close
同你吟一吟
袁詠儀晒靴
開心，買嘢；唔開心，更加要買嘢。女人花錢，根本唔需要有任何理由。之所以，旺區幾貴租都好，總有名店！
銅鑼灣名店區，不離百德新街同利園山道，早個禮拜，同一時段喺 Hermes見到馬德鐘太太張筱蘭同 Chilam老婆袁詠儀。兩個阿太唔係約埋，前後相差起碼半個鐘，但一見面，馬太張太拖晒手，雞啄唔斷，交情非淺。
全程揀飾物嘅馬太，坐低打開本飾物天書係咁揭，頸鏈試完一條又一條，始終唔啱心水。相反張太袁詠儀早有目標，店員帶咗佢埋角落位，冇耐就做成交易： Jumping boots一對。
搵到心頭好，張太仲同馬太交流一番，先至拜拜走人。買完嘢，夜晚袁詠儀約咗經理人喺中環醫肚，十點幾食完，行番去擺花街攞車，兩人兩車兩張牛肉乾。又要破財，但張太依然笑笑口，只係衝口而出，講咗句： Oh, shit！
Well！一對 Hermes Jumping boots要兩萬起跳， 320蚊，買個釦都唔得啦。
袁詠儀一早睇中對 Jumping boots，試完攞俾馬太過目，快買快閃。 
撞到袁詠儀，兩個阿太拖住手係咁傾。 
幾個店員圍埋招呼馬太揀頸鏈，可惜佢搞咗大半個鐘，都係冇心水。
同經理人食完晚飯去攞車，見到牛肉乾，袁詠儀仲係笑笑口。 
上星期六馬太同仔仔行 ifc， 15歲馬在驤手上攞住本 Tom Clancy嘅舊作《 Hunt for Red October》，老豆做過 G4，馬仔亦對軍事小說特別有興趣。 
撰文：八珍
全站熱搜
留言列表
