面對面
和高主教對話 高皓正
35歲的高皓正與本刊有些淵源， 15年前，他參選了本刊前身《便利》舉辦的首屆全港大專院校校草選舉，因而入行。
不過， 15年前的高皓正，和 15年後的高皓正，判若兩人。
15年前，他是「中大謝霆鋒」，有腦有樣有才華、拍劇唱歌多廣告、多情風流換畫多過換衫，終於有日換出事，二千年被控強姦，最後撤銷控罪。
15年後，他成了「高主教」，有一大套理論教青少年戒自瀆，亦有能耐為女藝人一家三口驅魔，於是被高登巴打和 facebook網友民選成為本地最具影響力的基督徒，尊稱他一聲高主教。
記者是無神論者，既不相信有神、亦不相信有鬼，親身經歷告訴我，在最困難的時候，真正出錢出力扶持包容的，是實實在在的家人、朋友和同事，而不是甚麼虛無飄渺的宗教。
高皓正告訴我，最近人氣升、訪問多，當天就有三個訪問在身，第二天還要上機與太太飛往泰國度假造人，臨飛前百忙之中加插本刊訪問，正是因為有一把聲音告訴他，要會一會我這個無神論者，要告訴我神是愛我的。
這個訪問結束以後，我還是不相信有神、不相信有鬼，但是我相信高皓正臨走前堅持為我祈禱的誠心和善意。最後總結，教戒 J又不是教殺人，戒不戒 J是你的自由，可是教戒 J的人，何罪之有？
戒 J路上跌倒過
相隔三天，高皓正先搞戒 J再幫人驅魔，被民間封為高主教：「我係講緊如何自由地選擇不自瀆，唔係話自瀆係錯。被誤解唔緊要，我係為自己信念而活。」
「首先我要澄清，之前有報道話我結婚先開始戒 J，其實我戒 J已經戒咗十年，二千年出事之後，我想戒埋婚前性行為，不過唔成功，途中跌倒過。」
據高皓正回憶，在中大哲學系就學期間，自己與相戀七年女友分手，最失落的時候，姐姐兄弟各有各忙、爸爸在內地經商，碰巧自己選校草入行，「中大謝霆鋒」大名響徹校園和模特界，在最孤獨最需要愛的時候，自己選擇了到處拈花惹草填補空虛。
「我冇試過一腳踏兩船，不過校內同學、校外 model，隔幾個月就換畫，有時係新識、有時又同舊嘅糾纏不清，有一次被前女友嘅男朋友打，仲告我強姦。嗰次俾佢用刀降住，我真係可能會死，從此以後，我重拾信仰，想戒婚前性行為。你可以話沉溺拍拖同性係成長必經階段，但係我覺得有啲嘢其實可以選擇有得避免，好似我咁，無啦啦多笪𤶸，何必呢？」
在戒婚前性行為的過程中，高皓正說跌倒過。我理解成，即是性慾戰勝了聖經。
98年出道、 08年才推出個人福音專輯，入行 15年，高皓正其實唱得又作得，最出名係專輯內收錄的〈不要驚動愛情〉被鄭秀文翻唱大 hit。
「用我哋信仰嘅 term，係跌倒。但係跌倒有時唔係戰勝唔到個慾望咁簡單，有時呢啲嘢都係互動㗎，我都唔係冇吸引力吖……人哋同你拍拖，都有人哋習慣，你唔做，佢會覺得你唔鍾意佢……」
OK…… anyway，直到 08年遇上現任醫生老婆，小兩口的確在婚前守了貞，直到 10年結婚後才有性行為，婚後有喜，生下現時剛滿一歲的女兒——高純意。我在想，這對基督徒總算說到做到，好過黃貫中同朱茵，不過咁，遇着另一半是朱茵，想要不「跌倒」，確係不容易。
「黃貫中同朱茵，仲有謝安琪同張繼聰，我覺得可以由另外一個角度去睇件事。好多基督徒因為佢哋先懷孕後結婚而鬧佢哋，佢哋大可以避免俾人鬧，而選擇落咗個 BB、唔話畀人知，佢哋結咗婚、面對佢，都係好事。」
致力福音工作外，都要搵食，高皓正去年幫亞視拍完電視劇《親密損友》後，現時是香港電視王維基旗下藝人：「搵得唔多，同太太仲係未有錢買樓。」
早年在三千呎大屋兼私家 studio接受雜誌家居訪問，被指富二代：「我屋企係小康之家，嗰度其實係朋友屋企，我哋拍檔喺佢度做音樂。」《忽然 1周》圖片
祂是爸爸亦是情人
原名高萬華，高皓正 98年獲得《便利》校草第五名，還代表香港在菲律賓贏得高校 Mr. Talent殊榮：「我有啲吸引力，入行後又識多好多人，所以感情生活曾經好混亂。」
神亦關愛陰陽眼
10年 3月，高皓正與拍拖年半的皮膚科醫生陸凱兒結婚：「好多人話我靠岳父，唔只我冇靠過佢，其實我老婆都好節儉，識佢咁多年都冇見佢買過新衫。」
繼發表戒 J十誡後，相隔三天，高皓正又在 facebook發表真人真事靈界經歷，話不久前上門為女藝人一家三口驅魔，收拾掉女藝人各種風水擺設及神像後，再在單位四面八方搽滿基督書局有售的 anointed oil，當晚女藝人的兩歲小女兒即表示，平時撞開嗰隻鬼叔叔沒有入屋，被隔在單位鐵閘之外。鋪文之後，即時惹來資深牧師質疑，高皓正的驅魔資格及程序，又被網民諷刺，神又係佢、鬼又係佢。
「首先，我唔係去驅魔，嗰隻 anointed oil亦唔係話有法力，我喺普通基督教書局買，冇為意過咩成分。個屋主係又拜唔係又拜，連包公都拜，我經過佢同意清除晒呢啲嘢，然後搽滿油。不過因為隻油有香味，瀰漫成間屋，等佢感受到神嘅包圍，同祝福啫。」
神怪之事陸續有來：「早兩年，我約埋一班弟兄姐妹祈禱，當時楊思琦同李泳豪鬧分手，我提議為呢家人祈禱。好奇怪，有個陌生嘅電話號碼打嚟，我第一次問係邊個，佢話冇打過嚟。隔咗一陣，又係呢個號碼再打嚟，我再打去問，佢都係話冇打過電話。今次我冇放棄，又覺得聽落把聲好熟，就問佢：『請問你係唔係李太呀！』佢話佢好耐冇做李太，佢係施明。施明姐姐堅稱佢冇我電話，亦都冇打過畀我，但係點解個電話會響兩次呢，嗰次我說服咗佢，畀我喺電話入面幫佢祈禱。」
這種巧合，一般人會大嘆「好邪」，高皓正則說是神蹟，證明了神愛世人的道理，即使那個人是陰陽眼。
信仰自由
去年 2月女兒高純意出世，高皓正說正計劃追多個：「啱啱拍咗半年劇，聽日就陪老婆放個假，去蘇梅島造人。」
高皓正說，冥冥中有一把聲音，指導他來見記者，要轉告一聲，神愛記者。
不過，不好的遭遇，他說不是神的旨意，遇到的所有好人好事，他卻說是神的眷顧……
一句講晒，就像我做完司徒法正與麥玲玲的訪問一個感覺，對於上帝，信則有、不信則無。
留言列表
