新車激試

代代相傳 BMW E46 325iA Touring& E91 335iA Touring& F31 328iA Touring

旅行車係一個形象幾百變嘅車種，外表雖然平平實實，但就有種與別不同嘅魅力，可以襯到唔同形格嘅車主，所以都幾長青，有咁上下歷史嘅房車都一定衍生出旅行車版。 BMW 3系自 1987年嘅 E30開始有旅行版，至今足足有 26年歷史，但係講到開始多人買，一定係隔多一代嘅 E46！跟住上代 E91更加成為潮流一樣，行街數目拍得住 Coupe。新一代編號改為 F31，「字頭」都改埋，當然有大改動！連 3代 E46同 4代 E91車主試過車都讚不絕口，表示新款第 5代既有以往優點，又有新驚喜！

BMW E91 335iA Touring Spec.
年期： 2007-2010
引擎： 2,979c.c.直六雙 turbo
馬力： 306hp/5,800rpm
扭力： 40.8kgm/1,300-5,000rpm
傳動： 7前速自動、附+/-系統
車身： 4,526× 1,816× 1,455（ mm）
當年車價： 742,000

BMW E46 325iA Touring Spec.
年期： 2001-2007
引擎： 2,497c.c.直六
馬力： 192hp/6,000rpm
扭力： 25.0kgm/3,500rpm
傳動： 6前速自動、附+/-系統
車身： 4,478× 1,740× 1,410（ mm）
當年車價：$450,000

BMW F31 328iA Touring Spec.
引擎： 1,997c.c.直四 turbo
馬力： 245hp/5,000-6,500rpm
扭力： 35.7kgm/1,250-4,800rpm
傳動： 8前速自動、附+/-系統
車身： 4,624× 1,811× 1,429（ mm）
0-100km/h： 6.0秒
車價：$559,000起
查詢： BMW Concessionaires(HK) Ltd.（ 3129 9000）

今時今日或者好多人都以為 VW Golf先係最舉足輕重嘅歐洲平民車，其實只代表咗揭背車款，歐洲人用車好開明，實用係大前提，所以由小房車發展出嚟嘅細 size旅行車，一直係主流車款之一。喺香港，講到歐洲旅行車， Audi A4 Avant一定最出名， BMW 3系 Touring近年先煲起，以 3系傳統出名操控、品牌效應，現時受歡迎程度直迫 A4 Avant。

「車尾斜咗令外表冇以前咁似旅行車。」

E46車主 Benny覺得新款車尾太斜，如果直身一啲會更有旅行車味道。 

旅行車起源好簡單，就係將部房車個尾箱向上升到同車頂一樣高，令車廂同尾箱貫通，有時車尾更可能加長少少。新一代 F31 328iA Touring車身長 4,624mm，係歷代最長 3系 Touring，比上代 E91長 98mm，比 E46更足足長 146mm，不過由於採用更低矮跑車化外表設計，望落唔覺部車笨重，尤其新車尾比以往更斜、更流線形，但就未必個個 like， 3代 E46車主 Benny：「新款外表幾吸引，但車尾斜咗令外表冇以前咁似旅行車，呢一點我有保留，始終旅行車車尾要有少少企先靚。」 Benny所講新款嘅斜車尾，其實只係得個樣，因為旅行車個尾窗愈直，尾箱先可以有愈大空間，所以好睇未必實用。

E30先係 3Touring元祖

其實 3系 Touring已經有 26年歷史，初代 E30喺 1987年初次推出旅行版，亦係 3系正式步入黃金時代，當年罕有地有齊雙門、四門、開篷、旅行版選擇，比同級對手 M-Benz C-Class同 Audi A4行先好多。不過香港行貨 E30 Touring極之罕有，全因當年旅行車未成風氣，今日行街多數係英國進口水貨車，以 325iA最多。

歐洲細旅行三強鼎立

BMW 3系 Touring其實只係眾多歐洲旅行車其中一員，喺市面上有好多對手，但講到品牌聲望、價錢、普及性，就只有 Audi A4 Avant，同埋 M-Benz C-Class Estate可以平起平坐。

Audi A4 Avant賣高性能

喺香港，只有 A4 Avant可以做到同房車版接近 50:50嘅銷量比例，可想而知 A4 Avant有幾受歡迎。新 A4 Avant同 3系 Touring差唔多時間推出，車價、定位都接近， A4 Avant較特別之處係高級型號有四驅系統，而且設有高性能 RS4 Avant，形象更 Sporty。

M-Benz C-Class Estate版本最多

旅行車都係 M-Benz專科之一， C-Class Estate有多款型號同 options選擇，而且早過 3系 Touring玩不同版本。 C-Class Estate清一色用尾驅，行車表現與 3系 Touring接近，不過 C-Class Estate頂級版 C63 AMG Estate就擁有 457匹馬力及 61.2kgm扭力，跑味極濃。

「尾箱似乎差唔多大，我以前都有摺埋後座放部單車。」

新款 328iA Touring車身長咗，但其實旅行尾箱受惠唔多，筆者特別用一把雨遮放入尾箱做比例，發覺新一代同 E91及 E46差唔多咁深，但闊度就明顯優勝，據知尾箱容積達 495公升，比上代多 35公升，如果摺埋後座貫通空間，仲可以即時跳升到 1,500公升！ 4代 E91車主 William：「睇落個尾箱似乎差唔多大，我以前都有摺埋後座放部單車，叫做剛剛好，但新款後座空間更大，摺埋之後會有更長空間，相信放單車更輕鬆。」

