| 人民力量散散哋 蕭派人馬動搖 |
老蕭一拍兩散，只係風波嘅序幕，「人民力量」唔單止冇咗個平台，核心亦開始動搖，幾個「蕭派」成員正考慮去留，分分鐘散水。
線人指，老蕭雖然冇加入「人民力量」，但佢亦有個馬房，呢支人馬同佢關係密切，好受佢影響，當中包括立法會議員陳志全（慢必）、人力執委袁彌明及歐陽英傑（星屑醫生）。
蕭黃割席後，歐陽英傑首先表明會停用一個特別寫人力活動嘅facebook帳戶，又話會選擇離開；袁彌明亦坦言考慮緊，覺得用「選民力量」身份做事，會獨立好多。
本刊記者問慢必點諗，佢話「乜可能性都會有。以往有不滿都會以大局為重，冇去好好處理，現階段係要反省吓啦。」不過因為佢做咗立法會議員，淡出冇咁容易，要認真考慮。
至於重量級人物陳偉業（大嚿），一直未明確表態，但日前於facebook表示，因為同毓民門生黃洋達難以合作，故將會退出由毓民牽頭的普羅政治學苑。佢咁做係咪同毓民拆夥嘅前奏？線人話唔似係，大嚿依然會留喺「人民力量」，但未來發展如何，就會睇落至知。
人民力量內，慢必（左）、袁彌明及星屑醫生屬「蕭派」，蕭黃拆夥後，佢哋都正考慮去留。
全站熱搜
留言列表
