CLOSE-UP

愛•韓潮

瘋追「少女時代」，狂煲「 Running Man」，獨買「 ETUDE HOUSE」，喪食「泡菜」，爭用「 Samsung GALAXY S4」……
韓潮早已經成為好多港人生活嘅一部分。
今次搵嚟中韓混血兒、追星族、韓國文化研究專家，講講點解韓潮咁犀利。

Sue

22歲
中韓混血兒，正職插畫師，七歲起跟隨父母來港定居，雖然鍾意香港小食，但始終比較欣賞韓國人嘅生活文化，亦都因為擁有韓國血統而感自豪。

Myra

22歲
五年前喺網上認識 Sue，成為知心好友，而家更係 Sue工作上嘅最佳拍檔。原本對於韓國接近零認識，喺 Sue薰陶下變成忠實「韓粉」，用韓國化妝品、著韓裝之餘，當然最欣賞韓國出品嘅花美男。

優越韓產

見 Sue手握 iPhone 5， notebook用 MacBook Pro，難道身為韓國人都唔支持韓國產品？非也！「畫圖同埋多媒體創作， MacBook嘅軟件功能同穩定性始終好過 Windows電腦，而且用開 Mac機會習慣用埋 iPhone，好難改。不過屋企人十幾年嚟只會用韓國出品嘅手機同埋電器，而家父母手機就係用緊 GALAXY Note 2。」
雖然 Sue未係 Samsung或 LG嘅信徒，但就好 proud of韓國嘅出品，「 iPhone初推出時，即時打低 Samsung同埋其他對手。但睇到 Samsung之後發力狂追，近年仲愈做愈好，打低埋其他對手而掀起韓風，身為韓國人都覺得好自豪。」

良性影響

Sue定時都會親身上鏡拍攝韓語教室影片，然後 Myra負責剪接工作，再將影片放上 Facebook同網友分享。 

身邊嘅 Myra反而會優先選擇買韓國出嘅產品，「早幾年一直睇唔起韓國嘅產品，覺得設計唔靚、又唔襟用，只會揀日本或者歐洲貨。但近呢兩年，韓國產品設計進步咗，有好多好玩新功能之外，又型仔。」慢慢 Myra更無韓不歡，「舊年由 iPhone轉用 GALAXY Note 2；只用韓國化妝品；愛著韓國時裝；鍾意飲韓國保健湯水……」生活早已被韓潮同化。

喜愛韓藝

託韓國朋友買嘅韓文首爾旅遊書，內裡刊載大量「隱世小鋪」介紹，係 Sue嘅絕世秘笈。 

除咗韓國產品之外， Sue最欣賞韓國嘅傳統同埋藝術文化，每年返韓國探親時，都專登去搵文藝市集閒逛，「韓國好識得保留傳統文化，國家好支持藝術發展，所以藝術館、文化氣息濃厚嘅小店鋪開得成行成市。唔似得香港乜嘢都要同地產掛鈎，俾大財團壟斷晒，搞到香港已經再冇特色。」

韓樂熱潮

舊年 Sue同 Myra去完首爾旅行後，出咗一本專門介紹首爾嘅特色小店、 cafe及藝術館。（ Sue提供相片） 

講起 K-Pop， Sue同大部分香港少女一樣表現得異常興奮，「雖然喺香港生活，返屋企只會睇韓國衞星電視節目，全天候𥄫實韓國最新潮流。最鍾意聽 BIGBAND嘅歌，好聽之外，五個成員都好靚仔！好期待 G-Dragon（ BIGBAND成員）五月中來香港開演唱會，一早已經撲飛睇！」

追星攻韓

Alex

27歲
平面設計師，早年只會留意台灣音樂，兩年前「睇中」韓團「少女時代」（九名少女組成偶像組合，簡稱「少時」）後，對 K-Pop（韓國流行曲）嘅喜愛就一發不可收拾。舊年特別成立網上 Facebook專頁「 The Ninth Century（ TNC）」，同一眾香港韓粉交流。

Gary

27歲
做產業測量嘅 Gary，同 Alex因為一齊搞 Facebook群組 TNC而認識，同樣係「少女時代」忠實粉絲，身上所有 gadgets加埋屋企電器，均為韓國出品。

