面對面
一個時代的終結。 鄭丹瑞
1976年，還是浸會學院傳理系二年級生的鄭丹瑞加入商業電台做節目主持，一轉眼， 37年，旦哥今年已經 58歲。
從商台到港台再跳回老巢商台，從電台撈到電影圈和電視台，旦哥經歷的是歌影視行業最輝煌的時代，是人人記憶中歌舞昇平香港最美好的時代：
那些年，小男人亦可以是大銀幕男主角，港姐決賽未淪落到變港女燴豬扒，我們都識唱十大金曲、都緊張最受歡迎男女歌手賽果……
然後「蓬」一聲，舞台從紅館移師到星期六晚 12點 15分的電視城一廠，對手從張國榮梅艷芳四大天王變成鍾嘉欣林欣彤，收視從 30點跌到 3點……改完再改的《勁歌金曲》終極改時段、換主持，上上個週六晚隆重推出，結果收視直迫亞視，旦哥說起來卻一點挫敗感也沒有：「觀眾同口碑要儲㗎，講緊星期六晚十二點三，一嚟就有 18點？你估我曉飛咩！做咗幾十年人，仲對收視有幻想咩？」
係囉，過往的標誌性皇牌音樂節目都攝到去週末深夜囉，還能有甚麼幻想？
林峯真心話
上週六晚，《勁歌》嘉賓是雷頌德、周國賢、梁漢文，收視未知，不過憑這個戲碼，很難樂觀。旦哥預告，訪問前一天，他還錄影了第三集，嘉賓是林峯、王菀之、徐子珊、張繼聰：「我問林峯，十年後佢嘅目標係唔係想做最佳男主角？又估佢唔到，林峯話，想成家立室、想做一套 Musical喎。仲有王菀之，佢一直夢想去英國街頭賣唱，原來已經計劃中、做緊添！呢啲嘢你平時邊會聽到？冇個零兩個鐘，平時點會問到出嚟？我就係要咁之嘛，理得你收視幾多，我 enjoy咪得囉！」
2012年，旦哥從 now回巢無綫，新《勁歌》擺明複製旦哥在 now的話題清談節目《 Home Sweet Home》，不過分別是，《 Home Sweet Home》的嘉賓講緊係劉德華、林子祥、郭富城；《勁歌》那些，旦哥說從來沒聽過他們唱歌：「我離開所謂嘅音樂節目，已經好耐，𠵱家嘅歌星，真係唔識，我完全冇諗過，有人夠膽死搵我做，真係想像唔到，嗰個成班 fans坐喺台下嘅《勁歌》，有乜理由搵我呢個阿叔走嚟主持呢？佢哋都唔識我乜水啦！係佢哋同我講會改喺深夜播，啱啦，我就係要呢啲之嘛。以前嘅大騷，下下 5、 4、 3、 2、 1，諗住有好多嘢講，其實得兩分鐘，我最後淨係可以講：『千祈唔好行開』同『又返嚟喇』……淨係講呢兩句，佢使乜搵鄭丹瑞呢？我唔平㗎！我唔曉飛，冇保證過有 30點收視。
「我做咗 12年《勁歌》， 10年《港姐》，都係歌壇同電視最輝煌嘅年代，係適逢其會，紅館漫山遍野都係人，每個觀眾都投入，邊個行出嚟都癲嘅，邊首歌響起大家都可以跟住一齊唱……我最唔鍾意講以前，但係今日啲歌手就係爭啲嘢。以前歌手唱歌，係我唱，你就一定要聽。
「𠵱家嗰啲變咗懷疑，懷疑自己會走音，懷疑台下有冇人鍾意；以前嘅渠道係大家，一個人聽歌，成條邨都聽到，成條邨都跟住一齊唱，𠵱家時代唔同，個個都對住自己個 mon.、插住自己個 headphone。我都冇睇香港電視好耐，我都係追開《我是歌手》（湖南衞視歌唱真人騷），人哋其實曲線鞭策緊我哋：若果再玩，香港派得邊個去參賽呢？唔好講過去，以前幾輝煌，俱往矣……香港要變、電視台要變，想電視台變並唔容易，我今次真係見到佢哋想變，先至會做之嘛。」
最緊要好玩
《勁歌》以前，去年回巢首個工作，是獲樂易玲委任，擔任第 26期訓練班總司令。旦哥說自己入行 37年甚麼都試過，除了全權培訓 36個新人：「咁多年，我好嘅醜嘅咩都試過，藝訓班？未玩過喎，樂小姐仲要畀我全權話事，即刻𦧲飯應。」
上堂三個月，實習兩個月， 36個學員，鄭丹瑞說是他 36個寶，下月 26期訓練班將行畢業禮，實習期剛屆滿，與學員合作過的導演 PA演員們一致向旦哥讚好：「教得三個月，每日十至五，我唔係神仙，唔係三個月之後一個二個就變咗影帝影后，我一嚟到，係幫佢哋開竅，教佢哋應有嘅態度：『你哋係嚟做茄喱啡，唔係天王巨星。』咩係茄喱啡應有嘅態度，就係講得笑，襟得×，×完你唔好嘴藐藐，仲要 say thank you。做呢一行，知道自己嘅位置最重要。」
《勁歌金曲》改革後變成週六深夜清談節目，鄭丹瑞說，這證明了不願變的無綫正在求變，是好事。 
