我係真心㗎!
I物
真心英雄!日本直送正版 3D小熊殼
之前介紹過 iPhone 5男機主必用嘅 Ironman立體 case,唔只靚,仲要係老正!女仔點算呢?當然係揀最強嘅 3D鬆弛熊 case啦!咪誤會,我哋點會𤓓到叫你買成年前嘅假貨呢?呢隻新立體熊殼,真係日本出品,珍珠都冇咁真!同期仲有大量包實晒成部手機嘅 case,講到最特別,必選成個手袋咁嘅 iPad mini case,袋繩長到可以孭上身,正!
日本反擊老翻熊潮
心水清 user,應該記得 iPhone 5都未推出前,香港曾經有批 AAA級老翻立體鬆弛熊殼出現,唔少忠實熊迷都中伏入手。呢件事搞到鬆弛熊間公司 San-X急急出份多國語言聲明,話從來冇出過呢個殼。
事隔年幾,日本竟然自己出番個正版立體 case,仲喺日本官網入面,提到之前曾經有假殼出現,搞笑。正版貨叫價成二百幾蚊,質素當然冇令人失望,除咗拎上手相當輕身,機身掣位都好 fit,而且膠殼軟硬適中,拆殼只要屈一屈個殼邊,就成功拎到出嚟,唔似假貨咁箍到實。(各$238/a)
真包裝 VS假包裝當年隻假殼 packing老土浮誇,真版鬆弛熊殼就 sell簡約,有買開 San-X正貨嘅 fans,都會見慣呢種設計。
雖然話立體殼,但都唔係搞到部機厚咗好多。
掣位設計回彈力夠,唯一係犧牲咗個靜音掣。聽講原來日本人幾乎係 24小時靜音,所以都冇乜所謂。
肥熊軍團
今次殺嚟香港除咗有立體熊殼,仲有呢幾款 iPad mini case。主打硬殼設計,笠到落機極之 fit位,仲唔會加重 iPad mini磅數,粉絲就要買齊一套啦!(各$280/a)
透明熊殼
唔想俾個立體殼搞到 slim到暈嘅 iPhone 5變肥腫,可以揀呢款新出嘅透明硬熊 case。鬆弛熊冇遮到個蘋果 logo,連鏡頭下面條金屬面板分界位都冇遮到,畀人知你用緊 iPhone 5。($180/a)
靚到上面
有個靚殼喺底,點可以冇塊一樣咁靚嘅保護貼喺面呢。新出呢 set保護貼都係用最新鬆弛熊甫士,唔係將舊作變做 iPhone 5版就算,有誠意!($68/a)
情迷啪啪膠
好多人為咗減壓就會玩啪啪紙,到底有幾好玩?你睇之前啪啪紙機賣到成巷成市,就知佢魅力所在。新出呢個 iPhone 5 case更加不得了,佢將啪啪紙移植到 case上,畀你日日夜夜拎出街,然後日以繼夜、夜以繼日起勢啪,超好玩!記者試玩,覺得佢手感比啪啪紙機更像真,而且面積更大,一手拎住部 iPhone可以五隻手指都㩒晒,減壓一流。唯一係用硬殼打造,冇得拆出嚟好似扭毛巾咁啪。(各$248/e)
睇番厚度,都唔算令 iPhone 5變厚咗好多。
實試啪啪手感,感覺比啪啪紙機更爽手。
火紅連袋 iPad mini專用手挽袋
講到大包圍,呢款 iPad mini case一定至夠保護。事關佢成個設計十足個 iPad mini的專用手袋咁,打開個扣位,擺部 iPad mini入去,就係咁收藏,唔似其他 case要 fit晒位。話明係手袋設計,條手袋繩真係長到可以畀你側孭;而且唔係 fit位設計,入面仲有少少空位畀你擺多支筆或者 USB手指,比較實用。不過 case其實相當巨型,拎上手仲好鬼重,會令 sell輕巧的 iPad mini失咗原意。(各$420/b)
個殼厚度有番咁上下,保護力十足。
袋扣係鏤空咗,直接扣落個仿火漆形嘅扣位,袋入面亦唔係設計到 fit晒,有少少空間畀你擺小物如筆、咭片、 memo等。
超膠機械人
立體膠 case唔只靚,仲比 bumper同硬殼更具保護性,可以包實 iPhone條邊等佢唔易花,跌落地時仲有回彈力。呢類全包圍嘅膠 case點只咁少,新出仲有機械人款,好玩在同一個模又俾佢換成沖涼鴨仔,款款都夠中性。(各$200/b)
立花袋仔
話晒到咗春天, case點都要有番個春色至得嘛!呢款極受 OL歡迎嘅手袋 case,新批次加入立體花花,襯埋和風 feel色調,成個袋即時 charm晒。(各$400/b)
科技防撞
揀得全包圍 case,都係想有保護性。呢款新出嘅 Impact band iPhone 5殼,用上自家專利技術,物料內嘅粒子 D3O可以分散撞擊力,佢仲有條略為凸起嘅邊位保護屏幕,減少撞爆芒機會,啱晒完全唔錫機嘅 user。(各$199/c)
信封裝載
手袋形啱女士,咁呢個信封形嘅 iPad mini袋就肯定 fit晒男士。呢個 Magic Neon Envelop Leather系列其實係本地品牌 Discovery Buy出品,但設計都唔輸蝕,用仿皮物料打造,顏色一改啡啡黃黃,整到好鬼 sharp。而且有一定硬度,提高防撞力。(各$238/d)
同手袋殼設計一樣,全面包實部機,冇鏤空位畀你望 mon。
低調閃閃
想搵番個可以笠實部機嚟用嘅全包圍 case,其實唔難。呢個新出嘅 Neon Leather Case,皮殼閃得低調,而且啲閃閃格仔係造成蜂巢形,男人用都唔娘。(各$228/d)
Shop list:
a.熊仔主人荃灣南豐中心 A120E鋪 2499 2383
b. Candies 2461 3836
c. Street Value 2577 2599
d.冠恒 3619 6500
e. Legend Distribution 3525 0550
撰文:鄺浿鏇
攝影:黃家活、彭自維
留言列表