Geek友講場

聽歌 Apps大戰　串流音樂隨時聽

改革版《勁歌金曲》有大牌主持兼唱片公司幫手，一樣都得 3點收視冇人睇，意外？我話正常先真，以前聽歌只靠電台同電視台，但今時今日大把方法，好似美國去年網絡音樂營業額就有 40億美金，繼 iTunes、 YouTube
之後，唔少唱片公司都睇準音樂串流（ Streaming）平台，近期瑞典 Spotify亦殺入香港，主打速度快、高音質、免費玩，歌曲總數比 KKBOX、 SOLITON加埋仲要多，加上佢哋唔理乜嘢網絡商都玩得。仲等電視台
夜麻麻先播嘅音樂節目？食住薯片自己話事好過啦！

info.

Spotify
iOS/Android/Mac/PC
試用期： 30日
月費：$48
最高串流音質： 320kbps

Spotify齊全英文歌　 EQ設定音質高

嚟自瑞典嘅過江龍 Spotify，主打歌庫總數達 2,000萬首，平均一日更新 20,000首歌，歐美歌曲更齊到幾乎冇甩漏。另外，佢個播放器亦支援用番手機嘅 EQ功能同優化設定，配合高音質串流效果可以令用家更自主。不過記者試過轉高音質後播歌速度唔算快，撞正有來電時有機會斷線，要由頭再播先聽到。

高音質好食數據，建議用 WiFi下載啲歌先，因為之後轉離線 mode都一樣聽到。 

設定入面可控制音質，不論係下載定串流聽歌一樣有 3個音質選擇。 

入埋音效項目，會直接去到 EQ設定，想人聲前啲定 bass重啲都可以自己揀。

音樂庫測試

方大同〈愛愛愛〉　沒有
費玉清〈中華民國頌〉　有
Nattefrost〈 Sluts of Hell〉　有

短評：

歌曲真係勁多，由超另類嘅 Black Metal到 80年代台語老歌都有，但近期嘅方大同甚至蕭敬騰都冇，似乎唔太啱亞洲人口味，惟有等佢 update音樂庫。

試聽後感

既然強調高音質，記者當然要用耳聽真，試聽 Daft Punk新歌〈 Get Lucky(Radio Edit)〉，第一個感覺係樂器聲分明，結他聲粒粒清，人聲亦冇黐埋一嚿，感覺似聽緊 iTunes買嘅 AAC單曲，音質果然靚啲，唔錯！

手機免費 30日

Spotify雖然都係強攻流動裝置，對應 iOS同 Android兩大平台，而 Windows Phone 8版本亦快將推出。之不過，比較特別係，佢個手機版只係畀付費會員使用，一般會員用唔到！好在裝 app後可以申請做新會員，之後就有 1日任玩，試完仲會提你可以將試玩申請多 30日，唔試走寶！

新會員有 1日任玩，完咗再入 app就會提你用唔到，要再申請試玩 30日。 

介面唔算特別，除咗排行榜呢類例牌菜，其他資訊欠奉，冇其他聽歌 app咁多嘢玩。 

播歌超順，記者用咗 4日，聽歌竟然冇 lag過，多數專輯亦有封面圖。

真心免費聽　屈機桌面版

話晒係新嘢，各位樂迷對 Spotify嘅特點都未太清楚，佢其中一個「屈機」嘅地方，係有個功能強大嘅桌面版。單睇桌面版介面其實勁似 iTunes，免費登記做會員下載 software後，就可以無限期任聽 2,000萬首歌，絕對抵玩！唯一限制係聽 1小時左右就會出現 5至 7分鐘左右嘅廣告，而音質最多亦只係去到 160kbps，唔算好靚。之不過，個人認為已經相當吸引，不可不試。

桌面版設計非常似舊版 iTunes，右邊係好友動態、左邊係 Playlist、音樂庫等主要操作，一目了然。 

Spotify好強調社群功能，你個帳戶連結 facebook後，喺「關注」度可以搵到用緊 Spotify嘅好友，大家互相 follow就可以睇到對方聽過咩歌同近況，連 playlist都可以 share。

