阿熹為討女友 Mable歡心,專程去學做拉麵開鋪,現兩口子一起經營店鋪,十分溫馨。 

創業通

90後小情侶拉麵店 平民化突圍

香港的拉麵店很多,大多標榜正宗、由日籍師傅主理,然而 90後的阿熹只學師半年,便膽粗粗開拉麵店,主打平民路線,雖然一碗拉麵只售四十多元,但全都用心製作,湯底自家調配,麵條找廠改良,絕不欺場。縱使仍是創業初哥,又面對對街另一拉麵店挑戰,阿熹仍然堅持冒險,勝在抵食兼好味,吸納到不少街坊、學生客,開業 1年,每月盈利約 3萬。

 


中午時段最旺,店內坐滿客人,可做到學生、 OL和街坊客生意。 

去年大圍積富街,同時間開了兩間拉麵店,兩者只有一條馬路之隔,打正對台,一間由日廚主理,賣正宗博多拉麵,食材全部日本進口,一碗動輒近百元;另一間走平民路線,一碗拉麵盛惠四十多元,午市更平至$30起,學生還獲奉送汽水一罐。
兩者路線極端不同,各自吸納不同客路,平民化的這間叫「神座」,午市最旺場,每日到中午 12時,小小一間店擠滿附近街坊和學生,大家擠在只有 2百餘呎店面,最多只可坐到 21人,客人較為健碩一點,隨時背貼背。
「我哋有特價午市優惠,你可以揀呢 5款拉麵或飯, size會比較細,但加$8可以揀款小食,加$4可以有罐飲品。」年輕女店員不停向客人簡介,特價午市拉麵和飯最平$30起,價錢平,記者本來預了將貨就價,但店員奉上的拉麵,分量不算少,還有半個糖心蛋,湯底濃香但不會太油膩,拉麵也夠煙韌,以這個價錢來說,還想怎樣?

廚房工夫一人搞掂


豬軟骨拉麵$58湯底以豬骨及雜菜炮製,濃香而不油膩,豬軟骨入口軟腍,還奉送半隻糖心蛋。 

負責炮製這碗拉麵的,不過是 23歲小伙子阿熹,一個人躲在廚房又淥麵、又煮炸物,忙個不停,下午 3時過後,始可以坐下來休息一會,「鋪頭嘅嘢食,基本上我一個人煮晒,日日由早上 9點做到午夜 12點收鋪,工作時間好長。」飲食業如此辛苦,願意跳進這個火坑,原來只為討好女友,「 1年半前,想試吓搞生意,啱啱識到𠵱家個女朋友,佢鍾意食拉麵,我為咗氹佢開心,走去學做拉麵開鋪。」
6年前,阿熹中學畢業,沒有目標,為想一技傍身,到 VTC修讀西餐的短期課程,後到法國餐廳工作,一做 4年,「好多人以為我會開法國餐廳,但法國菜咁高檔,無論餐廳環境、食材都要靚,成本太大。」為開拉麵店,阿熹到日本拉麵店工作,學師半年便自立門戶,「師傅一般唔會傳授秘技,去打工只係學吓基本功,大約知道啲湯底有咩材料,之後自己再鑽研日本食譜,好似豬骨湯,我就加入大量雜菜,令味道更香。」麵條也是在日本網站找到配方,再加以改良,然後找一間香港供應商製造,口感更為煙韌,就連烹調糖心蛋的滷水汁也是自家調校。

網上劣評令人沮喪

食物味道不差,卻在 open rice的評論毁譽參半,阿熹坦言曾沮喪過,「最初我都有去睇網上評語,見到俾人彈會唔開心,會諗辦法改良,例如改變煮麵時間,𠵱家我哋只淥 1分半鐘,令麵條唔好太腍,又換咗食材供應商等。」可以做的都做了,但劣評仍在,阿熹開始想通,「我做嘅係街坊客,有幾多個會上網,同埋上網寫評語嗰啲,又唔代表到全部人,我之後都唔再睇喇!」
其實開業後,阿熹需要解決的問題多的是,見關過關。「因為我太心急,好多嘢冇 plan好,開咗鋪先知有好多問題。」第一件頭痛事,便是對面街的競爭者,「開鋪前去咗好多區,嚟到大圍呢條街,覺得地點幾方便、幾旺,而且成條街都冇拉麵店,就嗱嗱臨租鋪。」
開店的 80萬由父母借出,為怕業主將來加租,竟然一簽 3年死約,迫得自己沒有退路,誰知還未裝修完,對面街的拉麵店比他早一個月開業,「大家一齊裝修時,我仲諗,唔會咁啱又係拉麵店啩,點知真係,仲要早過我開。」


