漫遊毒物

天晶虎魄再劈過《神兵玄奇 Online》

雖則話港漫陷入低潮，但提起《神兵玄奇》當年掀起嘅兵器熱潮絕對厲害，所以玉皇朝即將推出嘅後續作《神兵問天》必令唔少 fans重投港漫懷抱。想睇得更投入，就要玩埋呢隻《神兵玄奇 Online》。事關佢唔單只係一般 online RPG遊戲，跟隨原著故事爭奪天晶、虎魄等天神兵，挑戰邪帝、天魔等 boss外，更會同漫畫玩互動，玩家只要輸入漫畫中所送嘅序號，就有機會得到威力極大嘅天神兵、魔兵等。最過癮係遊戲嘅 NPC、 boss更搵來漫畫製作人黃玉郎、鄺志德等參與配音，令玩家玩得更投入。

代理公司： Gameone
遊戲類型：玄幻武俠型 RPG
官方網頁： http://gw.gameone.com/ 
公測日期： 4月 30日
免費下載（另設太虛新手版$10）

《神兵玄奇 Online》特別用上家用遊戲常用嘅 Unreal 3引擎做開發，直接令遊戲場景、人物也比得上家用遊戲咁有氣勢。 

各式神兵比原著漫畫更多咗「鬥魂」力量，即係兵器內嘅異獸元神，可變成裝備增強玩家力量。 

隨住故事發展，玩家當然有機會遇到漫畫主角問天啦！設定都算忠於原著，問天手持天晶之餘，連晶珠綠臂都冇整漏。 

為咗令漫畫迷玩得更投入，《神兵玄奇 Online》更搵嚟黃玉郎、梁光明等漫畫製作人，負責 game內角色配音。 

Wii U勁慘淡　幸有 3DS

近期手機遊戲大熱，《 Candy Crush》、《 Puzzle& Dragons》個個玩，相對家用遊戲機難免弱勢。當中剛派財政報告嘅 Wii U真係超慘淡，由開售至今只係賣咗 345萬部，最恐怖係由去年 12月後更只係賣咗 39萬部，真係蝕入肉！幸好任天堂仲有 3DS頂住，單係由上年 12月後就有 125萬部銷量，而總銷量更已達到 3,100萬部。令任天堂 12年度獲得了 70億日圓收入，比 11年狂蝕 400億絕對有唔錯表現，希望 Wii U嚟緊會有更好成績，唔使靠晒手提機。

Wii U銷情慘淡，希望嚟緊嘅《 FIFA 14》，以至玩法比其他主機更多變嘅《 Splinter Cell: Blacklist》等大作，可以扶佢一把啦！ 

3DS喺手提機市場就完全壓到 PS Vita，嚟緊《 Pokemon X.Y》更係美版、日版一齊發售，唔使 game迷等。 

撰文：張穎麟