登機證

星戰賀壽　東京迪士尼

我告訴公司的秘書小姐：「我要去東京迪士尼採訪。」秘書小姐即時大笑：「吓，好似唔係好襯你喎！」
很合理的觀察。要一個年過三十五沒有子女而長年累月黑面又有酗酒困擾的肥胖男人，對住米奇老鼠唐老鴨高飛狗開心到似費格遜捧盃，確實好困難。我係要去！因為今日的迪士尼已經不是昔日的迪士尼。
Pixar一早登陸，《反斗奇兵》的三眼仔受歡迎過小熊維尼； Marvel即將殺到，一諗到 2017年可以搭港鐵去見鐵甲奇俠，簡直興奮到需要立刻 D.I.Y.一套戰鬥服。再加埋東京迪士尼為慶賀開幕三十周年，推出以《 Star Wars》作主角的新機動遊戲《星際旅行：冒險續航》。秘書小姐，你話東京迪士尼係咪好啱我呢？可惜，《 Star Wars》個宇宙無包埋巴斯光年同雷神奇俠！

五十幾段片　問你點玩晒？

東京迪士尼在四月十五日開始正式慶祝三十周年，守尾門項目是五月七日才現身的《星際旅行：冒險續航》（ Star Tours: The Adventures Continue），黑武士孭飛。
機動遊戲的最新趨勢，一定要配合 3D影像。你坐定定，睇住畫面，感覺上已經好似玩完一輪過山車加跳樓機，既逼真又慳地方，而 3D片段有情節，玩家好似代入咗故事角色，再加分。同類例子，近年，最成功首推環球影城的《變形金剛》機動遊戲。
迪士尼派出《星球大戰》接招。論刺激度，講真，輸成條街，嗰四分鐘片段，真係有料到嘅，令你感受有啲啲驚慌嘅，唔知有無兩秒。靠乜去反擊呀？靠多！唔似《變形金剛》，玩三千次都一模一樣，《星際旅行：冒險續航》有成超過五十條不同的短片，隨機播放，換句話說，如果你是星戰 fans，就算你有時間有財力日日去玩玩夠三千次，都未必睇得晒咁多段片。真係毒到爆。係呀，啲片咪就係跟住 C-3PO坐太空艙飛來飛去之嘛，但一個太空艙可以容納約五十人去星際旅行，同一時間，有六個太空艙同時執行任務，人流速度非常快，人龍依然由樂園開場排到樂園散場，你就知《 Star Wars》的魅力幾驚人！

朝早，樂園一開門，人流已經急不及待衝去排隊，但門口冇巨型黑武士，又冇白兵冇尤達大師可以合照。唉…… 

條人龍係長，但行得算快。入到去，仲有啲片段喺大銀幕播出，解悶。 

金色的 C-3PO望住對面 R2-D2，點解唔放在陽光下供人拍攝呢？

好嘢，終於排完隊，入到太空艙，其實即係放映室。 

片頭一段提醒你咪玩玩吓起身搞破壞的預告片，比正本戲來得更有趣。 

好啦，正式播片，由於座位的移動能力有限，所以真係單靠段片帶你感受太空。如果玩《變型金剛》令我驚心動魄，我會建議玩《星際旅行：冒險續航》時帶埋三歲小朋友去娛樂。

米奇佔領　星戰精品

我份人好老實，好少呃人，去到東京迪士尼，一心諗住狂掃《星戰》精品，點知見到成個主題公園賣來賣去的《星戰》嘢得嗰幾樣，係有啲失望。
你知，《星戰》一向是 Kidult們的無底深淵，精品玩具多到爆，角色比《金枝慾孽貳》仲要多幾倍，買家實有一個鍾意。買把激光劍，似樣嘅，平平哋，幾千；貴起上嚟，可以幾萬。好彩，在主題公園，目標顧客始終是小孩，於是，你見得最多只是米奇扮 Skywalker，史迪仔扮尤達大師，唐老鴨扮 R2-D2，如果你是迪士尼 fans，應該會覺得幾有新意；如果你是《星戰》 fans，如我，就應該會留定啲彈藥。
睇完呢堆精品，你是否可以估計到，若干年後，《復仇者聯盟》會變成怎樣？米奇是 Iron Man，史迪仔是變形俠醫，唐老鴨是美國隊長……

襟章$95一隻，五位 crossover角色齊備。 

扇$182 

激光劍造型的糖$44

黑武士朱古力$63，其實係買個夾仔。 

米奇 Skywalker吊飾$114/曉發光激光劍匙釦$92 

史迪仔尤達大師吊飾$114/筷子$80一對，仲有藍、紅、綠三色。 

我個人推介買爆谷，全個樂園有超過十款爆谷盒發售，星戰呢隻$127，至少有得食， refill都只係$39一次。 

新漢堡　有造型仲有味道

「星際旅行：冒險續航」位於明日樂園（ Tomorrow Land），玩完遊戲，排完隊，可以試一試去隔籬明日樂園舞台餐廳醫肚。為咗慶祝，有三款新漢堡登場，漢堡造型係米奇，個盒仲可以揀米妮或史迪仔。難得不在包裝或賣相，難得在竟然幾好食，塊麵包的質感鬆軟，非一般主題公園快餐店的水平。

