close
林德信甩松岡 拖新女掃貨
林子祥個28歲仔林德信(Alex) ，圈中可謂女人湯圓，周時被人影到同異性出雙入對，最為人熟識係佢同日模松岡李那夜蒲攬啜。不過兩位當事人死口唔認拍拖，死撐係好朋友。既然大家都話自己係單身，當然繼續各自各精彩。
有「蜜桃胸」稱號松岡李那，日前先同糖妹男友Dominic中環蘭桂坊拍街頭激吻戲，纏綿又投入；而Alex亦唔愁寂寞，有傳佢新寵就係秦沛27歲女姜麗文(Lesley)，由於之前傳媒經常影到佢一齊，似乎有意將戀情浮面，而Lesley亦曾承認同Alex約埋行街買衫，但表示雙方只係朋友，所以無咩特別。不過話口未完，Alex又轉畫喇。
上星期四（9日），Alex一身潮人打扮，同一名打扮好似「MK妹」女仔行銅鑼灣置地，雖然佢打扮有天壤之別，但行得都幾親密。起初佢行去一間名鞋店睇鞋，原來Alex一早已經網上睇鞋款，行入去就起個電話，俾張圖片問sales有無佢心水貨，而個女仔一直就佢身邊，絕對係跟得女友。不論中、日或港女，Alex一概全面接收，堪稱新一代集郵男。
放大圖片
全站熱搜
留言列表
