指安琪蓮娜斬腳趾避沙蟲
薛芷倫切除良性瘤
■抗癌中的薛芷倫，剛於兩星期前切除良性瘤。
由賭王二房千金何超瓊（Pansy）所創立的天機公關昨晚在中環四季酒店舉行25周年慈善晚宴，多年友好如陳慧琳、古天樂、莫文蔚及梁詠琪等盛裝赴會。曾有ball后之稱的薛芷倫（Fanny）以好友身份撐場，對於安琪蓮娜祖莉（Angelina Jolie）割乳房防癌的行為，Fanny作為乳癌病患康復者有所體會：「佢係一個美麗女人，好錫小朋友，不過佢個case唔同，不過我覺得佢斬腳趾避沙蟲，斬晒所有腳趾，都會有其他爬上嚟，係要搵一對保護到自己嘅鞋，同踩死晒啲沙蟲，係要做運動同健康生活，避開晒啲毒素，佢係有陰影，唔想活喺陰影之下，所以拆咗計時炸彈，做返人肉炸彈。」
■吳君如與古天樂齊齊現身，君如不時被女性朋友要她介紹古仔給她們認識。
■陳慧琳笑言紅姑與她的男助手傳出緋聞很好笑。
■何超盈自迷銅記後甚少現身，昨晚着靚靚捧家姐Pansy場。
司馬燕：康復緊
Fanny透露兩星期前更動完小手術切取良性瘤，她表示：「抗癌療程五年，去到三年幾，中間有小手術。」問到她會否切取乳房，她表示：「自己一定唔會咁做。」問到她會否覺得乳房是女性重要性徵，Fanny表示：「係，如果唔係必要，唔會咁做，其實有其他嘢可以做，例如化療、食藥，佢都可以咁做，我就要做小手術，切取良性瘤，自己𠵱家好精神同健康，唔當自己係病人。」
另一個患了胃癌的抗癌勇士司馬燕由兩名兒子陪同下出席，她透露有關注安琪蓮娜事件，她表示：「佢個遺傳基因已係咁，好勇敢，女仔象徵係個breast，係好大抉擇，我自己就好啲，康復緊，身體都OK，仲有一次化療，之後轉口服藥兩年，𠵱家個仔會鬧我唔好食嘢咁快，同唔畀我開門，因為唔可以接觸金屬。」日前更有傳她入院消息，司馬燕表示：「冇聽過，我一路幾好精神，冇事，生勾勾喺度。」
採訪：盧妹、譚倩宜
攝影：陳慧安
■已婚的周汶錡谷胸盛裝而來，難得性感。
■正在抗癌的司馬燕（左二）染上灰黑髮，帶同兩兒子捧何超瓊（左三）場。
薛芷倫護乳行先拒切
國際性感女星安祖蓮娜祖莉（Angelina Jolie，畢彼特未婚妻）自爆因遺傳性乳癌風險極高而切除乳房，消息轟動全球，不少人大讚她勇敢，但罹患婦女癌病的名媛薛芷倫卻大唱反調，認為她這樣做是「斬腳趾避沙蟲」，並自爆兩周前自己才接受乳房和子宮的手術。
罹患婦女癌病的薛芷倫（Fanny），與患胃癌的司馬燕昨晚出席慈善晚宴，立即成為焦點，穿上螢光色裙子的Fanny清減了不少，甫見記者就說：「我兩星期前都開完刀，做乳房和子宮手術。其實我五年來一直接受抗癌治療，依家已經過咗三年幾，（咩病？）都係婦女病，但唔同安祖蓮娜，不過我覺得佢咁做係斬腳趾避沙蟲，最緊要係着到對好鞋，將啲沙蟲踩死，所指嘅好鞋即係健康生活，多做運動，飲食生活健康，心理上唔可以唔開心，咁會影響癌細胞！」
可食藥及化療
Fanny又認為安祖蓮娜選擇切除乳房是心理上需要大於醫學需要：「可能佢有陰影，唔想活在陰影下，佢有家族遺傳，所以要拆呢個計時炸彈，情願裝番個人造導彈，安心生活！」她又堅決表示不會切除乳房，除非是迫不得已，更認為安祖蓮娜這樣做「前衞咗少少」：「乳房係女性嘅象徵，佢好美國人思想，中國人未發生唔會做，癌病有化療可以做，我自己都食緊藥，要食五年，（有冇副作用？）副作用就係要做手術，我三年幾開咗四次刀，都傷元氣。」
周汶錡（右）谷胸亮相，胞妹周麗淇則封胸上陣。
司馬燕由兩名兒子陪同出席活動。
司馬燕讚勇敢
而司馬燕則偕兩兒子前來，對於安祖蓮娜切乳房一事，她就大讚說：「既然佢嘅基因係咁都冇辦法，佢提早切除take care好勇敢，因為乳房係女性象徵，要好大抉擇。我個病係長期，會影響食嘢同瞓覺日常生活，不過我依家都OK，下星期又要入院做最後一次化療，做完之後就食藥，一食要食兩年，但已經半年我都慣晒。」在旁兩名兒子不時搭着媽媽肩膊以示鼓勵，十分孝順。而對於日前有人傳出她的死訊？司馬燕淡然地說：「大家見到我都幾精神，啲人搵嘢寫吓啫，要搵食冇所謂！」豁然大方。同場並有谷胸上陣的名模周汶錡與胞妹周麗淇、琦琦、汪圓圓、賭王四房千金何超盈等。
何超盈單拖出席活動。
汪圓圓與表妹湛琪清儼如孖公仔。
琦琦一身亮麗圖案，十分搶鏡。
文：名人組
留言列表