追星記錄

Alex同 Gary嘅「少時」珍藏多如繁星，亦都只會用韓國品牌嘅 gadgets。 

講起韓潮，最瘋狂嘅當然要數追星族。 Alex同 Gary都係「少時」忠心粉絲。 Alex就話：「我哋兩個都係兩年前開始鍾意『少時』，一年平均至少去韓國追星六、七次，兩年差唔多使咗成七、八萬蚊，諗番轉頭都覺得有少少瘋狂。」

專買韓品

開設短短一年， The Ninth Century嘅 Facebook專頁已經吸引過千人讚好。 

喺偶像嘅影響下， Alex買電子產品時，亦只會揀韓國產品。「近年韓國產品質素媲美日本或歐洲出品，而且價錢平一截，好抵玩。」 Gary更只會揀少時代言嘅 LG產品，「屋企早排換電視，於是說服屋企人換咗部 LG電視機，覺得睇少時 MV特別好睇；雖然而家用緊 Samsung GALAXY Nexus手機，但目標就諗住換部 LG Optimus G Pro。」
不過，講到相機，二人異口同聲話唔會揀 Samsung， Gary就話：「 Samsung近年的而且確出咗好多款唔同功能嘅相機，但好睇唔好用，影相出嚟嘅質素同 Canon或 Nikon始終有段距離，為咗可以影到完美嘅偶像相片，一定唔會搏。」

十年韓讀

場地提供： BBQ 7080 

宣柏健

雖然 GALAXY S4嘅外表同上一代冇乜點變，但 Patrick都即刻換新機。 

36歲
自由特約作家，研究及報導韓國文化已超過十年，無論韓國旅遊、明星定係流行文化均十分熟悉。
最近獲韓國官方觀光社頒發感謝狀，肯定佢嘅功勞。

文化認知

全智賢 

十幾年前，宣柏健（ Patrick）喺男性潮流雜誌做記者，寫吓影評、講吓時裝，仍未係一個韓迷。鍾意學外語嘅 Patrick，雖然學過法文及日文，難得搵到地方學韓文，於是即刻報名，「當年韓風未成氣候，想學韓文嘅地方真係少之又少。」
學習韓文之後， Patrick開始被委派訪問韓星，令佢有更多機會接觸到韓國文化。不過印象最深都係第一次去韓國自由行，「單人匹馬去韓國慶州時，竟然迷咗路，當時自問韓文仍然是『有限公司』，但當地人態度友善，雖然大家都唔知對方講乜，但都會自動自覺帶我四圍去，對韓國人嘅印象大大加分。」

成功之道

少女時代@允兒因工作嘅關係， Patrick有機會同韓星近距離接觸，羨煞旁人。 

Patrick認為近年 K-Pop成功之道在於「國際化」，「而家韓國偶像除咗會唱韓文歌之外，亦會唱英文或日文歌，而且不斷去海外巡迴演唱，擺明冧海外 fans。」 Patrick亦好欣賞韓國電子產品會加入人性化功能，「好似 GALAXY Note II嘅 S-PEN，方便用家隨時畫公仔，記錄生活點滴； GALAXY S4嘅懸浮操作同埋 Smart TV嘅動態操控，雖然未必實用，但起碼吸引好多人講，成功製造話題。」

創意至上

韓國品牌最鍾意搵新進組合做代言人，其中 Samsung GALAXY Camera就搵咗新組合 skarf做代言。唔識佢哋？我都唔識，不過幾年之後隨時彈起。 

追得韓風，點可以唔用韓國電子產品。雖然有人因為明星做代言先去買，但冇技術、冇功能，又點會繼續用？
加上不時推出「估唔到」嘅產品，大把話題同朋友講。
即使未必件件產品都有睇頭，但至少肯推出市場試反應，對自己嘅產品，韓國人永遠好有信心。

