Sean 24歲香港演藝學院電影電視學院導演系 Yr.3 

U撈

演藝生　從寫影評開展電影路

很多人只看到李安於奧斯卡得到最佳導演獎時的風光，但有多少人知道他為了當導演，跟父親 20年來說不超過 100句話，對電影的忠誠毋容置疑。現時於香港演藝學院讀電影電視學院導演系的 Sean，同樣熱愛電影，現任兼職影評人，為香港電影資料館寫電影影評，他希望畢業後可以入行做導演，即使不能如願，未來工作也要與電影有關。

現時百老匯電影中心會不定期舉辦經典電影放映會，邀請 Sean主講映後談，「呢個 job雖然冇錢收，但我樂在其中，因為我好想分享自己對每部電影嘅睇法，所以有時間我都會做。」 

訪問當天， Sean正在家中聚精會神看電影，「我準備寫關於呢部法國卡通片《瘋狂約會美麗都》嘅影評，所以𠵱家要睇晒呢部戲。」記者眼見他家中放滿 DVD和錄影帶， DVD機和錄影機加起來有 8部，「因為工作關係，所以需要多幾部機傍身。」
現於香港演藝學院就讀電影電視學院導演系的 Sean，也是一位兼職影評人，於 11至 12年間，他曾在《信報》寫影評，「我向《信報》投稿，點知得咗，咁就開始我寫影評嘅生涯，會寫流行電影，每篇稿費約$400。之後編輯要我寫埋劇評，由於寫劇評要一次過睇晒成套劇先可以落筆，覺得工作量太大，最後離開咗。」

Sean除了香港電影資料館外，還會為其他雜誌寫影評，如《今天文學雜誌》出版的《回歸十五年：香港電影專輯》中，也有刊登他的作品。 

Sean現時主要為香港電影資料館撰寫影評，「喺 2011年，我同自己學系嘅院長舒琪先生，及一班電影愛好者成立咗香港粵語片研究會，同年喺舒琪先生介紹下，香港電影資料館搵咗我哋班會員幫佢哋寫影評。」
香港電影資料館定期會舉辦不同主題的電影展，包括「經典西部片」及「百部不可不看的香港電影」等，「呢類電影展播放嘅電影，好多都係經典電影，喺香港睇過呢類戲嘅人唔多，我嘅職責係寫一編關於呢部電影嘅介紹，畀將要睇嘅人有初步概念，或者吸引多啲人嚟睇。」

一半收入買電影書

熱愛電影的 Sean，上年自導短片《陳美鳳》參加第六屆香港流動影片製作比賽，並得到銅獎，電影講述一班人企在村屋樓下叫陳美鳳應門，「獎項對我嚟講都係其次，我好享受拍攝過程，其他嘢我好少去諗，不過𠵱家睇番套作品，覺得自己喺取景方面可以做得好啲。」 

Sean寫過的影評包括《來佬奇緣》、《奪寶群英》及《報應》等，這兩年累積起來，已超過百篇影評。寫影評是 Sean的主要收入來源，每篇影評約 300字到 2,000字不等，稿費約有$400，平均月入約$5,000，但作為電影發燒友的他，會用一半收入來買關於電影的書。
讀書同時工作亦令他學懂如何分配工作時間，「讀 Yr.1時，我有份功課要拍一套發生喺香港 1976至 1978年關於貪污嘅紀錄片《金禧事件》，我用好多時間搜集資料，包括去翻查舊報紙、新聞同搵番當時涉及事件嘅人做訪問，同時間兼顧咁多嘢，令我訓練到分析力及 multi-tasking嘅能力。我平時放學返到屋企，可能同時睇多過一部戲，然後寫影評，我會好快分析到套戲嘅內容，同埋𠵱家份兼職同我讀嘅科目有關，睇戲時其實我都係學習緊。」

導演路途十分漫長

Sean自言十分喜愛電影，電影給予他無限生命力，有很多共鳴，「細個睇戲，覺得好真實，有好多可能性，咁就愛上電影，之後讀書朝住呢方面進發。」他希望畢業後可以從事電影行業，「讀得電影，都想入行，但有時亦要考慮番現實，一般我哋畢業入職都係由場記做起，好運嘅話至少做 5、 6年先上到副導演，可能要十幾年先做到導演。」
上年暑假， Sean曾到片場擔任場記，這令他反思入行的可能性，「場記主要負責令部戲連戲，由場景、道具、動作走位、台詞同服裝等都關佢事；場記仲要做導演嘅筆記簿，將導演講嘅每一句話一字不漏記錄低，以防導演一個心血來潮嘅想法搵唔番。場記要兼顧咁多嘢，但收入唔多，通常都係一個 job咁收錢，有朋友做場記搵$7,000一個 job，但要做足 3個月，覺得好難維生。」
無論如何， Sean希望有朝一日可以一嘗導演滋味，「畢業後我都會再試吓入行；如果真係唔得，我會做全職影評人，幫唔同媒體寫影評，總之我只想做關於電影嘅行業。」

每逢放學後， Sean不是回家看電影，便去電影院。最近他最喜歡的電影是《東京家族》 

所賺到的錢， Sean會花一半用來買有關電影的書。 

自薦寫影評

何思穎　前香港電影資料館節目籌劃Sean對電影好有熱誠，佢會研究所有類型嘅電影，包括比較少人研究嘅香港舊片，同埋新一代人好少睇書，但 Sean成日睇書增值自己，作為一個影評人睇書好重要，所以佢係一個好難得嘅年輕人。 

想像 Sean一樣寫影評賺外快，可以投稿去香港影評論學會，一嘗做影評人的滋味。香港影評論學網站設有「電影新人類」徵稿，歡迎踴躍投稿，鼓勵更多有潛質的影評人發表評論文章。字數不限，電影不限，只要寫得好，就有機會刊登，一旦成功刊登，便能獲得$100稿費。有興趣成為影評人可投稿到 mailto:project@filmcritics.org.hk。

撰文：何倬然
攝影：葉偉豪
部分圖片由被訪者提供