因面癱的後遺症， Jessie現在但凡要嘟起嘴進食時，例如吃雞翼，她的左眼都會不由自主閉合。 

頭號健康

面癱突襲　驚嚇「變臉」

今年五月的氣溫特別反常，時冷時熱，飄忽的天氣不單容易令人患上傷風感冒，若身體抵抗力稍弱，更有機會令潛藏體內的水痘病毒復發，誘發「生蛇」。別小覷這些過濾性病毒，一旦它們伺機攻擊顏面神經，就有可能令你一朝「變臉」，造成面癱。面癱一般雖可痊癒，但眼斜嘴歪的情況分分鐘要維持數個月，認真嚇人！

醫生有需要時，會替病人進行神經傳導檢查，利用微電流刺激患者的顏面神經，從而評估病人神經受損的程度，以制定合適的療程。 

三十四歲的 Jessie，說起四年前仲夏某個早上突然「變臉」的可怕經歷，猶有餘悸。「嗰朝早起身刷牙洗面，當我潄口時，一吐水，啲水就直噴上眼，我覺得好奇怪，咪走去搵塊鏡照吓，竟然見到自己左邊面由眼眉、眼睛、面珠到嘴角，全部都硬晒郁唔到？嗰刻我真係好驚，仲以為自己中風，所以立即坐的士去急症室，醫生檢查完一輪，就話我面癱，當時都一頭霧水，因為完全未聽過呢個病！」
耳鼻喉科專科醫生顧德政指出，面癱屬常見的疾病，他每個月都有兩、三宗求診個案，醫學界估計本港每年約有一千四百至一千六百宗新症。

第七條神經線發炎

面癱可發生在上神經元或下神經元，兩者的病徵並不相同。顧德政醫生解釋︰「上神經元面癱，主要係中風、腦瘤引致，呢類病人嘅額頭、眼睛有正常活動能力，只係眼以下地方郁唔到；但如果係下神經元面癱嘅病人，就會半邊面全部受影響，由額頭、眼眉、眼睛、面珠到嘴角都郁唔到。一般來講，大部分面癱病人都發生在下神經元，其中又以貝爾氏面癱（ Bell's palsy）最常見，幾乎六至八成病人都屬於呢類。」
他續稱，貝爾氏面癱的起因是由於從腦幹分支出來、負責控制臉部肌肉的第七條神經線（顏面神經）受到病毒感染，以致一邊臉出現麻痺及癱瘓。至於餘下的兩至四成下神經元面癱病人，則多數由「生蛇」引起， Jessie正屬於這情況。
從事物流工作的 Jessie憶述︰「我平日工作好忙，休息都唔係好夠，而病發前半個月，我突然感覺到左耳痛，最初以為係耳仔入咗水，不以為意，直至確診面癱之後，從醫生口中先知道自己原來耳背生蛇。」

帶狀疱疹病毒為患

顧德政醫生解釋，任何人只要曾經出過水痘，帶狀疱疹病毒都會潛藏在身體的神經線組織內，當身體抵抗力轉差時，病毒就會伺機發作，如病毒恰巧攻擊第七條神經線，就會造成面癱，醫學上稱之為帶狀疱疹面癱綜合症。
他又謂，相比貝爾氏面癱，帶狀疱疹面癱綜合症情況會較嚴重。「貝爾氏面癱雖然較容易中招，但病情一般相對輕微，復元期介乎六至十二星期，而且有八至九成病人可以完全康復；但如果係因為生蛇而引起的面癱，由於帶狀疱疹病毒對神經線所造成嘅破壞會較大，所以需要更長時間復元，兼且有一半人唔會完全康復。」

七十二小時黃金期

威爾斯親王醫院腦內科駐院醫生樊倩英則表示，面癱的黃金治療期是病發後七十二小時內，如病人能及時服食高劑量類固醇七至十天，治療成效會較佳。另外，針對帶狀疱疹面癱綜合症的病人，醫生除使用高劑量類固醇外，亦需要同時處方抗病毒藥。
在等待神經線修復的日子， Jessie彷彿度日如年。「當時真係好無奈，日日食藥都好似無乜進展，最初兩個月，我隻左眼長期都合唔埋，日頭要戴太陽眼鏡保護，兼且由於好乾而要狂滴眼藥水，夜晚瞓覺就要用紗布遮住；開餐亦有困難，我無辦法正常咁用杯飲水，因為水會由嘴角流出來，一定要用飲管；食嘢嘅時候，就因為左邊臉郁唔到，所以一張開嘴，嘴角就會不受控咁向右邊臉扯起！」