你聽到正歌想同朋友分享都好簡單，點一下左下角 share icon，打個 status就會即時更新，仲可以同步分享去 fb、 twitter同 Tumblr，勁方便！ 

桌面版 Spotify仲勁到可以裝 app加強功能，例如裝咗〈 fuse〉後就可以睇埋音樂新聞，內容就以歐美為主，冇乜亞洲消息。 

電台功能最啱懶人，唔知聽乜歌好，就直接揀音樂種類，例如粵語、國語或 R&B、 Soul等，佢就會自動播歌唔使你煩。

用家有 say： Patrick（使用 2天）

「有用開 KKBOX，知道呢個 app新出就裝咗嚟玩，用咗兩日感覺唔錯。對我嚟講啲歌好齊，好似 Death Metal、 Black Metal呢類偏門嘢都有，以後唔使周圍搵，最緊要係唔使錢，應該會 keep住長用。」

寶島樂庫 KKBOX　台日韓俱全

睇完歐美代表 Spotify，想聽華語歌嘛？必選來自台灣嘅 KKBOX。唔講唔知，佢其實早喺 04年已經成立，不過 09年先殺入香港。講到佢嘅強項，除咗台灣歌齊，連日韓歌庫都係佢強項，記者身邊有唔少 K-pop粉絲都係佢嘅用戶。而且近年佢仲搞埋自家頒獎禮畀播放率最高嘅歌曲，上年仲殺入埋台北小巨蛋大搞，好多港、台、日、韓歌星都畀面出席，以亞洲嘅數位音樂嚟講， KKBOX都算誠意十足。

info.

KKBOX
iOS/Android/Mac/PC
試用期： 7日
月費：$49
最高串流音質： 192kbps

介面簡而清

老老實實，打開 KKBOX，個介面真係悶到喊，貫徹寶島人純樸風味。入去搵新歌，擺最上叫「中文派台」，入面豐富到中港台歌手有齊，但親切感真係欠奉。

一打開 app，見到呢個「我的音樂庫」介面，真係好悶。 

再去搵最新派台歌，相都冇張，救命呀！ 

聽歌介面，都係嗰句：簡而清，右上有「詞」個 icon， click入去可以睇歌詞。 

唱到邊，歌詞就會變反白方便你跟，好似聽 PSY嘅新歌〈 Gentleman〉時，用嚟學吓外語都幾好玩！ 

音樂庫測試

方大同〈愛愛愛〉　有
費玉清〈中華民國頌〉　有
Nattefrost〈 Sluts of Hell〉　沒有

短評：

雖然歐美曲庫比唔上 Spotify，不過唔少香港人熟悉嘅歐美歌手 Alicia Keys、 Taylor Swift嘅曲庫都算齊。本地新歌當然有謝安琪首話題作〈最好的時刻〉，連王菲新作〈致青春〉都有，相當唔錯。

試聽後感

於港鐵站用 LTE網絡開首新歌，約等 5秒就有得聽，中間冇乜窒。而且音質唔錯，用普通細耳機聽，都唔會只得人聲，冇晒音樂。

用家有 say： Elyse（使用約 1年）

「我平時追開韓劇，好想搵番啲 OST去聽，但用 YouTube聽真係好食電同數據！聽朋友講話 KKBOX好齊韓文歌，試玩完一排，真係覺得好齊，又更新得快，唔使再四圍搵歌，咪一路用落去。」

明星陪你聽

要喺聽歌 app突圍，淨係得歌庫勁係唔夠㗎！所以 KKBOX就搞咗個「一起聽」 function。畀你 add明星做朋友，好似你 add完五月天嘅阿信咁，如果佢用 KKBOX聽歌兼 share個 playlist畀你「一起聽」，你就可以同步聽住佢揀嘅歌喇，就連佢飛歌、快播，你都會跟住，好似佢喺你身邊一樣。