蒲燒鰻魚飯$56鰻魚配上燒汁,香濃惹味,加上玉子蛋,味道更豐富。 

日式炸豆腐$20豆腐外脆內滑,配上木魚絲及醬汁,更加可口。 

以平民化對抗競爭

幸好阿熹早想好走平民路線,對家則走高檔線,而且對方在新開業時只做晚市,才減低競爭,「佢哋最初唔做午市,我就要搶多啲午市生意,推出特惠價錢,吸引多啲客。」所謂的午市時間,竟然由 11時半至下午 5時,務求搶盡日間客源,「就算𠵱家佢哋做埋午市,對我哋嘅影響唔算大,大家做嘅客完全唔同。」
沒被對手打垮,但阿熹在缺乏宣傳下,開業初期生意也很浮動,「試過一個下晝,只做到 4、 5個客,個場超靜,都會擔心。」冷清時,阿熹閒着便出店面找客人聊天,聽客人意見和了解他們口味,「佢哋見我後生,唔知我係老細,大家傾吓偈、講吓意見,傾開先知好多男客鍾意食飯,拉麵只係間中食,唔會成日幫襯。」


男煮內廚房工夫由阿熹一人包辦,而樓面工作則有 Mable幫手處理。 

女主外 

飯及小食勁吸男客

店鋪原先只賣拉麵,今年開始,阿熹便加入和風牛肉飯和蒲燒鰻魚飯,又陸續加多些小食,多了選擇,生意漸好轉,盈利由最初數千元,提升至現時每月約 3萬,「好多客人反映話想要外賣,嚟緊我都會請多啲人手,做埋外賣自取。」
未做外賣,阿熹已日做 15小時,由朝捱到晚,沒有時間拍拖,不怕女友詐型?「我哋𠵱家日日喺鋪頭拍拖。」年輕的女店員,原來是他女友 Mable,「佢嚟做樓面幫手,雖然工作上成日會有磨擦,但大家有共同目標,有咩一齊商量,感情比以前仲好咗。」言談間,二人對望微笑,多少疲累辛酸都忘了。


阿熹的店開在大圍積富街,對面街雖然有拉麵店,但對方打高檔路線,阿熹則以平民化應戰,及以午市作主戰線,所以對阿熹生意影響不大。 

開業成本

租金:$200,000( 3按+1上)
裝修及牌照:$600,000
總投資:$800,000

每月收支

租金:$50,000
人工:$30,000( 4人)
入貨:$60,000
營業額:約$170,000
盈利:$30,000

 

神座
地址:大圍積富街 57至 69號積富樓地下 G號鋪

先入少量貨試品質

新手想開日本料理店的話,可像阿熹般,在 yahoo或黃頁搜尋日本食品批發或供應商,便會有許多資料,「雖然我喺拉麵店做過,大約知道有邊啲供應商,但大部分食物,我都喺網上搵返嚟,好多供應商可以攞少量貨,好似三文魚可以斷磅計、蟹柳又可以一盒盒買,所以貨源唔難搵,又可以換唔同供應商,試到滿意為止。」加上開鋪後,會有不少供應商 sales主動上門報價,覺得合適可以入少量貨測試品質。


客人 Joan之前經過呢度,見到有拉麵食,就同朋友入嚟試吓,覺得拉麵軟硬適中,豬骨湯底都好味。 

客人蔡小姐我嚟食過幾次,覺得拉麵幾好味,好鍾意個食糖心蛋,而且價錢唔貴。 

撰文:洪芳俠
攝影:黃家活

arrow
arrow
    全站熱搜

    tvb4life 發表在 痞客邦 留言(0) 人氣()