肉毒桿菌助鬆肌肉

如果面癱發生在下神經元，病人由額頭、眼眉、眼睛、嘴角往往都難以活動，鼓腮會漏氣，醫生要逐一檢查。 

眉清目秀的 Jessie，形容那刻心情猶如跌入谷底，後來透過針灸及物理治療，病情才稍有起色。「物理治療師教我每日練習一啲好誇張嘅面部表情去刺激肌肉，但都花咗三、四個月時間，我先慢慢開始做得番蹙眉、眨眼、嗡鼻、扁嘴嘅動作，至於去到回復正常生活，就已經係病發一年半後嘅事。」
如今， Jessie雖已重拾昔日美貌，但其實面癱也暗暗為她帶來無法根治的後遺症。「而家我每逢嘴巴一嘟起，例如食麵、食意粉、食雞翼時，我隻左眼就不由自主咁合埋，唔知內情嘅人就以為係我嘅小動作，但其實面癱之前，我唔係咁㗎！」
樊倩英醫生解釋，在康復過程中，有部分神經線在重新生長時，有可能會出現紊亂。「有啲病人食嘢時，眼睛會流眼水，又或者眼瞼肌肉會跳動，甚至喺靜止狀態下，面部肌肉依然會抽搐。」她說，如病人出現這些情況，可考慮注射肉毒桿菌，幫助鬆弛相關肌肉，以減少肌肉抽搐跳動，但此舉亦只能夠控制病情，無法根治。

解構面癱

顏面神經有五條神經分支，負責控制臉部肌肉，如下圖左臉的顏面神經受到病毒感染時，左臉會出現麻痺及癱瘓，以致所有動作及表情都得依靠右臉，樣貌會因此出現怪異。

孕婦是面癱的高危一族， Karen就不幸在臨盆前中招。 

今年二十五歲的 Karen，做夢也沒想過在她臨盆前幾天，面癱竟突然來「贈興」！「我上年十二月八日生 BB，但就喺十二月五日突然面癱。嗰朝早我起身刷牙，好驚訝發覺右邊面郁唔到。其實病發前一星期，我已經有好嚴重嘅耳鳴、眼皮跳，我有睇家庭醫生，但當時搵唔出原因，估唔到一星期後就出事。」

孕婦屬高危一族

婦產科專科醫生林兆強指出，面癱多發生於三十歲以上人士，年紀愈大，風險愈高，而孕婦更屬高危一族，其病發風險較普通人高出三至四倍，相信與身體抵抗力弱、新陳代謝變化，以及壓力有關。
「當聽到醫生話我第七條神經線發炎、面癱，我已經忍唔住喊出來，因為當時我對呢個病毫無認識，只係擔心 BB就快出世，啲菌會唔會傳染佢。」 Karen說。
林兆強醫生解釋，由於病毒感染只發生於面部的神經元上，所以孕婦即使在不同孕期患上面癱，也不會對胎兒構成影響，胎兒亦不會受到感染。
Karen在病發後立即看醫生及服食類固醇藥物，首三天的病情尚算穩定，但自從誕下女兒後，病情突然轉壞。「我自然分娩，痛足十六個鐘，而且因為面癱，我根本做唔到吸氣呼氣嘅動作，所以生 BB嘅過程好辛苦。或者因為太攰，個病變得愈來愈差，起初右眼仲可以合埋，但 BB出世後，就已經合唔到。另外，剛剛病發時，我右邊面勉強用力都可以露出三隻牙，但生完後，就出盡力都只係露出兩隻，證明右面肌肉嘅活動能力差咗。

面癱可以令人一朝變臉，眼斜嘴歪，嚴重影響儀容。 

Karen在面癱時，右眼一度無法閉合，睡覺要用紗布蓋着。 

類固醇削抵抗力

「仲有，唔知係咪因為食咗一星期類固醇藥，搞到我抵抗力好弱，會陰傷口埋得好差，不斷發炎。」
林兆強醫生說，類固醇是一種強力有效的消炎藥，作短療程使用是安全的，醫生一般亦會根據孕婦的病情處方合適的劑量。
中大內科及藥物治療學系助理教授梁浩雲醫生則表示，類固醇有助抑制引致面癱的神經線發炎，促進修復，但與此同時，類固醇亦會抑壓免疫系統，導致身體的抵抗力降低，例如增加細菌性感染的風險。
可幸 Karen所患的是殺傷力相對較低的貝爾氏面癱，而且病發當日， Karen除服食西藥外，也聽從丈夫建議接受針灸，以致病發後兩個月已完全康復，回復舊貌，惟上個月卻發生懷疑復發的驚魂。「可能因為又要返工又要湊 BB，休息唔夠，有日我發覺塊面好似又有啲唔妥、感覺唔多自然，兼且有日仲全日眼皮跳，我好驚復發，於是急急又走去針灸，好彩連續針咗三次之後，就好番好多。經過今次之後，我決定辭職，希望休息多啲。」
不過，樊倩英醫生就指出，如屬於貝爾氏面癱，一般復發風險不高，只有百分之七至十三的病人有機會出現復發的情況。

話你知

衞生防護中心早前預測今年將會是水痘高峰期，而好發季節多為十一月至二月及六至七月。明年起，政府將為一歲童免費打水痘針，但未有具體時間表，至於其餘人士仍須自費接種，私家診所收費介乎四百至八百元。

醫院管理局在全港十八區各設立一間中醫藥教研中心，提供中醫門診服務，市民可透過醫管局中醫服務網站，了解各診所提供的服務和開放時間。
網址︰ http://www.ha.org.hk/chinesemedicine 

撰文：沈雅詩
攝影：吳卓凡　
插圖：祝健中