一開「一起聽」頁面，就見到有咩名人 user上線，記者咁啱撞到鍾一憲玩緊！ 

按「一起聽」，即時同步聽 JJ首〈曹操〉，話明係同步，所以按完之後，首歌唔係由頭開始，而係對方聽到邊一秒開始，好有真實感。 

自己想做台長，可以揀番首歌播，之後按番紅框個開台掣。怕自己開台冇人理，就可以匯入番 facebook個 friend list，叫朋友撐場。

本地薑 SOLITON　香港的集體回憶

要搵有親切感，前年 11月先成立嘅聽歌 app SOLITON，就係由香港人一手開發。仲記得嗰時一街都係得幾句歌詞做廣告嘅宣傳嘛？真係勾起人唔少集體回憶㗎！雖然成立日子短，不過作為本土 app，佢個黃色粗體字介面真係得到唔少歌手支持，話覺得佢型，先紛紛轉用。

info.

SOLITON
iOS/Android/Mac/PC
試用期： 7日
月費：$49
最高串流音質： 128kbps

介面本土化

一開 app，最驚喜係畀 user自訂介面風格，唔想要黃色加深綠咁搶，仲可以揀紅黑撞 style。而且相比 KKBOX同 Spotify， SOLITON個「新歌上場」，就將「本地」擺得最出。一 click入去，有埋排行一二三，更好彩係見到王菀之首〈如果這是情〉擺頭，而唔係林峯咁亞太！

裝完 app正式玩，第一件事竟然係揀顏色。 

打開新歌上場介面，有番「本地」揀，最有親切感係佢！ 

聽歌介面都好簡單，不過感覺比其他 app型得多。

冇動態歌詞玩，右上角揀資料都有歌詞睇。最得意係 click一下張相，即變番做四分格嘅操作介面。 

唔少人應該記得，前年未有關青團體時，一街都係呢啲歌詞廣告牌。 

音樂庫測試

方大同〈愛愛愛〉　有
費玉清〈中華民國頌〉　沒有
Nattefrost〈 Sluts of hell〉　沒有

試聽後感

幾乎一 click即播，不過音質比 Spotify明顯遜色，喺港鐵度要戴大耳筒隔開晒雜聲，先聽得清樂器聲。再試玩連續播熱門排行榜 function，都冇試過要等，加分。

奇招搶客

歌曲藏量唔夠多，惟有整多兩招特異功能，搶番啲客仔。

1.聲控搵歌

SOLITON可以打歌詞搵歌之餘，兼畀你用廣東話唱住嚟搵歌。實試幾次，語音辨析尚算可以，而且好多廣東歌都搵到，可以同佢玩「超級無敵估歌仔」，必殺！

2.自選 playlist

KKBOX有「一起聽」， SOLITON都有類似分唇，不過就簡單好多。明星們只係揀完堆歌，然後 share個 playlist出嚟，而且好多歌手只係揀番自己嘅歌，冇乜誠意！

用家有 say： Mabel（使用約 2年）

「嗰時係因為俾佢啲廣告吸引，走去裝咗個 app試玩。見有唔少香港歌，又唔算貴，就一路畀錢用落去。我鍾意用佢個新歌排行榜不停播，唔使自己 set playlist咁麻煩，去 K房唔使再怕唔識唱新歌囉！」

試玩總評　 Spotify多歌夠平

真係埋門揀買邊個 app好，梗係第一時間睇價錢、睇歌曲數量啦！新登陸嘅 Spotify月費比 KKBOX同 SOLITON平$1之餘，歌曲數量又係 no. 1，音質方面亦最靚，好似必然之選。不過咪住！暫時佢嘅曲庫只係集中歐美歌曲，廣東歌、韓流同 J-Pop仲係欠奉，自問係亞洲音樂粉絲團，就要揀番 KKBOX先穩陣。至於 SOLITON，當然係抱住一顆支持本地音樂嘅心就要撐啦！

撰文：熊俊彥、鄺浿鏇
攝影：彭自維