在西貢泥涌， Alice拍下自己踩單車的一幕，展現好動的一面。 

青雲路

拍短片贏澳洲絶世筍工

吃喝玩樂、遊山玩水之餘又可以有豐厚的薪金，可以說是令人趨之若騖的工作，澳洲昆士蘭旅遊局在 09年招聘大堡礁保育員時，便吸引全球 3萬多名年輕人應徵；近日澳洲墨爾本旅遊局推出「 The Best Job In The World」（絕世筍工）， 6個工作機會讓全球人士競爭，有興趣人士需拍一段 30秒短片應徵，現職雜誌攝影師的 Alice，決定應徵筍工當中的生活時尚攝影師一職，今期〈青雲路〉直擊她的準備情況。

採訪當日是星期日， Alice到西貢泥涌自拍短片，她全身單車裝束，並拿着自拍器材，不斷在岸邊來回踩單車，把踩單車的畫面攝錄下來，「平時鍾意同朋友周圍去，行山、踩單車、燒嘢食，上山下海，今次嚟泥涌係想拍低自己平時好動活潑嘅一面。」
週日一大早， Alice便從家中出發去到火炭的迷你倉拿單車，之後乘坐港鐵去烏溪沙再到泥涌，下午她到油麻地吃地道的茶餐廳小食，沿途 Alice全程自拍，希望拍下最自然的自己，「自拍最緊要係唔可以驚，拎住個鏡頭喺條街度自言自語，俾途人望住唔可以怕醜，好似頭先搭港鐵時，我將部 cam放喺車廂內嘅扶手鐵上自拍，唔少乘客望住我，如果乜都驚一餐，就咩都拍唔到，我份人唔知個『醜』字點寫，自拍一啲難度都冇。」
今年 29歲的 Alice，打算應徵澳洲旅遊局推出的「絕世筍工」的生活時尚攝影師，第一輪預選是上傳一段少於 30秒的自薦短片，這幾天她為此東奔西走，「本來諗住今年參加澳洲嘅 working holiday，咁啱澳洲旅遊局喺 3月公布咗 6份絕世筍工，當中嘅生活時尚攝影師，覺得 fit晒自己，咪諗住試吓囉，雖然預咗有好多人申請，咁實有一個人會選到㗎嘛，嗰個人咪係我囉。」

在泥灘上， Alice尋找合適的拍攝角度。 

在油麻地尋找舊式的茶餐廳，以突出香港的本土特色，增添短片的文化色彩。 

自信勝任絕世筍工

說出玩笑般的成功宣言，除了樂天開朗的性格外，現職雜誌攝影師也是 Alice自信的源頭，「呢份工我做咗 5年，主要影關於 fashion嘅嘢，時裝、 model、飲飲食食，同今次筍工嘅生活時尚攝影師職位有關，都係為雜誌工作，發掘墨爾本不為人知嘅吃喝玩樂一面，而且墨爾本城巷郊野嘅發展同香港好相似，覺得呢份工好似為我度身訂做咁。」
中五畢業後， Alice讀了 1年攝影課程，便到影樓做攝影助手，「本身好鍾意攝影，但喺影樓做咗約半年，接觸到唔少客人，發覺自己英文唔得，於是決定讀珠海學院嘅英文系，讀書期間繼續做影樓助手，畢業後去咗做雜誌攝影師，由做助手開始已經影關於 fashion嘅嘢，前後都有成 10年經驗。」