屈曲芒面世

老實講，齋睇一部真係唔多覺弧度有幾勁，要幾部拍埋先睇到效果。 

OLED屏幕一向係韓國廠嘅天下，而用 OLED生產嘅可屈曲電視，當然亦由韓國生產商飲頭啖湯。今年年頭 LG講明六月會推出 55吋弧形電視，廠方力 sell可以將個電視「包」住自己，感覺似身處戲院。如果加埋手勢控制、 Android作業系統等功能，日本電視想贏都幾難。

投影當時興

以手機嚟講， GALAXY Beam嘅投影光度算唔錯，擺定一個位睇片就冇問題，打機左搖右擺就有難度。 

作為全球大型手機生產商之一嘅 Samsung，點會淨係得高規格一個賣點，其實仲有好多計仔，好似上年就出咗部內置投影功能嘅 GALAXY Beam，最大可以投射出 50吋畫面。雖然唔係全球第一部（之前好多大陸山寨廠都有出），但至少令好多人知原來手機可以咁玩，至於好唔好賣，見佢咁耐都冇出第二代就知啦！

最輕最薄

睇見 Series 9咁薄，唔講會以為係 MacBook Air。 

雖然韓國出產嘅 notebook表現唔算好評，但一樣出過驚為天人嘅產品，上年六月 Samsung推出嘅 Series 9， 13吋 i7機款都只係厚 12.9mm同重 1.16kg，喺同級機中最輕最薄，加上部機似足 MacBook Air，好多人都俾 Like，可以話係近年難得殺出血路嘅韓國 notebook。

玩作業系統

可以用相機上網，仲可以玩埋 WhatsApp，係爭在唔可以講電話。 

Tablet大行其道， Samsung旗下唔同尺寸嘅 tablet超過十款，但估唔到連相機都要 tablet化。講緊上年年尾推出嘅 GALAXY Camera，內置 Android作業系統，除咗冇得打電話，規格同功能同 GALAXY S III好相似，仲可以插 data SIM上網睇片、 send相同打機。但係而家已經好多人用 Android手機，有冇必要相機都用埋一份呢？

自動 show食譜

如果有埋中菜食譜，應該有唔少「無飯主婦」有興趣試。 

LG早兩年已經將 Android植入洗衣機、雪櫃入面，搞到日本家電要跟風照做。單係用部手機控制家電仲未夠，最近 LG將 RFID標籤貼咗喺食材上，當微波爐、焗爐識別到標籤後，就可以喺屏幕或手機顯示相關食譜，方便過拎住本書左搵右搵。

遊韓買電

去韓國首爾買電子產品，價錢雖然唔夠日本咁平，但勝在同一款機，硬件用料同規格都好過國際版，加上電壓同香港一樣都係 220V，加個兩腳圓頭轉三腳插頭就用得，值得走去睇吓有咩新潮流同趨勢。想知有咩集中賣電子產品嘅地方？問吓韓國通宣柏健就一清二楚。

影音為主　 Techno Mark

如果只係對影音產品有興趣，唔想嘥時間睇電腦產品，可以去江邊站上面嘅 Techno Mark，樓高八層，入面主要係賣相機、 MP3機同家庭電器為主，加上附近有唔少潮流商場，最啱同女朋友或者一家大細行。

韓國秋葉原　龍山電子商街

位於韓國地鐵龍山站，可以話係韓國最大型嘅電子產品零售點，淨係專賣電子產品嘅商場都有四個，如果夾到時間星期六去，仲會有半價電子產品跳蚤市場，足夠消磨一日。

科技崛起

九七年金融風暴，幾乎令南韓萬劫不復，但近年政府努力發展資訊科技，令南韓不單只喺文化方面反攻歐美，連科技亦領先唔少國家，「軟實力」不容忽視。

射上太空

全球得十個國家成功發射自家研發火箭，今年一月南韓就成為第十一個，成功試射「羅老號」（ Naro）火箭，將衞星送入預定軌道，令南韓正式進入「太空新紀元」。

機械獄卒

唔單只手機高科技，南韓連監獄都好 hi-tech，專登開發機械人嚟做獄卒，配備 3D相機，巡房時可以監察獄內所有情況，一有異樣即刻開啟警報，仲話已經研發緊識得搜身嘅機械人，未來機械獄卒可以做到更多任務。

