出一種白色液體，雖然唔會致命，但會令接觸到佢嘅人皮膚紅腫同刺痛，並持續 3、 4個鐘，視乎體質而定，但只要摸完佢之後洗手，就唔會有問題。」雖然 Herman所養的青蛙和蟾蜍沒有屬瀕危動物，但他提醒要飼養的話，要先向漁護署（http://www.afcd.gov.hk ）申請牌照。