Alice用 Go Pro HD HEROZ自拍，拍到很 wide的背景。 


工欲善其事必先利其器，朋友相借的拍攝器材 Go Pro HD HEROZ，售價約 2千，令 Alice的自拍得以順利進行。

短片主題生活出發

為了這短片， Alice更找來朋友 Justin幫忙製短片的背景音樂。 

自信心爆棚的 Alice，在短片製作上卻沒有鬆懈，作好資料搜集，「參考過上年成功奪得大堡礁保育員 Southall嘅拍攝短片，發覺佢冇用到咩高超嘅拍攝技巧，反而簡單直接咁表達出自己生活習慣同喜好，於是我都抱住喺影片中表現出最真實嘅自己，將平時生活化嘅事都拍低佢，將自己鍾意嘅活動介紹畀人知。」
在拍攝器材上， Alice也花了一些心機，「本來諗過搵拍開片嘅朋友幫手，但見到份工有機會需要自己拍片，於是決定採用自拍嘅模式，諗過用 iPhone自拍，不過試過效果唔係太好，鏡頭唔夠 wide，有朋友借咗專用嚟錄影戶外運動嘅 Go Pro HD HEROZ畀我，即使自拍，個鏡頭都可以拍得好 wide，連背景都拍埋。」

徵詢各方朋友意見

選好器材後， Alice就拍攝方向上徵詢了不少朋友的意見，「一開始未諗到拍攝主題，雖然做開攝影，但同拍片始終有啲唔同，於是請教唔少朋友，好似問番佢哋覺得我係點嘅人，最後都得出鍾意講嘢、唔悶得、唔停得、周圍試新嘢嘅好動少女，於是影片中會考慮多啲活動片段，但同時會有靜落嚟嘅時間，畀人睇到識享受生活嘅一面。」
相識滿天下的 Alice，得到不少朋友的義助，「諗咗大致方向後，就周圍搵適合嘅錄製地點，雖然自己都周圍去，但都想參考吓有冇更好嘅選擇，好似泥涌就係同事建議，嚟到真係覺得環境唔錯；而背景音樂方面，喺朋友介紹之下已經搵到人幫手錄製。」
4月 10日是最後申請的限期， Alice現正作最後衝刺，「要拍嘅片段都大致上拍完，𠵱家仲差剪片嗰部分未搞掂，睇吓搵唔搵到朋友幫手，如果唔得就自己睇書學，就算最後應徵失敗，會按原定計劃申請澳洲嘅 working holiday，點都想出國見識吓。」

後記：香港推絕世筍工？

身為攝影師的 Alice，平時的工作便是對着生活時尚相關物品影個不停，與想爭取的生活時尚攝影師有不少相似之處。 

採訪期間， Alice不斷分享她在香港不同地方拍下的片段給記者觀看，好像在西貢碼頭買新鮮魚燒烤、泥涌摸蜆等等，香港地方細細，她也發掘了不少值得介紹的地方。其實香港旅遊局是否應該推出絕世筍工，介紹本土特色給世人認識？

應徵絕世筍工

3月初澳洲旅遊局推出「絕世筍工」活動，歡迎全球年輕人競逐招聘野生動物看護員、國家公園巡護員、玩樂達人、內陸冒險家、品嘗大師和生活時尚攝影師共 6個職位，應徵者需介乎 18至 30歲，並於 4月 10日晚上 7時前於網上登記，及上載一段少於 30秒的自薦短片，闡述自己為何是最佳人選，每份筍工合約期為 6個月，連人工和褔利有 10萬澳元(約 80萬港元)。

查詢：澳洲旅遊局
http://www.australia.com/zht/best-jobs.aspx 

專家意見：拍攝技巧唔重要

導演陳果 

即將開拍由網絡小說改編的電影《那夜凌晨，我坐上了旺角開往大埔的紅 van》的香港著名導演陳果表示， Alice所拍的 30秒應徵短片，不用太著重拍攝技巧，「其實拍攝技巧唔太重要，短片應該著重喺點樣突出自己適合呢份工作，例如有足夠嘅英語能力同純熟嘅溝通技巧。」
絕世筍工之一的生活時尚攝影師，目的是介紹墨爾本大街小巷及時尚玩意讓世人認識，陳果說短片內容可以凸顯自己居住地方的特色，令評審留下印象，「好似 Alice揀嘅舊式茶餐廳係唔錯嘅選擇，凸顯到香港嘅特色，亦表現到自己有 sense拍到一個地方嘅特色。」

撰文：曾志恒
攝影：彭自維、傅新發、許仙煜
部分圖片由被訪者提供