漢堡單點$46，配薯條、汽水的套餐$78。 

士多啤梨慕絲蛋糕$24、米奇造型麥樂雞$25/ 5塊。 

「星際旅行：冒險續航」
地點：東京迪士尼樂園明日樂園

全新花車巡遊　老前輩撐場

除了星戰，東京迪士尼三十大壽，另一賣點是全新花車巡遊。
名為「幸福在這裡」的巡遊，是全新的；路線都是全新的，由慣常的順時針改為逆時針。不過，班主角，全部是舊的。
米奇米妮高飛狗跳跳虎，連白雪公主阿拉丁木偶仔都有，連夢遊仙境嘅愛麗絲都有，係無《怪獸公司》嘅毛毛同單眼仔？花車巡遊喎，無《反斗車王》？大佬呀，你究竟知唔知乜嘢叫做受歡迎呀？
因為要向古代致敬？花車上的公仔造型，部分明顯大懷舊。不過，你信我啦，除咗壓軸成六米高嘅米奇米妮花車外，全場歡呼聲最響就係《反斗奇兵》花車。你可以跟市場抗衡嗎？霸權絕對可以。

胡迪、巴斯光年、翠絲等主角揮晒手打晒招呼，可惜三眼仔唔識郁。更神奇係霸位的日本人預先三粒鐘開始霸，但真係等到巡遊一小時前聽到廣播至打開野餐墊，守秩序程度真係無話可說。 

最後一架花車，當然係大佬米奇，但架車似足 Pixar套《沖天奇兵》嗰間氣球屋。 

粗線條懷舊 look。

除咗巨型花車，有部分角色會採用親民方式親近群眾，例如史迪仔坐單車。 

《愛麗絲夢遊仙境》中，紅心皇后啲都有份載歌載舞，咁點解無更多 fans的其他角色呢？ 

幸福在這裡＠迪士尼樂園
時間： 3:00pm
地點：由夢幻樂園出發，經世界市集再到卡通城，歷時約半小時。

迪士尼海洋小可愛

相對於迪士尼樂園花車巡遊的大堆頭，迪士尼海洋的慶祝三十周年活動來得比較內斂，只不過喺朝早 10:40派出一隻船載住幾個明星出來打打招呼就算。趕唔切去睇，也沒有大損失。

海上傳幸福＠迪士尼海洋
時間： 10:40am
地點：地中海港灣

入胡迪口　射三眼仔

唔經唔覺，迪士尼海洋原來都開咗十年。
最新設施咪就係賣《反斗奇兵》囉。「反斗奇兵瘋狂遊戲屋」（ Toy Story Mania!）個遊戲其實同迪士尼樂園嘅「巴斯光年星際歷險」或「怪獸公司迷藏巡遊車」一模一樣，都係叫班人坐住架車入間房兜圈然後見嘢就射，咪一樣大受歡迎？因為啲角色受歡迎吖嘛！開咗半年，火速成為迪士尼海洋的生招牌，遊戲無新意唔緊要，最緊要門口裝修得靚，又有好多小趣味位置任人拍照，呢方面，星戰區真係要多多學習。

本來胡迪先係電影主角，但係巴斯光年一早就自立門戶，有自己嘅冠名遊戲。《反斗奇兵》移師迪士尼海洋發展，俾番胡迪一個大頭同大口，算係咁啦。 

薯蛋頭先生會失驚無神走出來講笑，唔識聽日文無所謂，大家只想拍照。 

遊戲區外，放咗好多嘢玩，例如哈哈鏡。

兩兄弟齊齊 cosplay扮胡迪，個細佬，好呆，更受歡迎。 

另一款遊戲，小朋友係應該齊齊玩呢啲，唔係自己篤 iPad。 

三眼仔帽$221，三眼仔糯米糍$27/3粒。我超後悔無買到頂帽。

遊戲無乜特別，真係無所謂㗎，大家在排隊等入場的時候，有啲得意嘢影吓，已經好滿足㗎啦。 



咪就係坐住架車戴住 3D眼鏡射畫面嘅分牌囉。 

玩完，有分數可以定輸贏，如果同仔仔女女去玩，都應該幾開心。 

「玩具奇兵瘋狂遊戲屋」
地點：東京迪士尼海洋美國海濱區

限定大抽獎

既然係為咗慶祝三十大壽而來，你總要做一啲你上年做唔到下年又無得做的動作。例如去玩呢個名為「幸福歡享點」的裝置。
迪士尼樂園及迪士尼海洋各設五個，只須氹掂父母或男友，去商店以接近港幣二百元正購入一嚿玩具，帶住玩具，行近裝置，將玩具插入裝置，如果個玩具咁好彩三盞燈着晒，在場職員就會送上吊飾一個。我在裝置旁觀察了一小時，玩者無數，中獎者零。噢，好幸福呀！

呢個紅色玩具真名叫幸福歡樂頸鏈，值$190，你買完用來放在右圖的巨型裝置內，如果三盞燈着晒，就可以得到小吊飾一件。 

迪士尼大使大酒店重開

如果要玩晒迪士尼兩個主題樂園，咁就不如索性住埋迪士尼的酒店。共有三間迪士尼酒店，但迪士尼大使大酒店（ Disney Ambassador Hotel）剛翻新重開，當然最吸引。

如果你住迪士尼但係又想低調啲，其實迪士尼大使大酒店幾好，裝修風格參考 30年代美式設計，唔會過分 colourful，房價$2,136起。 


入住賓客，至少可以掃走呢堆「精品」。 

三十周年黃金吊飾，只限酒店住客購買，仲要不同酒店賣不同款。$198/一隻 

有用資料

簽證：持特區護照或 BNO均毋須簽證
貨幣：日圓￥ 100約兌港幣$7.63（文中價錢以此計算）
時差：比香港快 1小時
迪士尼入場門票：建議購買兩日門票，一日玩迪士尼樂園，一日玩迪士尼海洋。
成人$816， 12-17歲學生$717， 4-11歲兒童$565
交通： JR京葉線或武藏野線舞濱站
網址： http://www.tokyodisneyresort.co.jp 

撰文：方俊傑
攝影：陳家維
模特兒： Yui Wong