漫遊毒物

雙熒幕決戰壞利歐《 Game& Wario》

唔經唔覺 Wii U已經出咗成三個月，一眾首發即出機嘅機主，呢三個月都應該幾難過，皆因 Wii U正 game仍然唔夠人哋多，玩完「芒亨」睇怕都已經封咗塵。好在近期任天堂自家大作《 Game& Wario》終於抵港！
淨係睇遊戲名就知擺明要向老任 80年代咭片遊戲機「 Game& Watch」致敬，佢主打輕鬆路線多合一小遊戲，雖然 game數量僅僅得 16隻，卻要用盡雙熒幕兼成塊 GamePad功能先玩得掂，每隻都內涵十足，遊戲性仍然高到離譜，睇住 model影相時由扮玩變真玩，就知任天堂出品冇失手！

機種： Wii U
廠商：任天堂
類型：小遊戲
人數： 1至 5人（ 2P-5P需使用 Wii-remote手掣）
售價：$348（電氣良品/2359 7998）

16合 1超抵打

由曾經開發《 Made in Wario》系列的 Nintendo SPD Group No. 1/Intelligent Systems團隊開發，為首度在 Wii U上推出的系列新作。本作名為《 Game& Wario》，似乎要同《 Made in Wario》區別開，皆因遊戲並非玩數秒內完成嘅小遊戲，而真真正正變成一款 16合 1遊戲，每隻遊戲都有獨特玩法同風格，用盡 Wii U體感同雙芒機能，係機主必買之作。

動作類 Best Choice：第一身塔防　用盡雙熒幕

16款遊戲話少唔少，現分為 4大類，推介最好玩一款。呢隻《 Arrow》似足手機「塔防」 game，玩家係用箭塔嘅主觀視點去玩，一開始拎起 gamepad，當作你嘅箭塔，再拉弓射箭抵抗敵人。如果射唔清，俾班友過咗界，班友仔就會由主畫面跳入 gamepad小芒內偷襲你，呢個時候要直接用手指捽死佢哋，否則小芒內的 4盆盆栽被偷晒就算輸！一路過版仲要打 boss，有唔同道具如炸彈等當箭射。
評語：直感玩法簡單刺激、肯定玩到「𠵱嘩鬼叫」！

擺動 gamepad手掣瞄準、再用手指拉弓，控制射箭力度。

要直接用手指捽死班小鬼，否則小芒內的 4盆盆栽被偷晒就算輸！

雙打類 Best Choice： DJ Battle鬥捽碟

《 Wario》屬「孖寶一族」，但估唔到呢隻雙打遊戲竟然似 Konami隻《 Beatmania》！
呢隻音樂小遊戲係畀兩位玩家喺 gamepad個小芒上決戰，首先分左右兩邊、每人三粒音樂掣，先進攻一方聽住音樂再 freestyle按音樂掣創作節奏、防守一方就要跟番呢個節奏按相應次序嘅掣，跟唔到就會冇分。實玩之後不得不佩服遊戲設計簡單得嚟非常好玩，特別遊戲仲可以利用道具防止對手得分，變化多。
評語：雙打互鬥元素豐富，絕對係考驗友情嘅深度遊戲……

畫面可以見到對手輸入嘅按鈕次序，不過聽聲跟 beat都好重要。

主畫面反而係畀其他觀眾睇兩位 DJ battle，實際用途唔大。

屙「蛋」機

呢隻 game都有收集元素，完成遊戲可後拎到金幣扭「蛋」，最惡搞都係部雞形扭蛋機，入錢後佢就會「屙」粒蛋畀你，見到就知好新鮮……

啲蛋似乎只係收集 items，冇真正用途，但要扭齊所有蛋都唔係咁簡單，應該夠你玩到下隻 Wii U大作推出。

腦力類 Best Choice： Window Shutter Gamepad偷拍狗仔隊

狗仔隊成日用超長炮影明星屋企個窗，呢隻 game入面，你就要扮演一個攝影偵探，老闆要你用相機影低五個目標人物，而你手上嘅 gamepad就成為相機！按照主畫面指示，利用 Gamepad對正畫面，小芒就會變成 zoom in嘅狀態，十足十長鏡頭睇嘢，當發現目標時就要按快門捕捉，成功影到角色望鏡頭嘅「眼神相」先會有高分！講落簡單，玩落就知難度位喺邊，場景人多雜物又多，仲要目標個個差唔多樣，小心點錯相、影錯相！
評語：冇射箭塔咁刺激，但同樣考你反應同智慧！

手掣扮長炮！

畫面下 5個就係目標人物，成班方塊人個個差唔多樣，好難認！

先望住大電視搵出目標大概位置，之後舉起 GamePad對準目標，芒仔會變成 Viewfinder影相。

懷舊類 Best Choice： Game& Watch明益老玩家

製作組實在非常聰明，用另一種方式還原番 Wii作品《 Made in Wario》嘅感覺。玩家只要做番自己：一個夜晚唔願瞓淨係掛住打機嘅細路，一邊喺 gamepad玩住以往《 Made in Wario》嘅小遊戲，但不時要留意主畫面，因為阿媽時不時會𥄫你瞓咗未！佢一偷睇你就要放平 gamepad扮瞓覺！如果唔係就會俾佢沒收遊戲機 game over，好玩在，如果你不斷「詐瞓」都有機會真係瞓着，好有心思！
評語：設定抵死、眼明手快考埋反應，記者要玩 4次先成功過關！

呢類「直感小遊戲」玩法簡單，比如睇準位置撩鼻屎、篤芒捽碟等等，以前有玩過 Wario系列嘅老玩家應該熟口熟面！