2012 F31新款尾箱容積有 495公升，深度同闊度都有增加，比同場 E91同 E46都大得多。 

2007 E91E91尾箱容積都有 460公升，只比新款少 35公升。 

2001 E46E46始終車身較短，尾箱容積只有 435公升。

「買呢部車一定要 Sport Line Package同天窗。」

E46車主 Benny先後擁有過多代 3系，對 3系車廂有深厚認識，新一代 3系車廂分別有 Sport、 Modern同 Luxury， Benny全部都見過，佢會點揀？「買呢部車一定要 Sport Line Package同天窗，因為 Sport Line個車廂有紅線靚好多，而且座位 Sporty。天窗就更加唔使多講，覆蓋面積大到好似天幕咁，比我部 E46吸引好多。」 Benny講得啱，雖然個天窗要加$18,200先有，但作用真係超強，令車內有極強空間感，可以拍得住開篷車！

巨型天窗面積去到後座頂，必選項目！

「新款旅行頂架終於都好似 Audi咁。」

旅行車最有型就係車廂空間實用之餘，外表都充滿特色，最明顯係旅行頂架，令到載物空間唔再局限喺車內，外國絕大部分車主買旅行車，就係貪車頂可以放嘢，單車、滑浪板、獨木舟等等。 William：「雖然我都有用車廂載單車，但上落始終唔方便，所以我喺頂架上加單車架，用盡部車嘅特性。我部車個頂架都仲係舊款，新款旅行頂架終於都好似 Audi咁，磨沙銀色靚仔好多！」

E46E46車廂用大量真皮裝飾，反映出當年追求豪華嘅潮流。 

F31中控台上加咗彩色 mon，而且跟車身顏色有紅色裝飾條。 

E91上代駕駛艙其實仲未 out，可見當時幾前衞。

尾窗可以獨立開啟，女士 shopping後唔使下下都開隻咁重嘅尾門。 

Audi用咗一排嘅「新款」旅行頂架比舊款更美觀。 

「後座腿部空間比以前多代都好，頭部就差唔多。」

其實 3系 Touring嘅車廂舒適性未必係同級中最好，但新款當然要比以往進步先得，所以空間增加了近 10﹪，後座腿部增加 17mm，頭部增加 9mm。 Benny：「我試坐過多代 3系 Touring，呢一代最寬敞、最舒服，後座腿部空間比以前多代都好，頭部就差唔多。原因相信係因為車身矮同車尾較斜關係，整體舒適性只比以前好少少。前座方面亦都好好，除咗張凳個款靚之外，承托表現都唔錯。」

F31新款前座外表好跑車化，而且加上紅線更吸引。 

E91E91前座都係半桶形，但質感好似較厚。 

E46E46未有跑車化，所以前座同普通房車版一樣。

F31新款後座最大進步係腿部空間，而頭部雖有 9mm增長，但實際唔覺。 

E91E91後座同前座一樣，望落好厚身，而坐落其實承托力幾好。 

E46E46因為車尾較直，所以見到後座頭部空間零舍多。

「表現有驚喜！似 3,000c.c.引擎！」

新一代 3系最大嘅改良其實在於引擎，全新 2.0公升 turbo引擎，可以發出 245匹馬力，集輕量同大輸出於一身，車重比上代 328iA輕咗足足 40kg，令到加速表現更加爽快。 William：「表現有驚喜！似 3,000c.c.引擎！我諗佢啲力有我部 335iA八成功力！估唔到！而且轉用 SPORT＋模式後，直頭好似跑車咁，加速表現好輕快，輕易上到高速。」事實新 328iA用上近年 BMW EfficientDynamics標記，表示新車集動感與節能於一身，細 c.c.大馬力引擎就係其中一項，可以一按掣就切換 SPORT＋、 SPORT、 COMFORT同 ECO PRO，當中 ECO PRO模式可以獨立設定冷氣、引擎同波箱，提升燃油效益 20﹪。

E91車主 William表示新引擎有驚喜，有佢部 335iA八成功力！ 

加速爽快！完全唔似 2.0公升 turbo！ 

「集慳油同高性能一身，會考慮買。」

據廠方表示， 328iA Touring用上新引擎、新 8速波箱，同埋停車自動熄匙系統，可以做出 6.5L/100km嘅耗油成績。 Benny：「其實未試車前我對呢部車好有興趣，試咗車之後發覺佢集慳油同高性能一身，會考慮買。最滿意係整體操控有 3系一貫風格，比 M-Benz同 Audi更富駕駛樂趣。」綜合兩位上代 3系 Touring車主意見，新款 328iA Touring實在有賣點，而且現時車價只係$558,000起，吸引力唔會低過房車版。

ECO PRO模式仲可以獨立設定多個系統。 

波棍旁就係切換駕駛模式按掣，操作方便。 

8速波箱十分緊密，轉波順暢感覺拍得住 CVT咁滑。

全新直四 turbo引擎肯定係 BMW近年出色作品之一，輕量、大馬力，仲要慳油！死未？ 

設有速度感應軚盤，車速一方面提高，入彎時就要用較大力先可以扭軚，作用係令軚感更實在。 

撰文：袁國基
攝影：葉偉豪