《勁歌》以前，旦哥的工作是無綫第 26期藝員訓練班總司令：「從 1,800個人揀 500個人，再親自 hand pick36個學員，揀得佢哋，每個都係我個寶。」
這句話，鄭丹瑞不是得把口。即使曾經是最紅的 DJ、最有代表性的小男人，即使 89年把廣播劇《小男人周記》搬上大銀幕，狂收 1,700萬票房，鄭丹瑞還是把功勞歸功於大氣電波的威力以及老朋友林子祥：「我成日話，係呢行揀我，唔係我揀呢行。我開頭以為傳理系係傳道㗎，我又唔係教徒，做咩讀傳理系？唔係數學唔合格，入唔到港大，我點會入傳理系呢？《小男人周記》開拍，我第一個搵都係許冠傑，阿 Sam話：『我咁大隻，點做小男人？』再搵譚詠麟，阿倫冇期，搵到去林子祥，佢話聽眾聽咁多年廣播劇，我先至係佢哋心目中嘅小男人之嘛！」
81年結婚、 82年大女兒出世，鄭丹瑞說兩個女兒長大以前，總是怕錯過家庭樂，時常推 job。女兒先後出國讀書，家裏又剩下自己和老婆兩個，時間多了的鄭丹瑞開始心郁郁再想做導演，又寫了個劇本《再戀愛》，說的正是女兒離家、小男人變成老男人、再和老婆二人世界談戀愛的故事。
「再拍戲，我梗係唔做得主角啦，鄭丹瑞？邊個識？邊個肯買飛入場睇？鄭丹瑞主演，啲院線老闆肯唔肯安排上畫都成問題，都係嗰句，做呢行，要知道自己嘅位置，去到呢啲地步，仲有人搵你做《勁歌》，仲要人叫你一聲旦哥，好感恩㗎喇！鄭丹瑞喺呢行，係一間 boutique、精品店，我冇公司，我做嘅嘢就係靠有商譽，我嘅商譽，就係三個字，鄭丹瑞。」
07年做完處境劇《高朋滿座》，旦哥離巢，曾經在 now主持清談節目《 Home Sweet Home》，嘉賓真正粒粒皆星，高朋滿座。 
當年勁歌總選，穿起踢死兔的鄭丹瑞對住班歌星、嘉賓是周潤發、張國榮、梅艷芳。現在，旦哥話唔識班歌星、未聽過佢哋唱歌。《城市周刊》圖片 
86年推出的廣播劇《小男人周記》，成功衍生出小說、電影、電視單元劇和節目，旦哥可以說是香港最入型入格的小男人。
R背脊與露背脊
除了 DJ、導演、編劇、作家、電視劇和電影男主角，想當年，鄭丹瑞亦唱過歌。作為全香港最有代表性的小男人，演丈夫，他總是被老婆恰到上心口；做父親，他最出名是「那夜我幫女兒 R背脊」。去到邊都被女人食住，鄭丹瑞說：「當年睇相先生話我桃花相，我不知幾開心，原來係話我一屋女人。係樂意嘅，為佢哋帶畀我嘅快樂，冇任何其他嘢可以代替。」
幾個月前，鄭丹瑞的《女兒考古》成為網上潮文，是的，一眨眼，大女兒 21歲，在美國讀政治，下月畢業；小女兒，即是在英國讀考古那個，亦已經 20歲：「啲女以前喺身邊，一年學校見兩次家長，轉個頭，吓，又見家長？唔係啱啱見完咩……原來時間就係咁流逝，見一次家長、考一次試、放一個暑假，吓，小學啦？吓，升中啦？吓？咁就上飛機讀大學啦……我仲記得，我大女 18歲嗰年，當時係 5月， 8月佢就要飛去美國讀書，有一晚我去做嘢，泊低架車喺馬會，轉小巴出銅鑼灣做嘢，返嚟坐小巴攞車嗰轉，突然間出現一個畫面，係前一晚食晚飯，阿女講緊嚟緊去美國，已經安排好感恩節同班朋友去東岸聚一次……喺完全清醒嘅狀態，我突然間喊到控制唔到自己，隔籬個師奶望住我，有人嗌落車，我就嗱嗱聲衝咗落車。當時天落住毛毛細雨，我一個人喺跑馬地街頭一路行一路痛哭，諗住前一晚個畫面，諗到我就嚟要失去呢個女。係囉，以前係幫女兒𢱑背脊，𠵱家，對女係露緊背脊。」
支持小女兒讀考古的專欄文章成為網上潮文，有網友說：「老豆有錢所以可以讀考古」，旦哥反擊：「我從來冇買過玩具畀兩個女，淨係買書，重點唔係考古，係餵飽靈魂。」 
老男人週記
與老婆沙律（花名）拍拖 5年、結婚 32年，旦哥說女兒長大後，與太太開始再戀愛。
唔只錫女，旦哥亦都錫老婆。我問旦哥，除了做個聽話聽教的小男人，愛老婆還體現在哪裏。旦哥笑咗：「聽話聽教，仲唔夠呀？我老婆成日鬧我：『你唔好我郁親條尾，你就先撲咗出去至得㗎！』哈哈……」
女兒長大了，家裏又剩下旦哥和結婚 32年的老婆兩個，老男人如今每週日都千篇一律：「一早瞓醒，我去踢波、佢去教會，踢完波揸車接老婆，一齊食個 brunch，下晏去做嘢。幾忙都好，個個都知，俾我服侍完老婆先，夜晚唔好約我，我要返屋企食飯。」老男人話：「我唔係怕老婆，係尊重，我哋唔係悶，係細水長流。」
留言列表
