驗樓師賴達明教路指，若果單位漏水，可自行購買快速試紙，已可簡單測試漏水源頭。（羅國輝攝） 

貼士

快速試紙　檢驗家居漏水

市民遇上家居漏水，通常都只是「估估吓」推測源頭，尤其遇上樓上住戶撒賴不認賬，追討和維修就更困難；但原來坊間有不少價錢便宜、使用容易的快速試紙，只須三項簡單測試，就可以推敲到漏水源頭。

家居漏水成因眾多，由雨水、沖涼水、廁渠水到洗碗水，香港公正行技術總監賴達明指出，想找出源頭，其實只須用試紙檢測滴水成分。「呢啲試紙一盒只係三百蚊左右，已經有百幾張，有排用，喺科學用品公司好易買到！」

測試一：鹹水定淡水？係唔係屎水？

判斷滲漏源頭，第一步應先確定漏水屬鹹或淡水，住戶可利用氯化物試紙拭擦牆身，若然試紙變色即表示對鹽分有反應，證明是鹹水。「全港八成以上大廈都係用鹹水沖廁，驗到鹹水即係證明糞渠爆咗，管理公司要跟進。」
如果想再進一步確認是否用完的沖廁水，則可另外再用阿摩尼亞試紙測試，如變色即代表漏水含有尿液，屬糞水。「如果可以分辨到係抽入屋嘅海水、定係排落樓下的屎水（滲漏），追究起來就方便好多。」

鹽分試紙在沾上鹹水後會即時由深啡變成淺黃色，有助觀察滲漏水分是否屬廁渠水。市民亦可進一步以阿摩尼亞試劑測試（右），如試劑由藍轉為淺黃，即證明有尿液成分，屬糞水。（羅國輝攝） 

測試二：廚房定廁所漏水？

假如檢測到的是淡水，即代表是家用廢水滲漏，成因可能是地板防水層滲漏，或者渠身爆裂。究竟係廚房還是廁所漏水？只要檢測滲水的酸鹼值即可。
賴達明解釋，廚房去水大多是洗碗、洗衫污水，為了分解油分，洗衣液、洗潔精都屬強鹼性，所以如滲漏的水分偏鹼，源頭多出自廚房；反之，如漏水呈酸性，則可推測源頭出自廁所，因為通渠水等化學物大多是酸性的。

利用酸鹼值試紙可以得知漏水是否含有鹼性洗潔精成分，從而推斷滲漏是否源自廚房。（鄒潔珊攝） 

要判斷滲漏是食水還是雨水，可用氯氣試紙，不過試紙顏色只會輕微變深，須較留神才可靠肉眼分辨。（黃雲慶攝） 

測試三：食水定雨水？

若然漏水的酸鹼值接近中性、而阿摩尼亞測試又無反應，則可推論廁渠和去水渠均無出事，即滲漏源頭最有可能在於大廈食水管或外牆裂痕。「如果去到呢個位，大家不妨做埋氯氣測試，香港食水都會加入氯氣殺菌，但雨水不含氯氣，換言之﹐若證明到有氯氣，即係公共食水喉出事；反之，即係雨水滲入嚟，有機會係外牆裂了。」（趙振龍）