張相俾人擺咗上網成二十分鐘，突然有個神秘人 WhatsApp叫佢唔好玩電話，究竟係邊個嚟呢？（王偉洪攝） 

八卦陣

神秘女子警告吳克儉停玩手機

教育局局長吳克儉上星期四「魂遊」特首答問大會，俾長毛嘅議員助理影到佢用手機上彭博睇股票，順手將呢種玩忽職守嘅醜態放埋上網。原來呢單嘢有下文，呢張相放上網廿分鐘之後，唔得掂局長收到一個神秘人嘅 WhatsApp，提醒佢睇緊股票幅相俾人擺咗上網，叫佢唔好再玩電話睇股票（ Don't play phone, your photo has been uploaded. Checking stocks.）。

不過，唔得掂部電話無入到呢個神秘人嘅電話號碼，唔似係佢教育局或者新聞處嘅同事。記者打過呢個號碼，電話接駁響聲唔係香港嘅，睇嚟機主出咗埠，飛咗線去留言就係女人聲嘅錄音。本刊嘗試以 WhatsApp聯絡佢，但未收到佢回覆，暫時只係睇到佢擺喺 WhatsApp幅卡通頭像，同埋喺 Line見到佢個名叫 Karen。
記者再三查證下，發現唔得掂太太應該都係叫 Karen，教育局新聞秘書話局長離港休假當中，與 Karen不在香港嘅跡象啓合，睇嚟叫佢唔好睇股票嘅神秘人九成係佢太太喇，咁算唔算俾太太踢爆咗佢有買股票？唔得掂睇股票事件被踢爆當日，政黨即時加強警惕，民建聯內部透過 WhatsApp傳令，叫旗下議員開會唔好做私人同無聊嘢。連保皇黨都認定你係睇股票，吳局長都係認咗佢啦！

呢個咁可愛嘅卡通頭像，背後係咪吳克儉太太梁允愛（右）呢？ 


唔得掂俾人影到用手機睇股票，但佢死口唔認。（網上圖片）

公屋六十年　慘變八萬五

二○○三年十二月二十三日，政府喺石硤尾舉行公屋發展五十周年盛大慶祝活動，時任房屋及規劃地政局局長孫明揚（左）同常任秘書長梁展文（右），一同品嘗飛機欖，緬懷昔日公屋歲月。（《蘋果日報》圖片） 

今年適逢香港公共房屋發展六十周年，但梁振英政府將前朝拍板嘅大型慶祝活動啟動儀式取消，靜靜雞變咗房委會閂埋門食餐晚飯當係揭幕，事後隻字不提、照片欠奉，好似八萬五政策咁「唔講就當唔存在」。
曾蔭權政府二○一一年斥資過千萬大搞呢項慶祝活動，重頭戲係石硤尾徙置區原址舉行大型慶祝酒會，點知變咗房委會委員四月底食一餐晚飯就算數。房委會回覆，當晚播咗一套新製作公屋發展紀錄短片和發表演辭，代表啟動儀式開始咗。慶祝活動「八萬五化」，公屋聯會主席王坤話好正常，「慶鬼慶馬咩，依家房屋問題咁嚴重，唔通慶祝輪候冊破紀錄超過廿二萬戶？」
其實，九九年公屋四十五周年嘅慶祝活動規模好大，會展有二千人出席酒會，除咗董建華做主禮嘉賓，時任外交部駐港特派員馬毓真、地產建設商會會長何鴻燊和期交所主席葉謀遵都有出席，連李嘉誠都有到場。

工聯會借疑犯抽水

工聯會仲拎曾景文張相出嚟宣傳抽水，其實想搏咩？ 

荃灣一條用咗一億七千萬興建、號稱全港最長嘅行人天橋，原定前年一月落成啟用，但係工程進度緩慢，又因為發現駁位有裂縫，搞到今年四月底先至全面開放，當區區議員同立法會議員自然「全力抽水、成功爭取」！
不過，工聯會麥美娟嗰條橫額，就搵咗俾廉署告緊嘅路政署助理署長曾景文出嚟做布景板。事緣工聯會荃灣區議員葛兆源舊年六月曾約見曾景文，反映市民對天橋工程延誤嘅不滿，雖然當時曾高官同發展局局長麥齊光涉嫌呃政府租金津貼單嘢未俾人揭發，但到今日仲拎一張疑犯嘅相出嚟抽水，工聯會真係好需要日以繼夜、夜以繼日咁累積吓政治智慧。

染紅電視台扮香港傳媒

碼頭工潮期間，唔少記者長期留守葵涌碼頭同長江中心，上星期三工潮踏入尾聲出現一副新面孔，呢個一踎低就「露底」嘅青澀男，拎住「 One TV」咪牌喺長江中心外面行嚟行去，個個記者都問︰「嘩，邊位呀？」原來 One TV叫做「亞太第一衞視」，今個月初正式啟播，市場定位係「立足香港，背靠內地」。
One TV副台長兼新聞中心總監陳箋，早排接受訪問時語出驚人，聲稱喺港台做咗十四年，培養咗做新聞要中立公正嘅核心價值，亦都係未來營運電視嘅標準︰「我們不做挑戰政權的東西，我們不做對於中國這個政治制度的評述，但我們要客觀地對社會現象去報導、去評論。」集團行政主席兼總裁周建順係《商報》前副總編輯兼總經理；常務副總裁薛婕斌係股東之一，亦係「蘇港交流促進會」副主席，呢個促進會好巴閉，得到中聯辦高層贊助。對於阿爺嚟講，呢類以內地資金營運、落戶香港嘅染紅衞視台，叫做「香港傳媒」。想見識吓呢個電視台，可以試吓去 now寬頻電視搵搵。

上週三，一名男記者拎住「 One TV」咪牌，去中環長江中心採訪碼頭工潮。行家一 check之下，先知係新開台嘅「亞太第一衞視」，但一睇到呢個台宗旨係背靠內地，大家即時無興趣。（郭永強攝） 

亞太第一衞視男記者相當騎呢，記者會開始一輪，佢先衝埋去擺咪，仲不停烏低身兼「露底」，相當嚇人。（郭永強攝）