熱能衫

韓國冬天咁凍，梗係要搵方法保暖，當地有個運動服品牌叫 Kolon，發明咗 Heatex科技，透過專利導熱板，可輕易將外套加熱到 37、 45同埋 67℃，充滿電就可恒溫十小時，幾凍都唔怕。

腦電波控板

Samsung研究出可以用腦電波控制嘅 tablet，用一部 GALAXY Note 10.1做試驗，透過腦電波開關程式、收發訊息，甚至揀歌，平均只需五秒，就可以將腦電波轉成指令，殘障人士諗兩諗就可以控制部 tablet。

無水洗衣機

講明洗衫，梗係要用水洗，但係 LG就發明咗完全唔使用水同埋清潔劑嘅洗衣機，仲喺今年年初美國嘅 CES電子展現場示範，可惜記者點問，負責人都唔肯講背後原理，話係商業秘密，激死！

facebook

只要在 Facebook以「 NEXT 3.0」為關鍵詞搜尋，或以手機的「 QR code」 app掃描，就可以睇到更多新聞同產品情報。

正反韓潮

韓國組合「少女時代」近年橫掃香港演藝界，街坊中不少宅男都力讚。 

韓風吹起，韓國明星乘勢殺入香港，令好多哈日 fans紛紛跳船，轉追韓星。
不過勢估唔到落區問街坊，發現原來唔係一面倒盲目力撐，正反雙方講得頭頭是道，有根有據。

正方

最愛少時
J　 19歲　學生
韓國歌唱組合少女時代係眾多宅男嘅女神， J絕對係其中之一，「勁鍾意少時，因為成員個個都多才多藝，唱得又跳得，論樣貌好過晒啲日本組合。最鍾意上 YouTube睇佢哋嘅 MV，一個字：靚！」

Like韓 Phone
Kennis　 19歲　學生
「咁多種韓國產品，最鍾意依然係手機。因為除咗機款 update得快，連 firmware亦更新得超快，用起上嚟冇咁多 bugs，見到 Samsung上個月出 GALAXY S4，第一時間去排隊買。」

重口味
Jessica　 19歲　酒店侍應
講真，好多人鍾意追韓星，無非想睇型男索女，估唔到 Jessica都幾重口味，直認至愛 PSY，「咁多個韓星，最鍾意 PSY！一首《江南 Style》唱到全世界都識，好佩服佢一把年紀，跳舞可以跳得咁勁，近排首新歌《 Gentleman》雖然俾人話冇新意，但係同樣跳得超好睇。」

色彩最強
Rachel　 20歲　售貨員
其實除咗追星，韓國仲有化妝品最得香港女士歡心， Rachel就跟到足，「以前鍾意日本化妝品，但近年轉晒用韓國品牌，不單只價錢平，無論色彩同產品更新速度都比較快。好似前排先興完 bb cream（粉底），而家就興另一種叫 cc cream，好吸引人買。」

反方

唔盲目崇拜
Vienn　 22歲　學生
「雖然身邊好多朋友追韓星，但個人完全唔覺得好特別，最多留意吓韓國潮流服飾，但都只係覺得質料同 cutting比內地好，冇乜興趣。」

討厭單一
阿文　 19歲　酒吧調酒師
街訪時，好多人話韓星聲色藝皆全，但阿文話聽到韓文歌就煩爆，「近年韓星的確係幾爆，不過已經太濫喇，去到邊都聽到韓文歌，又唔知唱緊乜，啲副歌不停咁重複，煩爆！而且啲男士跟足晒韓星著窄腳褲襯對休閒鞋，好冇品味啫。」

韓流演變史

韓流短短數年間喺香港爆發，中大日本研究學系助理教授林大偉分析，由文化到經濟轉變，都係促使「棄日投韓」嘅誘因。

《阿信的故事》劇照 

80年代──日系播種期
隨着 70年代尾日本經濟起飛，亞洲其他國家都渴望引入日本嘅技術同管理方法，紛紛翻譯日本著作，因日本文化同中國傳統文化相近，觀眾較易「入口」，電視台就乘勢購入日劇，當作新興潮流，代表作有《阿信的故事》。

90年代初── ACG爆發
《阿信的故事》曾掀起過一輪日潮，可惜其後無以為繼，日劇未受追捧。相反，日本流行歌卻彈起，例如近藤真彥同山口百惠等流行歌，均被香港歌手如譚詠麟同張國榮改編翻唱，最經典係梅艷芳改編近藤真彥歌曲《夕陽之歌》，唱到街知巷聞。另外，由日本發起嘅 ACG（ Animations、 Comics、 Games）文化紅遍全球，代表作要數《龍珠》。

90年代末──日系巔峰
日劇正式殺入屋，其中最巴閉要數當時香港最流行嘅「三上頭」（江口洋介飾演日劇《東京愛的故事》角色「三上健一」嘅髮型）。及後《 Long Vacation》同《 Love Generation》成功捧紅木村拓哉同埋松隆子，標誌着日本流行文化最巔峰嘅時期。

《我的野蠻女友》劇照 

2000年──由日轉韓
日本經濟漸走下坡，令到日本流行文化發展亦大受影響。相反，南韓經濟同科技發展加快，產品價格亦相對便宜，廠家轉而引入韓國產品，加上韓劇《藍色生死戀》、韓國電影《我的野蠻女友》同《八月照相館》喺香港叫好又叫座，部分韓星如李秉憲、全智賢開始走向國際，不過，香港觀眾仍以日本流行文化為主。

PSY 

2010年後──韓風吹起
韓國演藝事業開始迅速彈起，其中組合「 Wonder Girls」一曲《 Nobody》最 hit，代表韓風正式吹入香港，上年 PSY同少女時代更成功踏進國際舞台。科技方面，以 Samsung為首嘅韓 Phone走向國際市場，去年更打低蘋果 iPhone，成為全球銷量最高嘅智能手機品牌。

韓車抬頭

迷韓國偶像、追韓製 gadgets，韓風 fans有升無跌，連車迷亦逐步投向韓國車懷抱，現時韓國已經係第五大汽車生產國，兼第六大汽車出口國，影響力愈嚟愈大。
韓國製車工業，始自上世紀五十年代，最初只係改裝美國軍用吉普車，直到六十年代，第一間合資車廠出現，之但係搞足幾十年，直到九十年代，先至開始搞自家發展，捱到今日總算吐氣揚眉。
今時今日嘅韓國車，外形靚，揸出街有高收視率，以為得個樣？好，先講技術，今年初 Hyundai將氫燃料電池車（ fuel cell）正式量產，係全球第一間車廠咁做，新車主打歐洲市場，同世界級車廠有得揮。
再來講創意，利用 NFC開車門，將手機當車匙；新推出嘅 Tucson，將過往只喺車前後嘅距離感應器，裝埋喺車嘅兩邊，泊 S位時更放心。
另一韓國汽車品牌 Kia，兩個月前亦推出混能車 Optima hybrid，瞄準美國市場，拍住大佬 Hyundai齊齊衝出韓國。
本刊今期嘅《壹號幹線》，正係介紹 Hyundai Veloster Turbo。

韓國最大車廠 Hyundai，最新嘅概念跑車 HND-9 Venace，已經追上歐美跑車級數。 

多間車廠積極開發單人乘載器， Hyundai亦唔例外， E4U時速達每小時三十公里。 

韓國汽車融入 gadgets，以 NFC開車門。 

首部韓國生產汽車，其實係改裝美國軍用吉普車，喺五十年代推出，賣出約三千架。 

繁榮背後

死亡工人家屬喺三星廠房門外示威，堅持要向三星討回公道。 

韓國看似萬物「欣欣向榮」，但背後辛酸就不足為外人道，尤其電子大廠三星（ Samsung），近年屢被指漠視廠房工人安全，令唔少員工患上癌症。據當地志願組織透露，曾接獲約一百八十宗三星工人患病求助個案，其中更有六十九人死亡。此外三星亦曾接連發生工人跳樓，工人經常要長時間工作，實在令人反思發展嘅代價。

text：科技組
photo：許朝暉、陳健邦